Як сарбози тоҷикро, ки дар қисми ҳарбӣ дар шаҳри Панҷакент адои хидмат мекард, бо захми тир дар бемористон бистарӣ кардаанд. Маълум нест, ки Бузургмеҳр Юлдошзодаи 20-cола аз ноҳияи Ҳамадонӣ чӣ гуна ба ин ҳол уфтодааст. Мақомот ҳодисаро шарҳ намедиҳанд. Баъзе аз шахсони наздик ба сарбоз гуфтанд, ки ӯ зери фишор буд.
Нисо Юлдошева, модари Бузургмеҳр Юлдошзода, рӯзи 3-юми январ ба Радиои Озодӣ гуфт, ҳодиса шаби 30 ба 31-уми декабри соли 2021 рӯй додааст. "Вақте ба шифохона бурданд, писарамро ҷарроҳӣ карданд. Вай чашмонашро кушод, вале ҳарф зада наметавонист. Танҳо ангуштонаш ҳаракат мекарданду бас," – афзуд ӯ.
Ба нақли ин сокини ноҳияи Ҳамадонӣ, масъулони қисми ҳарбӣ ӯ ва шавҳарашро ба шифохонаи шаҳри Панҷакент бурда, гуфтаанд, "писаратон захмӣ шудааст ва соҳиби билети ҳарбӣ шуда, ба хона бармегардад." "Вай гап зада наметавонад ва нафаҳмидам, ки чаро чунин шудааст," -- мегӯяд Нисо Юлдошева.
Талошҳои мо барои фаҳмидани мавқеи мақомот то ин дам натиҷа надод. Рӯшан нест, ки додситонии ҳарбӣ қазияро таҳқиқ мекунад ё не.
Дар ҳамин ҳол, яке аз дӯстони Бузургмеҳр Юлдошзода бе зикри номаш гуфт, "се ҳафта пеш ба рухсатӣ омада буд ва ба пул эҳтиёҷ дошт." Маълум нест, ки Бузургмеҳр Юлдошзода чаро пул пурсидааст, вале дӯсти ӯ иддао кард, ки "қаблан дар ивази чаҳорсад сомонӣ гуё рухсатӣ гирифта будааст." Намояндагони қисми ҳарбӣ дар ин бора чизе нагуфтаанд.
Ба нақли пайвандонаш, Бузургмеҳр Юлдошзода дар моҳи марти имсол, пас аз омӯзиши давраи ронандагӣ дар ДОСААФ (Ташкилоти мададгори мудофиа), довталабона ба хидмати ҳарбӣ рафтааст.
Марги сарбозон дар сафи нерӯҳои мусаллаҳ ва ниҳодҳои дигари ҳифзи тартиботу қонун дар Тоҷикистон масъалаи нав нест. "Дафтари озодиҳои шаҳрвандӣ" – як созмони ҳомии ҳуқуқи сарбозон – мегӯяд, аз соли 2015 то 2019 ба онҳо ҳудуди даҳ мавриди марги сарбозон дар қисмҳои низомӣ ошкор шудааст ва аксари онҳо дар пайи бадрафторӣ ё азияти сарбозон рух додааст.
ИНЧУНИН, БИХОНЕД: Марги Шаҳбол, нотавонӣ дар маҳви бадрафторӣ дар артиши Тоҷикистон. ВИДЕОМақомот мегӯянд, солҳои охир назорат дар қисмҳои ҳарбӣ сахттар ва мавридҳои бадрафторӣ дар муқоиса бо гузашта камтар шудааст.
ИНЧУНИН, БИХОНЕД:
Пайвандон ба худкушии Тоҷиддин Холов бовар надоранд. ВИДЕОВакилон мавзӯи "дедовшина"-ро бардоштанд. Раиси порлумон гуфт, "берун аз мавзуъ напурсед" САДО, ВИДЕОДодситонӣ сабаби марги сарбоз Раҷабалӣ Назаровро дар Бадахшон таҳқиқ мекунад. ВИДЕОБоздошти як гурӯҳ аз сарбозони Вазорати дифои Тоҷикистон. Дар "ДШБ" чӣ рӯй дод?