Вазорати корҳои хориҷӣ шаби 23-юми октябр дар баёнияе гуфт, “Тоҷикистон ин амали террористиро, ки бар асари он мардуми осоишта кушта ва захмӣ шудаанд, қотеъона маҳкум менамояд.”
Мақомот ба хонаводаи қурбониён “сабри ҷамил ва ба маҷруҳон шифоии комил” хостаанд.
Ҳамла ба маркази саноати ҳавонавардии Туркия рӯзи 23-юми октябр сурат гирифт. Аксу наворҳо нашршуда нишон медиҳанд, ки дастикам се ҳамлавар, ки яке аз онҳо зан буд, дар даромадгоҳи ширкати "Тусаш" тирандозӣ мекунанд. Дертар таркиш шудааст.
Вазири корҳои дохилии Туркия Алӣ Йерликая гуфт, дар ин ҳодиса камаш панҷ нафар кушта ва беш аз бист кас захмӣ шуданд.
Ширкати "Тусаш" дар заминаи тарҳрезӣ, тавлиди паҳподҳо ва ҳавопаймоҳои низомӣ ва ғайринизомӣ ва маҳсулоти дигари дифоӣ фаъолият мекунад.
То кунун ҳеч гурӯҳ масъулияти ҳамларо дар Анкара ба уҳда нагирифтааст. Туркия дар вокуниш ба пойгоҳҳои Ҳизби коргарони Курдистон дар шимоли Ироқ ва Сурия ҳамла кард. Туркия, Амрико ва Иттиҳоди Аврупо Ҳизби коргарони Курдистонро дар рӯйхати гурӯҳҳои террористӣ ҷой додаанд.
