Ҳодиса
"Чӣ гуна ба худаш 26 корд задааст?" Баҳси марги Манора дубора бархост. ВИДЕО
Раёсати парвандаҳои махсусан муҳими Додситонии кулли Тоҷикистон ба таҳқиқи марги баҳсбарангези як зани ҷавон дар Файзобод оғоз кардааст. Ҷасади Манораи Абдуфаттоҳро бо 26 зарби корд рӯзи 22-юми июни соли 2021 дар манзили иҷорааш дар ноҳияи Файзобод ёфтанд. Мақомот гуфтанд, ӯ худкушӣ кардааст. Наздиконаш бовар надоранд.
Абдуфаттоҳ Мисоқов, падари Манора, мегӯяд, як сол боз даҳҳо мактуб навишта, аз мақомот тафтиши одилонаи марги духтарашро хостааст.
Масъулони Додситонии кулли Тоҷикистон рӯзи 16-уми июн дар номае ба ӯ гуфтаанд, “ҳама ваҷҳҳои пешниҳодшуда тафтиш хоҳад шуд.”
Падари Манора пойфишорӣ дорад, ки “ҳеч кас наметавонад бо 26 зарби корд худашро бикушад, аз ин рӯ, мақомот инро дақиқ кунанд.”
“Духтари ман аз сӯзандору метарсид. Худаш хоҳари шафқат буд, вале агар як сӯзандору мезад, метарсид. Чӣ хел худаш ба гарданаш 14 кордча задааст? Ду кордча дар тарафи чап, ду кордча дар тарафи рост, ду кордчаи дигар дар шикам, панҷ кордча дар як даст, як кордчаи дигар дар дасти дигар мезанад? Агар худкушӣ мекард, худашро дар ташноб фалақ мекашид,” -- гуфт ӯ рӯзи 29-уми июн.
Наворро дар инҷо бинед:
Муфаттишон ба зангҳои мо посух надоданд, то парвандаро шарҳ диҳанд. Мақомот пештар гуфта буданд, ташхисҳои батакрор худкушии зани ҷавонро “дар ҳолати сахти ҳаяҷони рӯҳӣ”-ро собит кардааст ва иддаои кушта шудани ӯ асос надорад. Абдуфаттоҳ Мисоқов мегӯяд, ҳатто барои ба худкушӣ расондан низ касеро ҷавобгар накарданд.
“Ягон чора надиданд. Бар асоси қисми яки моддаи 109, яъне худкушӣ парванда кушоданд, вале касеро гумонбар накарданд,” -- гуфт ӯ.
Аз Манора се фарзанд мондааст, ки онҳоро додгоҳ ба хонаводаи шавҳараш супурдааст. Замони ҳодиса шавҳараш дар Русия буд. Хонаводаи шавҳараш аз суҳбат дар ин бора худдорӣ мекунанд.
Дар Тоҷикистон куштор ё худкушӣ дар заминаи муноқишаҳои оилавӣ зиёд рӯй медиҳанд. Дар бештари маврид мақомот шахсеро барои "ба худкушӣ расонидан" ба ҷавобгарӣ мекашанд. Дар баъзе ҳолати дигар, нафаре, ки худашро куштааст, "бемори равонӣ" номида мешавад.
Ҳамаи хабарҳои имрӯзро дар инҷо бихонед
Гуфта буд "милисаҳо мисли тӯби футбол заданд", ҳоло ҷазо гирифт
Додгоҳи вилояти Суғд сокини 22-солаи ноҳияи Зафаробод Наврӯз Нурзодаро, ки қаблан гуфта буд маъмурони милиса "мисли тӯби футбол заданд", бо гуноҳи саркашӣ аз хидмати ҳарбӣ 36 ҳазор сомонӣ ҷарима баст. Қарор рӯзи дувуми апрел содир шуд, аммо ӯ ва наздиконаш розӣ нестанд.
"Ба толори суд (додгоҳ) надаромада, гуфтанд, ки аллакай ҳамааш ҳал шудааст. Ҷарима бастанду гуфтанд, ба хидмати ҳарбӣ намебаранд. Ман талаб мекунам, ки маро сафед кунанд ва ба хидмат баранд, чун имкони супоридани ҷаримаро надорам," – гуфт Наврӯз Нурзода дар суҳбат бо Радиои Озодӣ.
Пештар Додгоҳи ноҳияи Зафаробод низ қарори ҳамсон бароварда буд. Мақомот гуфтанд, азбаски Наврӯз Нурзода ду моҳро дар Боздоштгоҳ гузаронд, бахше аз ҷаримаро кам карданд.
Ин сокини ноҳияи Зафаробод рӯзи 8-уми декабри соли 2024 ҳангоми бозгашт аз Русия дар гузаргоҳи "Фотеҳобод-Ойбек" (марзи Тоҷикистону Узбекистон) дастгир ва ба Шуъбаи корҳои дохилии ноҳияи Зафаробод бурда шудааст. Ҷое, ки ба иддаои худаш ва волидонаш "латукӯб шуд".
Мақомот гуфтаанд, ӯ даъватро барои ҳозир шудан ба комиссариати ҳарбӣ нодида гирифт ва аз хидмат дар артиш сарпечӣ кард, биноан дастгир шуд. Худашу наздиконаш мегӯянд, ӯ қасди фирор аз хидматро надошт, балки аз ночорӣ барои кор ба Русия рафту бо ҳадафи сарбозӣ ба кишвар бозгашт.
"Барои шиканҷа шудан ҳам шикоят кардам, аммо ҳеч натиҷа надод. Дар милисахонаи Зафаробод маро шиканҷа карда буданд. Вазъи саломатиям ҳам он қадар хуб нест. Миёнам дард мекунад, давида наметавонам. Ҳеч кас чораи онҳоро надид. Мехоҳам касоне, ки маро шиканҷаву дашном доданд, ба ҷавобгарӣ кашида шаванд," -- гуфт Наврӯз Нурзода.
Ҳоло вай ва вакили мудофеаш азм доранд, ба зинаҳои болоии додгоҳ муроҷиат кунанд, то Нурзодаро пурра бегуноҳ эътироф карда, маъмурони Шуъбаи умури дохилии ноҳияи Зафарободро ба ҷавобгарӣ кашанд.
Вакили мудофеъ Дилафрӯз Самадова гуфт: "Бо ҳукми Суди ноҳияи Зафаробод вай бояд ҷарима супорад. Онҳое, ки барои содир кардани ҷиноят бо ҳукми суд аз озодӣ маҳрум шудаанд, аз даъват ба хизмати ҳарбӣ озод карда мешаванд. Аз ин лиҳоз Наврӯз Нурзода барои шикоят кардан ба суди марҳилаи назоратӣ мавқеи худро баён кардааст."
Шикоятҳо аз шиканҷа дар Тоҷикистон солҳои гузашта низ сабт шудааст. Дар баъзе маврид кормандони ниҳодҳои қудратӣ барои шиканҷа ҷазо мегиранд, аммо дар ҳолатҳои дигар касе муҷозот намешавад. Тоҷикистон ба сабаби бадрафторӣ ва шиканҷаи гумонбарон дар боздоштгоҳҳо ҳамеша танқид мешавад.
Видеоро дар инҷо бинед:
Чойхонаи "Роҳат" дар Киев аз ҳамлаҳои Русия вайрон шудааст
Чойхонаи тоҷикии "Роҳат" дар пойтахти Украина рӯзи 6-уми апрел дар ҳамлаи мушакии Русия қисман вайрон шудааст.
Чанд тоҷики муқими Киев рӯзи 7-уми апрел дар суҳбат бо Радиои Озодӣ гуфтанд, ки чойхона корношоям шуд ва дарҳояшро ба рӯи муштариён бастанд.
Ба гуфтаи онҳо, чанд мушаки Русия ба атрофи чойхона афтода, тирезаҳои онро шикаст ва дохили биноро хароб кард.
Соҳиби чойхона гуфт, дар фурсати зудтарин дубора кори он оғоз хоҳад шуд. Вай нагуфт, ки аз ин ҳамла чӣ қадар зиён дидааст.
Бори аввал нест, ки ин чойхона зиён мебинад. Моҳи феврал дар чунин ҳамлае чойхонаи "Роҳат" сӯхта буд.
Чойхонаи "Роҳат" бо пешниҳоди таомҳои миллӣ дар маркази Киев як макони маъруф барои тоҷикони муқими Украина ва баъзе аз сокинони маҳаллӣ дониста мешавад. Барои то сад муштарӣ ҷой дорад.
Дар аксҳо дар шабакаҳои иҷтимоӣ дида мешавад, ки сафорати Тоҷикистон дар Украина низ аксар чорабиниҳои фарҳангияшро дар ҳамин чойхона мегузаронад.
Видеоро дар инҷо бинед:
"Аз Узбекистон оварданд." Боздошти раиси собиқи Конибодом
Абдусалом Тухтасунзода, ки дар моҳи январ бо далели ба кори дигар гузаштан аз мансаби раиси шаҳри Конибодом барканор шуда буд, боздошт гардидааст. Вай дар ин мақом тақрибан се сол кор кард.
Чанд манбаи боварбахши Радиои Озодӣ дар ниҳодҳои тафтишотӣ рӯзи севуми апрел гуфтанд, ки боздошти Тухтасунзода дар охири моҳи феврал сурат гирифта, таҳқиқи қазияаш идома дорад.
Мақомот дар ин бора хабар намедиҳанд.
Тибқи иттилои ёфтаи Радиои Озодӣ, Абдусалом Тухтасунзода дар Узбекистон дастгир ва сипас ба Тоҷикистон оварда шудааст. Як манбаи огоҳ бо шарти фош нашудани номаш гуфт, "ӯро феълан дар Боздоштгоҳи муваққатӣ дар шаҳри Хуҷанд нигоҳ медоранд."
Мусоҳиби мо афзуд, раиси собиқи шаҳри Конибодом ба ришвагирӣ ва қаллобӣ гумонзад аст. Назари вакили мудофеъ ва ё наздиконаш ба иттиҳом маълум нест.
Ҳамчунин, ба иттилои манобеи Радиои Озодӣ, Сӯҳроб Умарзода – муовини пешини сардори Шуъбаи корҳои дохилӣ ва Усмон Ҳайдар – мудири собиқи амволи ҳукумати Конибодом низ дастгир шудаанд.
Раиси пешини идораи амвол ба қаллобӣ муттаҳам аст. Айбномаи корманди корҳои дохилӣ феълан дақиқ нест. Дар бораи боздошти чанд масъули дигари давлатӣ дар Конибодом ба дасти Радиои Озодӣ гузориш расидааст, вале тасдиқ ё радди онҳо то ҳол имконпазир нашуд.
Манобеи Радиои Озодӣ гуфтанд, боздошти ин афрод баъди ба Конибодом расидани як кумисюни вижа барои таҳқиқи кушторҳои пайиҳам дар охири соли гузашта матраҳ шудааст.
"Аъзои кумисюн сохтмони чанд хонаро дар заминҳои обӣ пайдо карда, инро ба Душанбе гузориш додаанд. Аз онҷо дастур шудааст, ки кори мақомоти Конибодом пурра санҷида шавад, чун онҳо ҳодисаҳои кушторро ҷиддӣ таҳқиқ накардаанд," – афзуд яке аз манбаъҳо.
Баъд аз кушторҳои пайдарпай дар соли 2024 шаҳри Конибодом дар сархати расонаҳо қарор гирифт. Танҳо дар моҳи декабр дар онҷо даҳ кас, аз ҷумла чор ноболиғ аз се оила кушта шуданд. Аз солҳои гузашта то ин дам теъдоди умумии кушташудаҳо зиёда аз бист кас ҳисоб шудааст.
Додситонии кул рӯзи 21-уми декабри соли гузашта гуфт, ки чор нафарро бо иттиҳоми даст доштан дар кушторҳои пайиҳам дар Конибодом дастгир кард. Баъди ин, дигар ҳеч маълумоти расмӣ дар бораи ҳодисаҳову гумонбарон нашру паҳн нашуд. Номаҳои Радиои Озодӣ низ ба ин ниҳодҳо то ҳол беҷавоб мондаанд.
Аюб Усмонзода, раиси Донишгоҳи давлатии Хуҷанд боздошт шудааст
Маъмурони амниятӣ дар вилояти Суғд Аюб Усмонзода, раиси Донишгоҳи давлатии шаҳри Хуҷандро боздошт кардаанд. Ҳарчанд дар ин бора ҳеч ниҳод маълумот намедиҳад, ба иттилои дарёфтии Радиои Озодӣ, ҳодиса дар аввали моҳи март рух дода, Усмонзода ба ришваситонӣ гумонзад аст. Ҷузъиёташ феълан дастрас нест.
Масъулони Вазорати маорифи Тоҷикистон мегӯянд, ки дар ин бора ҳеч иттилоъ нагирифтаанд. Ҳамкоронаш дар донишгоҳ рӯзи 18-уми март дар суҳбати ҳузурӣ гуфтанд, ки Усмонзода даҳ рӯз боз дар ҷойи кор нест. “Инчунин, барои рухсатӣ, муолиҷа ва ё сафари корӣ иҷоза нагирифтааст,” – гуфт яке аз онҳо.
Пайвандони Аюб Усмонзода дар айни ҳол розӣ нестанд, ки дар назди дурбин масъаларо шарҳ диҳанд, аммо гуфтанд, ки “нисбат ба ректор бадӣ шудааст” ва умед доранд, ки “озод мешавад”.
Маълум нест, ки Аюб Усмонзода вакили мудофеъ дорад ё не. Радиои Озодӣ омода аст ба маҳзи дастрас шудани назари вакил ё мавқеи Усмонзода онҳоро нашр намояд.
Аюб Усмонзода 53-сола аст ва профессори илми таърих. Аз моҳи апрели соли 2022 раёсати Донишгоҳи давлатии Хуҷандро ба уҳда дорад.
Пештар Парвиз Пӯлодӣ, мудири факултаи биология ва кимиёи Донишгоҳи давлатии Хуҷанд дастгир шудааст. Эҳтимол меравад, боздошти ду мақомдори донишгоҳ бо ҳам пайванд дорад.
Видео дар инҷост:
Раиси Бунгоҳи мубориза бо коррупсия дар вилояти Суғд моҳи феврали имсол Донишгоҳи давлатии Хуҷандро муассисае номид, ки фасоди молӣ дар он ба авҷ расидааст. Ба иттилои масъулони Оҷонсӣ, танҳо дар соли 2024-ум 49 мавриди фасодро дар донишгоҳ ошкор карданд. Ҳукми додрас ба ин айбномаҳо маълум нест. Аюб Усмонзода дар нишасти хабарии моҳи феврал бо тасдиқи ин ҳолатҳо гуфта буд, ки ин афрод ҷазо гирифтанд.
Ду сол пеш низ мақомоти тафтишотӣ ва қудратии вилояти Суғд гуфта буданд, ки аз ҳама бештар мавридҳои ришваситонии омӯзгорон дар Донишгоҳи давлатии Хуҷанд сабт шуд. Қисме аз онҳо бо ҷарима аз ҷавобгарӣ озод ва нисбат ба бархе чораҳои дигари интизомӣ корбаст шудаанд.
Ҳолатҳои аз ҳама зиёди фасод дар як муассисаи таҳсилотии вилояти Суғд дар ҳолест, ки маорифи Тоҷикистон яке аз соҳаҳои фасодзадатарин номбар мешавад. Вале корбарони шабакаҳои иҷтимоӣ ин хулосаро дуруст намешуморанд ва мегӯянд, зӯри ниҳодҳои зиддифасод ба соҳаҳои дигар намерасад ва омӯзгорону пизишкон шикори осони онҳо дониста мешаванд.
Бо вуҷуди раддияи мақомоти Тоҷикистон сатҳи баланди фасодзадагии тақрибан ҳамаи соҳаҳоро созмонҳои байнулмилал дар гузоришҳои ҳамасола нигаронкунанда меноманд.
"Хона зери обу лой монд, кӯдакҳоро дар болои ҷевон ҷой кардем"
"Хона зери обу лой монд. Дигар не қолин ҳаст, не кӯрпача. Ҳамаро об бурд. Дегу газ ҳам нест."
Раъно Баротова, сокини шаҳри Кӯлоб, пайомади борони шадиду давомдор ва омадани селро ба хонааш чунин баршумурд. Ҳодиса шаби 15-уми март рӯй додааст.
Баротова мегӯяд, ӯ ва пайвандонашро маъмурони Идораи ҳолатҳои фавқулода аз дохили обу лой берун оварданд. "Соати яки шаб буд. Борони сахт борид ва об ба хона даромад. Кӯдакҳоро дар болои ҷевон ҷой кардем," – ба ёд овард ӯ.
Он шаб хонаводаи Гулмо Воҳидова низ бо садои раъду барқ аз хоб бедор шуданд. Диданд, ки маҷрои об вориди хонаашон мешавад.
Вай гуфт: “Сел омад, ба даруни хона даромад. Аз пушт медидӣ, об бисёр баланд буд. Моро пуштора карда аз хона бароварданд.”
Сел ба ҳама чизи хонаи Гулмо Воҳидова осеб расондааст. Аҳли оила мегӯянд, ҳоло намедонанд чӣ хел зиндагӣ кунанд.
Дар Идораи ҳолатҳои фавқулодаи шаҳри Кӯлоб гуфтанд, ки сел ба сокинони деҳаҳои Офтоблиқо, Сангпар, Нурулло Ҳувайдуллоев, Умари Хайём ва Чармгарон зарар расондааст.
Мақомот хисороти расидаро ҳисоб мекунанд.
Тоҷикистон ҳар сол дар айёми баҳор шоҳиди омадани сел мешавад. Ба иттилои расмӣ, аз соли 2008 то 2024 дар Тоҷикистон зиёда аз чаҳор ҳазор офати табиӣ, аз ҷумла селу заминларза ва сангу тармарезӣ сабт шуда, беш аз 500 миллион доллар зарар расондааст. Дар ин ҳодиса беш аз чаҳорсад кас ҷон бохтанд.
Видеоро дар инҷо бинед:
"Ин ваҳшигарӣ аст." Вокунишҳо ба таҷовузи гурӯҳии як духтари 23-сола
Бисёриҳо дар Қирғизистон талаб доранд, ки мурофиаи шахсони гумонзад ба таҷовузи гурӯҳии як духтар дар шаҳри Бишкек ошкор ва бо ҳузури намояндагони матбуоту ҷомеа баргузор шавад. Ҳодиса шаби 28-уми феврал рӯй додааст.
Дурбинҳои назоратӣ лаҳзаеро сабт кардаанд, ки панҷ мард шабона як духтарро аз қаҳвахонае бардошта бо худ мебаранд. Дертар ҷабрдида гуфт, гумонзадҳо ӯро дар мошин андохта, ба майдони кишт бурданд ва дар онҷо бонавбат таҷовуз карданд.
Ба нақли духтар, вай талош кардааст, фирор кунад, вале гумонзадҳо ӯро дошта, бори дигар ба номусаш дастдарозӣ кардаанд. Ҷабрдида субҳ ба пулис шикоят намуд.
"Бар асоси моддаи таҷовуз ба номус парванда боз шудааст. Дар ҷараёни тафтиш панҷ шаҳрванд дастгир ва ба Боздоштгоҳи муваққатӣ бурда шуданд," – гуфт Абдураҳмон Амоналиев, муфаттиш аз ноҳияи Свердлови Бишкек.
Се гумонбар 25 ва дуи дигар 24-сола ҳастанд. Ҷабрдида 23-сола. На ӯ ва на наздиконаш омода нестанд бо хабарнигорон ҳамсуҳбат шаванд.
Дар аризаи шикоятии духтар гуфта шудааст, ки шаби 28-уми феврал ӯ дар қаҳвахонаи "Ситора"-и шаҳри Бишкек буд. Маълум нест чӣ гуна ба ҳолати мадҳушӣ афтодааст, вале ҳомиёни ҳуқуқ мегӯянд, эҳтимол ба нӯшокиаш маводи нашъадор рехтаанд. Ҳоло як суоли дигар ин аст, ки чаро кормандони қаҳвахона милисаро огоҳ накарданд. Ҳомиёни ҳуқуқ мегӯянд, маъмурияти клуб ҳам барои ин кор масъулият дорад.
Нозгул Турдубекова, ҳомии ҳуқуқ аз Бишкек, гуфт: "Бешубҳа, онҳо ҳам бояд ҷавоб диҳанд, чунки метавонистанд ҳадди ақал милисаро даъват кунанд. Шояд як муҳофиз ба панҷ кас муқовимат карда наметонист, вале милисаро бояд ҳатман хабардор мекарданд. Рақами мошинро бояд акс мегирифтанд. Яъне маъмурияти клуб бояд корро чунин ба роҳ мемонд, ки маълумотро дар ихтиёри пулис мегузошт."
Клуби "Ситора" шабҳо кор мекунаду рӯзҳо баста аст. Феълан фаҳмидани мавқеи кормандони ин клуб имкон надорад. Вале дар шабакаҳои иҷтимоӣ ин ҳодисаро бисёр фаъолона муҳокима мекунанд ва аксарият аз ин ҳодиса ба хашм омадаанд. Норозиён мегӯянд, ба гумонзадҳо бояд ҷазои сангинтарин дода шавад. Онҳое низ ҳастанд, ки духтарро барои шабгардиаш танқид мекунанд.
Ҳомиёни ҳуқуқ талаб доранд, ки парванда ошкор муҳокима ва мурофиаи додгоҳӣ ба воситаи Интернет намоиш дода шавад.
"Мурофиа мисли парвандаи собиқ вазири иқтисоди Қазоқистон Бишимбоев боз гузарад, чун ин ҳам як ваҳшигарӣ аст. Инсон чунин рафтор намекунад. Мо бояд маҳкум кунем ва аз беҷазоӣ пешгирӣ кунем. Мурофиа бояд барои ҳама аъзои ҷомеа дастрас бошад," – гуфт Нозгул Турдубекова.
Моддаи "таҷовуз ба номус" дар Қирғизистон аз 8 то 11 сол ҳабсро пешбинӣ мекунад, вале бисёриҳо аз ҳоло даъват доранд, ки ҳукми сангинтар содир шавад.
Видеоро дар инҷо бинед:
Се муҳоҷири тоҷик дар амалиёти ФСБ кушта шудаанд. Онҳо кӣ буданд?
Таҳқиқ нишон дод, ки дар амалиёти амниятиҳои Русия дар Псков се муҳоҷири тоҷик кушта шудаанд.
Дар бораи ин амалиёт мақомоти Русия рӯзи 13-уми феврал ҳамчун пешгирӣ аз эҳтимоли ҳамлаи террористӣ хабар доданд. Онҳо гуфтанд, ду зодаи Осиёи Марказӣ ҳадаф доштанд, истгоҳи роҳи оҳани шаҳри Псковро мунфаҷир кунанд.
Бо вуҷуди он ки Хадамоти федералии амнияти Русия (ФСБ) кушташудагонро ба як созмони “байналмилалии террористӣ” пайванд додааст, номи ин созмонро эълон накардааст. Аммо муҳоҷирони тоҷик дар Псков ва наздикони кушташудагон дар суҳбат бо хабарнигорони Мигрант Медиа ва Радиои Озодӣ хабари мақомоти Русияро зери шубҳа бурданд.
Чанде аз муҳоҷирони тоҷики муқими Пскови Русия гуфтанд, ҳамдиёрони онҳо Парвиз Рустамов, Ҷовид Ҷумъаев ва Азизҷон Аъзамқулзода дар амалиёти нерӯҳои амниятии Русия дар як бӯстонсаро дар канораи шаҳри Псков кушта шудаанд. Расонаҳои Русия гуфтанд, онҳо дар ҳоли омода кардани бомбаи худсохт барои таркондани истгоҳи роҳи оҳан кушта шудаанд.
Беҳзод, муҳоҷири тоҷик дар Псков ба бахши «Мигрант-Медиа»-и Радиои Озодӣ гуфт, “ин бачаҳоро нағз медонам, онҳо хело дар дил орзуҳо доштанд, ҳама аз пайи кор буданд. Ҳеҷ кас бовараш намеояд, ки инҳо ба ҳамин кор даст заданд. Ин бачаҳо бачаҳое набуданд, ки барои пул шуда чунин кунанд. Онҳоро ба даом андохтанд.»
Навор дар Инстаграм:
Парвиз Рустамов аз шаҳри Турсунзода, Ҷовид Ҷумъаев ва Азизҷон Аъзамқулзода аз шаҳри Панҷакент буда, дар ресторани “Чайхона”-и шаҳри Псков кор мекарданд. Баъдан танҳо Ҷовид дар инҷо монда, Азизҷон дар маркази савдои “Акваполис” ба кор рафта, Парвиз таксирон шудааст. То ин дам пайкари онҳо ба наздиконашон дода нашудаст, вале дар зодгоҳашон аз воқеа хабар доранд.
Мурод Шукурзода, муовини раиси шаҳри Панҷакент 17-уми феврал ба Радиои Озодӣ гуфт, дастур гирифтаанд, ки дар бораи ин ҷавонон маълумот ҷамъ кунанд. “Бояд омӯзем, ки онҳо кай ба муҳоҷират рафтанд, бо кӣ ҳамнишину ҳамхез буданд, шароити оилавиашон чӣ хел аст, таҳсилоти онҳо ва фикру ақидаронии онҳо чихел буд?”
Дар навори пахшкардаи мақомоти Русия дида мешавад, ки нерӯҳои амниятӣ бо сипарҳо ба бӯстонсарое дар ҷангал наздик мешаванд ва дар назди даромадгоҳи он овоз мебароранд, ки гумонбарон силоҳро партоянд, баъд аз ин тир мекушоянд. Сипас дар навори дигаре, ки ба навори аввал часпонда шудааст, ҷасади се нафар дида мешавад, ки яке аз онҳо гӯё силоҳ дар даст кушта шудааст.
Дар шабакаҳои иҷтимоии Русия низ ин навор баҳсҳои зиёдро ба миён овардааст. Баъзе корбарон навиштаанд, ки ин “фейки қудратиён аст. Дар баданҳо захми тир дида мешавад, вале дар атрофи онҳо хун дида намешавад.” Корбари дигар маводи таркандаро зери шубҳа мегузорад, ки «дар асри дронҳо касе чунин бомбҳо омода намекунад.”
Ин ақидаро ду муҳоҷири дигари сокини Псков, ки Ҷовид ва Азизҷонро аз наздик мешинохтанд, низ баён карданд. Дар сафҳаи Ҷовид дар шабакаи “В Контакте” дида мешавад, Ҷовид, ки номашро дар Русия “Давид” кардааст, ҳунари ошпазияшро бо ширинкорӣ ба намоиш мегузорад.
Бозорбой Аъзамқулзода, падари Азизҷон 17-уми феврал дар суҳбат бо «Мигрант Медиа» гуфт, писараш ҳатто намоз намехонд. Падари ин муҳоҷири кушташуда, ки қаблан дар ҳукумати шаҳри Панҷакент кор мекард нахост дар ин бора зиёд суҳбат кунад.
Хабари ба ҳамлаи террористӣ омодагӣ дидани ҷавонони тоҷик ва кушта шудани онҳо боиси шубҳа ва нигаронии муҳоҷирони тоҷик дар шаҳри Псков шудааст.
Беҳзод, муҳоҷири тоҷик дар Псков мегӯяд, тоҷикон дар ин шаҳр дигар метарсанд, ки ба кор бароянд.
Губернатори вилояти Псков Михаил Ведерников аз нерӯҳои амниятии Русия сипосгузорӣ кард ва аз корбарони шабакаҳои иҷтимоӣ хост, танҳо ба маълумоти расмӣ бовар кунанд. «Акнун дар ин бора хабарҳои дурӯғи зиёд паҳн хоҳад шуд,» гуфтааст волии Псков.
Навор дар Фейсбук:
Дар гузашта низ Хадамоти амнияти Русия борҳо гуфтааст, ҳангоми пешгирӣ аз ҳамлаи террористӣ муҳоҷирон кушта шудаанд. Чанд сол пеш чунин ҳодиса дар вилояти Владимир рӯй дода, ду бародар дар хобгоҳашон кушта шуданд. Он вақт ҳам корбарон аз мақомоти Тоҷикистон дархост карда буданд, ҳақиқати ин воқеаро ошкор намояд.
Дар ҳамла ба толори консертии “Крокус” дар моҳи марти соли 2024 низ шаҳрвандони Тоҷикистон айбдор карда шуданд, ҳарчанд шубҳаи ширкати онҳо дар ин ҳамла аз тарафи ҷомеаи Тоҷикистон ва расонаҳо борҳо садо додааст.
Модар: "Гуфт, заданд." Омӯзгор: "Латукӯб асос надорад". Наврас аз чӣ фавтид?
Эмомалӣ Самадови 17-сола рӯзи 19-уми январи имсол дар бемористони шаҳри Панҷакент даргузашт. Волидонаш мегӯянд, санҷиши пурраи пизишкиро нагирифтанд, вале иддао доранд, ки сабаби марги ӯ "латукӯби ҳамсинфонаш" аст. Вай дар синфи ёздаҳум мехонд. Омӯзгорон мегӯянд, сабаби марги наврас дигар буд. Тафтиш ҳанӯз ҷараён дорад.
"Писарам гуфт, ки маро зада, беҳуш карданд. Баъд аз чанд вақт ба ҳуш омада, хестам, рӯямро бо оби хунук шуста, ба синф даромадам. Лабам дарид, дандонам зарб хӯрд, дигар ҳеч чиз ба каллаам надаромад, очаҷон," – нақл кард Мавлуда Норимова, модари Самадов.
Ҳодиса, ба гуфтаи пайвандони наврас ва омӯзгорон дар аввали моҳи декабри соли 2024 рух додааст. Модари Эмомалӣ Самадов мегӯяд, аввал фарзандаш аз шарм ҳодисаро нагуфта, фақат аз дарди сару дилбеҳузурӣ шикоят дошт. Танҳо пас аз фош шудани ҳодиса ӯро ба муоина бурдаанд.
Мавлуда Норимова гуфт: "Мағзи сараш такон хӯрдааст. Майнааш нодуруст ҳаракат мекард ва қуввати бача намерасид. Табибон гуфтанд, ки бачаатонро дар беморхона хобонед. Азбаски он вақт пул надоштем, маҷбур бачаро ба хона овардам."
Омӯзгорони мактаби рақами як дар шаҳри Панҷакент ҷой доштани муноқишаро байни хонандагон тасдиқ мекунанд, аммо сабаби марги Эмомалӣ Самадовро чизи дигар медонанд. Бо ин вуҷуд, намояндагони Идораи маориф мудиру равоншиноси мактаб ва роҳбари синфро сарзаниш кардаанд.
Маҳорат Истамова, роҳбари синфи Эмомалӣ Самадов, мегӯяд, "он латукӯбе, ки овоза шуд, асос надорад. Дар ҳақиқат, байнашон камтар гап гурехтагӣ, лекин латукӯб набуд. Ҳарчанд якдигарро яктоӣ зада бошанд ҳам, фикр мекунам, зарари ҷисмонӣ нагирифта буд."
Эмомалӣ Самадов тақрибан 20 рӯз дар бемористони Панҷакент бистарӣ шуда, сипас фавтидааст. Пайвандонаш бовар доранд, ки пизишкони маҳаллӣ омилони ҳодисаро пинҳон мекунанд.
"То 17-солагӣ ягон бор касал нашудааст. Ҳатто бо падараш барои иморати Артел (коргоҳи дӯзандагӣ) машғул шуду хиштҳояшро чид. Дар хонаи ҳамсоя ҳам кор кард бо падараш, сементбардорӣ мекард," – гуфт Мавлуда Норимова.
Пайвандони Эмомалӣ Самадов барои таҳқиқи марги фарзандашон ба ниҳодҳои қудратӣ ва ҳифзи ҳуқуқи инсон муроҷиат кардаанд, вале ба гуфтаашон то ҳол ҷавоби мусбат нагирифтанд. Онҳо дар марги фарзандашон чанд ҳамсинфашро гунаҳкор медонанд. Додситони минтақа дар номае навиштааст, ки ҳодисаро пурра баррасӣ мекунад.
Марги хонандагон дар мактабҳои Тоҷикистон ҳодисаи нав нест. Соли 2024 марги Маҳмуд Давлатови 10-сола дар шаҳри Ваҳдат сабт шуд. Волдионаш гуфтанд, ки ӯ низ дар мактаб латукуб шуда, сипас фавтид. Мақомоти расмӣ дар ин бора тафсилоти пурра намедиҳанд ва тақдири сабабгорони ҳодиса чӣ шудааст, номаълум мемонад.
Гузориши видеоиро дар инҷо бинед:
Дар Суғд як ҷуфтро барои куштани зани ҷавоне дастгир кардаанд
Мақомоти интизомӣ дар вилояти Суғд гуфтанд, як ҷуфтро барои қатли як зан ва ба рӯдхонаи Сир андохтани ҷасади ӯ дастгир кардаанд. Дар соҳили рӯдхона пайдо кардани ҷасади нимбараҳнаи зан ва дар рӯзҳои қатлҳои пайваста дар шаҳри Конибодом мардуми Хуҷанд ва дигар ноҳияҳои Суғдро сахт тарсонд.
Муҳаммадшоҳ Искандарзода, сардори шӯъбаи корҳои дохилӣ дар шаҳри Бӯстон рӯзи 31-уми январ дар нишасти хабарӣ дар ин шаҳр гуфт, қатли Нориниссо Разоқоваи 37-сола оқибати ҷанҷолҳои хонаводагӣ будааст. Ҷасади нимбараҳнаи занро рӯзи 21-уми декабр пайдо карданд.
Баъди тасдиқи ҳуввияти зан, ҷиноятро рӯзи 23-уми декабр ҳамроҳ бо мақомоти маҳалли ҳодиса, яъне ноҳияи Бобоҷон Ғафуров ошкор кардаанд. Муҳаммадшоҳ Искандарзода ва мақомоти дигари интизомӣ номи муттаҳамон ба ҷиноятро ошкор накарданд.
Ӯ дар сӯҳбат ба хабарнигорон гуфт: “Муваққатан инҷо (шаҳри Бӯстон) зиндагӣ мекардаанд, ҳамроҳи марде, ки ҳамзист будаанд. Яъне ҳамчун оилаи дуюм. Ҳамсари якуми мард аз Русия баргашта меояд ва муносибати онҳоро манъ мекунад. Дар натиҷа муноқиша мешавад. Дар натиҷаи муноқиша зану шавҳар якҷо ӯро буғӣ карда мекушанд ва ба Сирдарё мепартоянд.”
Ба қавли афсари милиса, дар як рӯз 27 бор тамос гирифтан ва гар задан ба як шумораи телефон, имкон додааст, ки омилони ҷиноятро зуд пайдо ва боздошт кунанд. Муҳиддин Абдусамадов, сардори Раёсати Кумитаи ҳолатҳои фавқулода ва мудофиаи шаҳрвандии ноҳияи Бобоҷон Ғафуров гуфт: “Аз тарафи шӯъбаи корҳои дохилии рақами 2-и ноҳияи Бобоҷон Ғафуров ду нафар гумонбар бо қасди одамкушӣ дастгир карда шуда тафтишот рафта истодааст”.
Ҷасади Нориниссо Раззоқова замоне пайдо шуд, ки дар шаҳри Конибодом кушторҳои пайдарпай мардуми минтақаро сахт тарсонд. Азбаски дарёи Сир аз назди шаҳри Конибодом мегузарад, гумон мешуд, ки ин ҳодисаҳо бо ҳам алоқаманданд. Дар моҳи декабр дар шаҳри Конибодом даҳ кас, аз ҷумла чаҳор ноболиғ аз се оила кушта шуданд ва айни замон ба гуфтаи мақомот таҳқиқи ин ҷиноятҳои мудҳиш идома дорад.
Ҳалокати 30 коргар, аз ҷумла шаш чинӣ, дар корхонаҳои Тоҷикистон
Дар соли 2024 дар корхонаҳои Тоҷикистон сӣ коргар, аз ҷумла шаш шаҳрванди Чин, ба ҳалокат расида, тақрибан сӣ тани дигар маҷруҳ шудаанд.
Мақомот далелҳои зиёд шудани ин мавридҳоро дар як нишасти хабарӣ шарҳ доданд.
Санъат Асо, сардори Хадамоти назорати бехатарии кор дар саноат, рӯзи 28-уми январ гуфт: "Суръати кори чиниҳо назар ба кормандони ватанӣ ба маротиб зиёд аст. Аз сабаби шитобкорӣ ин ҳодиса зиёд рух медиҳанд."
Дар умум дар соли 2024 дар корхонаҳои кишвар 48 ҳодисаи нохуш сар задааст. Аз ҷумла, дар маҳалли сохтмони нерӯгоҳи “Роғун”.
"Ҳодисае, ки дар “Роғун” шуд. Инҳо кормандони ширкати “Хокрӯд” буданд. Ҳангоми кор дар нақби агрегати рақами 5. Бояд платформа (майдони муваққат) дар чанд анкер мустаҳкам карда мешуд. Қоидавайронкунии аввал аз сӯйи кормандон шудааст. Бояд онҳо дар 6 нуқта тасма васл мекарданд, вале ҳамагӣ дар сето карданд," – гуфт Санъат Асо.
Дар ин ҳодиса се корманд ҷон бохта, як нафар захмӣ шуд. Ба зидди ду кас парвандаи ҷиноӣ боз кардаанд.
Хадамоти назорати давлатии бехатарии кор дар саноат сабаби асоси ҳодисаҳоро “бемасъулиятии муҳандисиву техникӣ” номид. Беш аз сӣ нафар, аз ҷумла мансабдорон, ба ҷавобгарии маъмурӣ кашида шуда, аз онҳо зиёда аз як миллиону ҳаштсад ҳазор сомонӣ ҷарима ситонда шудааст.
Видеоро дар инҷо бинед:
Марги Меҳроҷиддин Акбарови 27-сола аз дуди ангишт дар Ховалинг
Бар асари заҳролудшавӣ дар ноҳияи Ховалинги вилояти Хатлон Меҳроҷиддин Акбарови 27-сола фавтида, як нафари дигар осеб дидааст.
Ҳодиса шаби 5-уми январ дар корхонаи истихроҷи тилои “Нахш” иттифоқ уфтод.
Як манбаъ дар Идораи милиса дар ноҳияи Ховалинг рӯзи 9-уми январ ба Радиои Озодӣ гуфт, “ҳарду шабона дар бухорӣ ангишт сӯхтаанд. Зоҳиран дуди сабаби фоҷиа гаштааст.”
Меҳроҷиддин Акбаров, зодаи ҷамоати Саричашмаи ноҳияи Шамсиддини Шоҳин аст. Хонаводааш дар деҳаи Шоҳамбарии шаҳри Ҳисор зиндагӣ мекунанд.
Ба гуфтаи манбаъ, баъди огоҳӣ ҳарду заҳролудшударо ба бемористони ноҳияи Ховалинг бурданд, аммо Меҳроҷиддинро наҷот дода натавонистанд. Ҷасади ӯ баъди ташхис барои дафн ба зодгоҳаш фиристода шудааст.
Дар шифохонаи ноҳияи Ховалинг дар суҳбати кӯтоҳ гуфтанд, ки шахси дувуми заҳролудшуда аз бемористон рухсат шуд.
Дар ҷамоати Шугнови ноҳияи Ховалинг яке аз конҳои бузурги тило дар Тоҷикистон ҷойгир аст. Сокинон аз минтақаҳои гуногун барои кор ба ин инҷо меоянд.
Соле нест, ки хабари марги сокинон дар минтақаи тилохез расонаӣ нашавад. Бо вуҷуди ин, садҳо сокини Ховалинг ва гӯшаҳои дигари вилояти Хатлон ҷони худро дар хатар монда, тило меҷуянд ва бо кори хатарноку сангин, аммо пурдаромад аробаи зиндагиашонро мечархонанд.
Лос-Анҷелес: Хонаи чанд ситораи Ҳоллувуд ба коми оташ рафт
Сӯхтор дар як маҳаллаи сарватмандон дар шаҳри Лос-Анҷелес чанд ситораи ҳунару телевизиони Амрикоро аз хонаҳояшон маҳрум кард.
Хабаргузории "Рейтерс" навишт, ки дар сӯхтори рӯзҳои охир ҳунарпешаи маъруф Билли Кристал хонаашро дар маҳаллаи Пасифик Палисайдз аз даст дод. Ӯ дар ин манзил аз соли 1979 мезист.
Перис Ҳилтон, чеҳраи маъруфи телевизионӣ, саҳнаҳои сӯхтани хонаашро дар соҳилҳои шаҳри Малибуи Калифорния ба таври зинда аз телевизион дид.
Ҷеми Ли Кӯртис, Ҷеймс Вуд, Менди Мур, Марк Ҳамилл ва Мариа Шрайвер аз шахсиятҳои дигари ҷабрдида номбар мешаванд. Ҳамаи онҳо дар минтақаҳои сарватмандони шаҳри Лос-Анҷелес хонаҳои боҳашамат доштанд.
Ҳунарпеша Лейтон Мистер ва ҳамсараш Адам Броди дар сӯхторҳои охир аз хонаашон бо нархи 6,5 миллион доллар маҳрум шуданд.
Билли Кристал ва ҳамсараш Ҷеннис, баъд аз зиндагии 46-сола манзилашонро аз даст доданд. Онҳо гуфтанд, дар ин хона фарзандону наберагонашон ба воя расидаанд.
"Сӯхтор дилшикаста кард, вале инро бо муҳаббат ба фарзандон ва дӯстонамон пушти сар мекунем”, -- гуфтанд онҳо.
Перис Ҳилтон, як ситораи барномаҳои зиндаи телевизионӣ, гуфт, “дидани саҳнаи аз даст рафтани хонаам як ҳолати бештар аз дилшикастагӣ дошт”.
Ӯ дар шабакаи "Х" навишт: “Мо дар хона бо оила нишаста хабарҳоро тамошо мекардем. Дидем, ки хонаи мо дар Малибу дар як пахши зиндаи телевизионӣ ба хок яксон шуд. Худо накунад, ки чунин ҳолате ба сари касе биёяд”.
Шрайвер, ки ҳамсари пешини волии Калифорния ва ситораи кино Арнолд Шварсенеггер аст, дар бораи сӯхтори хонааш гуфт: “Ҳама чиз аз даст рафт. Маҳаллаи мову тарабхонаҳои мо”.
Ӯ навишт: “Сӯхторнишонҳо тамоми талошро ба харҷ доданд, вале оташ чунон сартосарӣ буд, ки ғайри қобили назорат гардид”.
Ҳунарпеша Вудс, ки саҳнаи фоҷеаро дар як мусоҳибааш тасвир мекард, беихтиёр гирист. Вай нақл кард, ки вақте маҷбур шуданд хонаро тарк кунанд, ҷияни хурдсолаш қуттии пулҷамъкуниашро ҳам ҳамроҳи худ баровард ва гуфт, бо ин пул “хонаи нав месозанд”.
Хонаи ситораҳои ҳунари Амрико, ки дар маҳаллаи Пасифик Палисейдс ба коми оташ рафтаанд, ҳар якаш ба ҳисоби миёна 4,5 миллион доллар нарх доранд.
Cӯхтори мудҳише (бо сабаби табиӣ) дар Калифорния рӯзи 7-уми январ сар зад. Ба камиаш сӣ ҳазор кас аз зери дуди азиме, ки як қисми зиёди шаҳрро печонда буд, ба ҷойи амн кӯчонда шуданд.
"30 ҳазор кас кӯчонда шуд". Сӯхтор дар маҳаллаи сарватмандони Лос Анҷелес
Сӯхтор дар як маҳаллаи сарватмандон дар Лос Анҷелес хонаҳоро вайрон карда, сабаби танбашавии зиёд дар роҳҳо гардид.
Ҳодиса рӯзи 7-уми январ рух дод.
Сӣ ҳазор кас аз зери дуди азиме, ки як қисми зиёди шаҳрро печонда буд, ба ҷойи амн кӯчонда шуданд.
Ба иттилои мақомот, қариб се ҳазор ҳектар майдони Пасифик Палисейдс, маҳалле дар байни Санта Моника ва Малибу оташ гирифт.
Питер, яке аз сокинон, гуфт, "фикр кардам, ки бояд ин ҷоро тарк кунам. Ҳар чизе, ки аз даст рафт, рафт. Дигар коре карда наметавонам."
Оташнишонҳо талош карданд, ки сӯхторро хомӯш кунанд. Ҳавопаймоҳо аз Уқёнуси Ором об оварданд.
Волии Калифорния аз сокинон хост, ки дастурҳоро дар бораи кӯчидан риоя кунанд ва ҳушдор дод, ки дар натиҷаи боди сахт мумкин аст сӯхтори бештар сар занад.
Бодҳои сахту хушки ғарбӣ аксаран дар фасли тирамоҳ сар мезананд, аммо ин ҳодиса дар Калифорнияи Ҷанубӣ ҳар фасли сол метавонад ба вуқуъ ояд.
"Ҳеч кас кор намекунад; ду мошин ба дарё афтод"
Аз 3-юм то 5-уми январ дар Тоҷикистон барфи зиёд борида, ҳаракатро дар роҳҳои асосии кишвар мушкил гардонд. Ронандагон шикоят доранд, ки ҷодаҳо саривақт пок намешаванд. Мақомот, баръакс, ронандагонро гунаҳкор карданд, ки бе омодагӣ ба роҳ баромадаанд.
"Ягон коргари Идораи роҳ кор намекунад. Мардум худашон қум мезананд. Ҳеч кас кор намекунад." Ин шикояти ронандае аз вазъи ягона роҳ аз шаҳри Душанбе ба Вилояти Мухтори Кӯҳистони Бадахшон аст.
Дар наворҳое, ки ронандагон ба Радиои Озодӣ фиристоданд, дида мешавад, ки мошинҳо бо мушкил аз роҳ мегузаранд. Мақомоти маҳаллӣ шикоятҳоро рад карданд.
Далер Мукаррамшоев, сардори идораи роҳҳои ВМКБ, рӯзи 6-уми январ ба Радиои Озодӣ гуфт, давоми се рӯзи охир дар роҳи Душанбе-Қулма ду тарма фаромад ва "роҳсозон саривақт роҳро пок карданд. Маводи зиддилағзиш дар ҳама мавзеъҳои хатарҳо пошида шудааст."
Дар ин роҳ, ки то сарҳади Чин мерасад, шоми 4-уми январ ду мошини борбар ба дарё афтодааст. Ронандаҳо наҷот ёфтаанд. Далер Мукаррамшоев, сардори идораи роҳҳои ВМКБ, садамаро тасдиқ карду гуфт, ҳарду мошин дар ҳудуди ноҳияи Шуғнон чаппа шуд.
"Мошинҳои борбари “Дулан” бе занҷир ба баландӣ баромада, ба тарафи дарё афтодаанд. Якеашро баровардем. Ронанда саломат аст. Мошини дувум дар ҷояш ҳаст ва онро ҳам мебардорем,” -- афзуд Ммукаррамшоев.
Дар ду рӯзи охир ҳаракат танҳо дар роҳи Бадахшон душвор нашудааст. Аҳвол дар роҳҳои дигари ҷумҳурӣ низ ҳамин аст. Аз ҷумла, дар роҳи Душанбе - Кӯлоб.
"Коргарони ДЭУ хок назадааанд, тамоман. Ронандаҳо азоб мекашанд. Чанд мошин чаппа шуд. Ронандаҳо қум зада истодаанд," – шикоят кард ронандае дар наворе, ки ба Радиои Озодӣ фиристод.
Роҳҳои асосии Тоҷикистон, ки дар минтақаҳои кӯҳӣ ҷойгир шудаанд, тақрибан ҳар зимистон бо ҳамин аҳвол рӯбарӯянд. Бо вуҷуди онки мақомот аз омодагӣ ба зимистон гузориш медиҳанд, шикояти ронандаҳо аз мушкил шудани ҳаракат дар роҳҳо дар мавсими сармо кам намешавад.
Видеоро дар инҷо бинед:
Субҳонқул Раҳимов: "Ҳавопаймо мисли маст буд"
Субҳонқул Раҳимов, зодаи Тоҷикистон ва мусофири ҳавопаймои суқуткардаи озарӣ мегӯяд, ҳангоми наздик шудани ҳавопаймо ба шаҳри Грозний дар Чеченистон як садои баланди таркишро шунидааст.
Ҳавопаймои ширкати Озарбойҷон Эйрланз, ки рӯзи 25-уми декабр аз шаҳри Боку ба Грозний парвоз мекард, дар наздикии шаҳри Оқтау дар Қазоқистон суқут кард. Субҳонқул Раҳимов, дар суҳбат бо хабаргузории “Ройтерс” гуфтааст, ки баъди шунидани садои баланд, ба дуохонӣ шуруъ кард.
Ӯ афзуд: “Ман фикр кардам, ки дигар ҳавопаймо пора-пора мешавад”. Дар натиҷаи суқути ҳавопаймо, ки ба замин афтодаву нисфаш оташ гирифт, 38 нафар кушта ва 29 тани дигар маҷрӯҳ шуданд.
Яке аз қурбониён зодаи Тоҷикистон аст. Русия гуфтааст, ки бояд мунтазири натиҷаҳои таҳқиқи расмӣ шуд, то маълум кунанд, ки дар воқеъ чӣ рух додааст. Чаҳор манбаи огоҳ аз таҳқиқи ибтидоӣ дар Қазоқистон ба хабаргузории Ройтерз гуфтаанд, ки системаи дифои ҳавоӣ ва зидди мушакии Русия иштибоҳан ҳавопаймои мусофирарро задааст.
Ширкати Озарбойҷон Эйрлайнз рӯзи ҷумъа тамоми парвозҳо ба шаҳрҳои Русияро боздошт ва гуфт, сабаби суқути ҳавопаймо “дахолати физикӣ ва фаннӣ аз берун” будааст. Субҳонқул Раҳимов мегӯяд, ки пас аз садои баланди таркиш, ҳаракати ҳавопаймо ба мисли ҳаракати инсони маст буд. Ӯ афзудааст: “Мисли онки маст буд, на ҳавопаймои пешина”. Ҳавопаймои Эмбраер, аз шаҳри Боку, пойтахти Озарбойон бархоста ба Грозний, пойтахти Чеченистон мерафт, ки онҷо Русия системаи дифои зиддимушакиро барои рафъи ҳамлаҳои паҳподҳои Украина ба кор андохтааст.
Пас аз суқути ҳавопаймо аввал гуфта мешуд, ки мумкин аст, ҳавопаймо ба селаи паррандагон бархӯрда бошад ва мехост фуруди изтирорӣ анҷом бидиҳад. Баъди суқут ба гуфтаи Субҳонқул Раҳимов, сукуте ҳамаҷоро фаро гирифт ва баъдан нолаву фарёд баланд шуд.
Дмитрий Песков, сухангӯи ҳукумати Русия дар посух ба ин суол ки системаи дифои зиддимушакии Русия иштибоҳан ҳавопайморо задаанд, гуфт, ки то замони хотимаи таҳқиқ чизе гуфта наметавонад. Ҳикмат Бобооғлу рӯзи 27-уми декабр ба Радиои Озодӣ гуфт, ки “ба эҳтимоли қавӣ” мушаки системаи дифои ҳавоиии Русия ба ҳавопаймо осеб расонидааст ва “бар асоси мушоҳидаву хулосаҳо ин фарзия ба ҳақиқат наздик аст, ки ҳавопайморо задаанд.”
Ҷон Кирби, сухангӯи ҳукумати Амрико ҳам дар ин ҳамин рӯз гуфт, мутахассисон “аломатҳоеро дидаанд, ки нишон медиҳад, ҳавопайморо системаи дифои ҳавоии Русия сарнагун кардааст.”
“Росавиатсия” идораи нозири парвозҳо дар Русия гуфт, ки ба капитани ҳавопаймо пешниҳод кардаанд, ки дар дигар фурудгоҳҳо биншинанд, вале ӯ фурудгоҳи Оқтауро интихоб кардаааст.
Гуфтугӯ