Дар мусобиқоти қаҳрамонии CAFA-2024, ки аз 17-ум то 24-уми август дар Душанбе баргузор мешавад, шаш дастаи мунтахаби наврасони то 17-солаи минтақа – Тоҷикистон, Узбекистон, Қирғизистон, Туркманистон, Эрон ва Афғонистон - иштирок мекунанд. Ҳамаи бозиҳо дар Варзишгоҳи марказии ҷумҳуриявӣ баргузор мешаванд.
Қуръакашии мусобиқоти қаҳрамонии CAFA-2024 рӯзи 15-уми август дар Душанбе барпо мегардад. Аз рӯи натиҷаи қуръакашӣ ду гурӯҳи иборат аз седастаӣ ташкил хоҳад шуд.
Дар марҳилаи гурӯҳӣ дастаҳо аз рӯйи системи даврӣ рақобат мекунанд. Ғолибони гурӯҳҳо баъдан дар финал ба ҳам меоянд. Дастаҳое, ки дар гурӯҳи худ ҷойи дуюмро мегиранд, дар бозӣ барои зинаи сеюм мубориза мебаранд. Инчунин барои ҷойҳои панҷуму шашум бозиҳои тасаллобахш сурат мегиранд.
Ёдовар мешавем, дастаи мунтахаби наврасони Тоҷикистон (U-17) дар марҳилаи интихобии Ҷоми Осиё-2025 дар гурӯҳи «J» бо тимҳои Умон, Сингапур ва Гуам рақобат хоҳад кард. Бозиҳо дар ин гурӯҳ аз 19-ум то 27-уми октябри соли равон дар Сингапур баргузор мешаванд.
Бар асоси натиҷагирии марҳилаи интихобии Ҷоми Осиё-2025 даҳ дастаи ғолиби гурӯҳҳо ва панҷ тими беҳтарини ҷойҳои дуюм ба қисми ниҳоӣ роҳ меёбанд.
Марҳилаи ниҳоии Ҷоми Осиё-2025 миёни дастаҳои наврасони то 17-сола аз 3-юм то 20-уми апрели соли оянда дар Арабистони Саудӣ доир мегардад.
