Додситонии кулли Тоҷикистон дар ин бора хабар надодааст ва рӯзи 13-уми октябр ҳеҷ нафаре дар дафтари матбуоти ин ниҳод ба зангҳо посух надод. Вале чанд манбаъи огоҳ аз ҷараёни тафтишот рӯзи ҷумъа ба Радиои Озодӣ гуфтанд, ки ба хотири тафтишоти иловагӣ барои мушаххас кардани дороиҳои Абдухалили Холиқзода ҳамчун соҳибкор муҳлати тафтишот то 10-уми декабр дароз карда шудааст.
Як манбаъи наздик ба Додситонии кулли Тоҷикистон ба шарти зикр нашудани номаш гуфт, мақомоти тафтишотӣ дар муддати ду моҳи дигар мехоҳанд амволи ғайриманқули Холиқзодаро дар хориҷи Тоҷикистон рӯйхат кунанд. Рӯшан нест, ба ҳисоб гирифтани дороӣ бо айбномаи расмӣ, ки "барангехтани кинаю адовати миллӣ ва маҳалгароӣ" аст, чӣ рабт дорад. Ин дар ҳолест, ки бархе аз корбарони шабакаҳои иҷтимоӣ ҳагӯз бо ҳабс шудани Холиқзода мегуфтанд, ҳадафи аслӣ ғасби моликияти ӯст.
Муаллифи "Ҳаводиси рӯзгори ман" Абдухалил Холиқзода 7 августи соли равон боздошт шуда буд. Мақомот дар ин бора танҳо 15 август дар нишасти хабарӣ хабар доданд. Охири август нависанда ва адабиётшиноси шинохта Абдуқодири Рустам низ боздошт ва ҳамчунин ба "барангехтани кинаю адовати миллӣ ва маҳалгароӣ" гумонзад шуд. Ҳарду боздоштшуда ин иттиҳомро рад мекунанд.
Абдуқодири Рустам яке аз муҳаррирони "Ҳаводиси рӯзгори ман" дониста мешавад, ки моҳи марти имсол ба нашр расид. Рӯзи 13 октябр ба муносибати 65-солагии ӯ бисёр корбарони шабакаҳои иҷтимоӣ зодрӯзашро ҷашн гирифтанд ва бархе аз онҳо дар номаҳое аз мақомоти Тоҷикистон озодии нависандаро тақозо карданд.
Мунаққидони боздошти Холиқзода ва Рустам ин қазияро як намунаи барҷастаи саркӯби озодии баён ва андеша дар Тоҷикистони имрӯза меноманд.
ИНЧУНИН, БИХОНЕД:
Боздошти соҳибкор барои ёддоштҳояш мояи нигаронии афроди баландпояи ҳукумати Тоҷикистон?Абдуқодири Рустамро ба барангехтани адоват муттаҳам кардаандМуовини раиси Ҳизби ҳокими Тоҷикистон Холиқзодаро ба "хиёнат" айбдор кардаастҶинояти сангин ё “ҷангҳои зери қолин”?Чаро Абдухалил Холиқзода ва Абдуқодири Рустамро дастгир карданд? Чаро як китоб сабаби боздошти соҳибкор ва адибу рӯшанфикри тоҷик шуд? ВИДЕО