Абдураҳмон Аламшоҳзода, муовини аввали вазири корҳои дохилӣ, рӯзи 8-уми август дар нишасти матбуотӣ куштори чанд узви панҷ хонаводаро дар ин шаҳр “қатлҳои муқаррарӣ” номид. Ӯ дар посух ба суоли хабарнигорон гуфт, ин ҷо ҳеч ҳангомае набуд ва аксар кушторҳо дар заминаи муноқишаи хонаводагӣ сурат гирифтааст.
“Се куштор ошкор шуд. Ду куштор дар натиҷаи муноқишаи оилавӣ аст. Куштори Шарифовҳо ва Умаровҳо. Парвандаҳои ҷиноӣ дар марҳилаи ба Суд рафтан. Вобаста ба куштори оилаи Аҳмадовҳо ва оилаи Иброҳимовҳо гурӯҳи фаврӣ-тафтишотӣ аз Вазорати корҳои дохилӣ ва Прокуратураи генералӣ кор карда истодаанд. Сирри тафтишот аст, ҳамаи ахборотро намегӯем,” – афзуд ӯ.
Аз замони нахустин воқеа то ҳоло Вазорати корҳои дохилии Тоҷикистон дар бораи ин қатлҳо хабар ё шарҳе нашр накарда буд.
Сокинони Конибодом мегӯянд, кушторҳо ба ҳам монанд буданд ва ошкор нашудани қотилон боиси воҳима дар ҳамаи минтақа шуд. Дар охирҳои моҳи май ва аввали июн наворҳое нашр шуд, ки афроди сиёҳпӯшу шубҳаовар дар кӯчаҳо мегарданд ва эҳтимолан қурбониҳои навбатиро меҷӯянд. Мардум бо ашёи хонагӣ мусаллаҳ шуданд ва шабҳо навбатдорӣ мекарданд. Мегуфтанд, мақомот онҳоро танҳо гузоштаанд.
Абдураҳмон Аламшоҳзода
“Шахсан ба ҳайси муовини вазир ба ҷойи ҳодиса рафтам. Тамоми аҳли зиёи Конибодомро дар ду ҷамоат ҷамъ оварда, вобаста ба ҳолатҳои куштор пурра баромад кардам. Тамоми маълумотро гуфтам. Яъне, мардум бохабар ҳаст, ки дар он ҷо чӣ мегузарад”, - гуфт Абдураҳмон Аламшоҳзода.
Манбаъҳои Радиои Озодӣ ду ҳафта пеш аз боздошт шудани як нафар дар пайванд ба силсилаи қатлҳо хабар доданд ва ному миллияти онро низ ошкор карданд. Аммо Вазорати корҳои дохилӣ ин маълумотро шарҳ намедиҳад. Боздоштро ҳафтаи гузашта раиси шаҳри Конибодом Абдусалом Тӯхтасунзода тасдиқ кард, вале аз нақли ҳама гуна ҷузъиёт худдорӣ кард.
Гузориши видеоиро дар инҷо бинед:
Браузери шумо HTML5-ро намешиносад
ВКД кушторҳои пайиҳамро дар Конибодом шарҳ дод
Овозаҳои аз беруни кишвар омадани қотилон ва хомӯшии мақомот то ин дам шубаҳеро дар байни аҳолӣ ба миён овардааст, ки мақомот аз таъсири манфии хабар ба робитаи Тоҷикистон бо яке аз кишварҳои ҳамсояаш нигаронанд ва ин сабаби махфӣ доштани маълумот аст. Ин ҳол ба вазъи равонии аҳолии минтақа беҳбуд ё сабукие наовардааст.