Шуруъ аз Бозиҳои осиёӣ-2022 мусобиқот оид ба гуштии кураш аз рӯи 15 маҷмуи ҷоизаҳо (7 маҷмуъ миёни мардон, 8 маҷмуъ миёни занон) баргузор хоҳад шуд. Ба ғайр аз ин, мусобиқоти дастаӣ миёни занон ва мардон доир мегардад.
Дар ин бора сомонаи расмии Кумитаи миллии олимпии Узбекистон хабар додааст. Ба иттилои ин манбаъ, тасмими зиёд намудани маҷмуи ҷоизаҳо дар мусобиқот оид ба гуштии кураш аз рӯи барномаи Бозиҳои осиёӣ дар ҷараёни мулоқоти президенти Кумитаи миллии олимпии Узбекистон Умед Аҳмадҷонов бо раиси Федератсиони байналмилалии кураш, мудири департаменти Бозиҳои осиёии Шӯрои олимпии Осиё Ҳайдар Фармон, ки 26-уми феврал дар шаҳри Тошканд доир гардид, баррасӣ шуд.
Дар ҷараёни мулоқот ҷонибҳо пурзӯр шудани моҳияти курашро дар Бозиҳои осиёӣ баррасӣ карданд. Аҳмадҷонов дар ин мулоқот пешниҳод намуд, ки теъдоди дараҷаи вазнҳо дар мусобиқот оид ба кураш аз рӯи барномаи Бозиҳои осиёӣ зиёд карда шавад. Ин пешниҳодро раиси Федератсиони байналмилалии кураш дастгирӣ кард. Қарори Шӯрои олимпии Осиё ба кумитаи тадорукоти Бозиҳои осиёӣ дар Ҳанчжоу-2022 ва Нагойя-2026 фиристода шуд.
Ба ин тартиб, шӯҳрати ин намуди миллии гуштӣ дар Бозиҳои осиёӣ боз ҳам баланд мешавад ва оид ба кураш варзишгарон барои 17 маҷмуи медалҳо мубориза мебаранд.
Кураш барои аввалин бор ба барномаи Бозиҳои XVIII осиёӣ, ки соли гузашта дар Индонезия баргузор шуд, дохил гардидааст. Он замон гуштигирон барои 7 маҷмуи медалҳо - чор дараҷаи вазнҳо миёни мардон (-66 кг, -81 кг, -90 кг, +90 кг) ва се дараҷаи вазнҳо миёни занон (-52 кг, -63 кг, -78кг) – рақобат карданд.
Ба ҳайати дастаи мунтахаби кураши Тоҷикистон ҳашт варзишгар дохил буд: вазни -66 кг - Орифҷон Додов, Баҳодур Ҳалимов, вазни -81 кг- Акмал Муродов, Беҳрӯз Хоҷазода, вазни -90 кг - Ҳоҷимашраб Раҳмонов, Ғазалшои Давлатшо, вазни +90 кг - Набимуҳаммад Хоркашев ва Саидҷалол Саидов.
Аз байни онҳо танҳо Беҳрӯзи Хоҷазода медал ба даст овард. Ӯ дар вазни зери 81 кило дар қувваозмоии аввали худ бар Мӯсо Собиров аз Узбакистон ғолиб омад. Сипас дар чорякфинал намояндаи Тайбэйи Чин Ҳуанг Чунтаро мағлуб кард. Беҳрӯз дар даври ниманиҳоӣ бар Тазтак Умеди эронӣ дастболо шуд. Вале паҳлавони тоҷик, ки дар даври ниҳоӣ аз Алиакбари Илёси эронӣ мағлуб гашт, медали нуқраро азони худ кард.
Дар ин намуд, инчунин варзишгарони тоҷик соли 2017 дар Бозиҳои осиёӣ дар иншооти сарпӯшида ва ҳунарҳои размӣ дар Ишқободи Туркманистон як медали нуқра (Хоҷазода Беҳрӯз, -73 кг) ва ду нишони биринҷӣ (Насимов Фирдавс, -100 кг, Хусравов Хушқадам, -66 кг) ба даст оварда буданд.
