Ҳукумати Эрон назорат бар иншооти ғанисозии ураниумро маҳдуд кардааст ва чанде аз нозирони Оҷонси Байналмилалии Энержии Атомиро ба онҳо роҳ надодааст.
Рафаэл Гроссӣ барои мутақоид кардани Эрон ба музокирот сари барномаҳои баҳсбарангези атомии ин кишвар рафтааст ва мегӯяд, “фазо барои ин музокирот тангтар мешавад”.
Теҳрон мегӯяд, барномаҳои атомиаш ва ғанисозии ураниум бо ҳадафҳои осоишта ба роҳ монда шудаанд, вале кишварҳои ғарбӣ мегӯянд, Эрон мехоҳад, пинҳонӣ бомби атомӣ бисозад.
Сафари Рафаэл Гроссӣ дар остонаи нишасти мудирони Оҷонси Байналмилалии Энержии Атомӣ сурат мегирад, ки баъзе аз аъзои он хостаанд, ки ба зидди Эрон барои ин барномаҳояш “чора андешида шавад.”
