Дар пайванд ба қатли чаҳор узви як оила дар ноҳияи Ҷайҳун (Қумсангири собиқ) 2 нафарро дастгир кардаанд. Вазири корҳои дохилӣ, Рамазон Раҳимзода, рӯзи 4-уми август зимни нишасти матбуотӣ гуфт, “онҳо фақат гумонбаранд, тафтишот давом дорад.”
Изҳороти вазир дар ҳолест, ки мақомот то ин дам мегуфтанд, дар таҳқиқи ҳодиса дармондаанд.
Ҷасади Аҳлиддин Маҳмадов, сокини ноҳияи Ҷайҳунро бо се фарзандаш, бо нишонаҳои зоҳиран зарбаи корду дос, субҳи 12-уми июн дар манзили зисташ пайдо карданд. Ҳамсару як писараш дар ҳолати беҳушӣ дар бемористон бистарӣ шуданд.
ИНЧУНИН, БИХОНЕД:
Таҳқиқи куштори чор узви як хонавода дар Ҷайҳун то куҷо расид? ВИДЕОМақомот дар таҳқиқи қатли як оила дар Ҷайҳун дармондаандДар Ҷайҳун қатли чанд аъзои як хонаводаро таҳқиқ мекунандҲамдеҳаҳо бозпурсӣ мешаванд. Ҷузъиёти куштори мудҳиш дар ҶайҳунКуштори чор узви як оила дар ҶайҳунҲодиса дар деҳаи Тарғоқи ноҳияи Ҷайҳун рух дод ва ҳанӯз сабаби куштор маълум нест. Пайвандони кушташудаҳо мегӯянд, ба хотири халал нарасонидан ба тафтишот ба онҳо гуфтаанд, аз суҳбат бо матбуот худдорӣ варзанд.
Дар гузашта дар Тоҷикистон ҳодисаҳое буданд, ки шахсони дар ҷиноят дастдоштаро баъд аз солҳо ё моҳҳо ёфтаанд. Соли 2016 мақомот хабар дода буданд, ки пас аз панҷ сол гиреҳи қатли як саррофро дар Суғд боз карданд. Онҳо Абдулло Эшонқуловро дар қатли Олимҷон Мирҳалимов, як сарроф дар Суғд муттаҳам донистанд, ки соли 2011 кушта шуда буд. Мақомот гуфтанд, ӯ пас аз қатл ба Русия фирор карда буд ва пайдо карданаш мушкил шуд.
Мақомот қатли 5 узви як хонаводаи тиллофурӯш дар ноҳияи Бобоҷон Ғафуровро дар соли 2013 низ пас аз ду сол ошкор карданд.
Аммо мақомот мегӯянд, хонаводае, ки дар ноҳияи Ҷайҳун қатл шудаанд, чандон доро набуданд.
Ноҳияи Ҷайҳун дар 161-километрии ҷануби Душанбе ва наздик ба сарҳади давлатии Тоҷикистон ва Афғонистон ҷойгир аст. Аксар сокинонаш аз роҳи кишоварзӣ рӯзии худро таъмин мекунанд.