Ба гузориши Азаттик, бахши қазоқии Радиои Озодӣ, овоздиҳӣ соати 7 оғоз шуда ва беш аз 10 ҳазор нуқтаҳои раъйдиҳӣ дарҳои худро боз кард.
Дар варақаи овоздиҳӣ танҳо як савол аст, “оё Шумо ба сохтани истгоҳи барқии ҳастаӣ дар Қазоқистон розӣ ҳастед?” Шаҳрвандон метавонанд ба ин савол “ҳа” ё “не” ҷавоб диҳанд.
Ба иттилои Кумисюни маркази интихобии Қазоқистон то соати 10 беш аз 17 дарсади раъйдиҳандагон дар овоздиҳӣ ширкат карданд. Дар ин кишвар беш аз 12 миллион шаҳрванд ҳаққи раъй доранд. Агар нисфи ин шаҳрвандон дар раъйпурсӣ ширкат кунанд, маърака баргузоршуда ҳисоб мешавад.
Қосимҷомарт Тоқаев, раиси ҷумҳури Қазоқистон қаблан гуфта буд, сохтани истгоҳи барқии ҳастаӣ метавонад кишварашро аз камбуди барқ раҳо кунад. Аммо бархеҳо бо назардошти хатарнок будани чунин истгоҳҳои барқӣ, ба сохтани он розӣ нестанд.
