Бозии даври дувуми мусобиқот миёни дастаҳои мунтахаби олимпии Тоҷикистону Лаос дар Варзишгоҳи марказии ҷумҳуриявӣ соати 20:30 оғоз меёбад.
Дар бозии даври аввали марҳалаи интихобии Ҷоми Осиё-2024 (U-23) дар гурӯҳи «I» 6-уми сентябр мунтахаби олимпии Австралия дастаи Лаосро бо ҳисоби бузурги 7:1 шикаст дода буд.
Дар даври севум ва ниҳоии мусобиқот - рӯзи сешанбеи 12-уми сентябр - футболбозони то 23-солаи Тоҷикистон бо дастаи мунтахаби олимпии Австралия рӯбарӯ хоҳанд шуд.
Мубин Эргашев, сармураббии мунтахаби олимпии Тоҷикистон (U-23), дар нишасти матбуотӣ ба хабарнигорон гуфт, “дар гурӯҳи мо, ки ҳамагӣ се даста ҳаст, бозиҳо пуршиддат сурат мегиранд. Аз ин рӯ ҳар як бозӣ бароямон пурарзиш аст. Бозии рақибонамонро дар даври аввал тамошо карда, таҳлил намудем. Мо ба дастгирии мухлисон умед дорем ва тамоми қувваро дар майдон сарф карда, дар хар як бозӣ то дақиқаи охирин мубориза мебарем.”
Аз рӯи натиҷагирии марҳалаи интихобии мусобиқот ғолибони 11 гурӯҳ, инчунин чаҳор дастаи ҷойҳои дуюми гурӯҳҳо бо нишондодҳои хубтар ба қисми ниҳоии Ҷоми Осиё-2024 (U-23), ки аз 15-уми апрел то 3-юми майи соли оянда дар Қатар баргузор мешавад, роҳ меёбанд. То ҳоло як дастаи мунтахаб - Қатар - ба ҳайси мизбон ба марҳалаи ниҳоии мусобиқот роҳ пайдо кардааст.
Ба иттилои Федератсияи футболи Тоҷикистон, ба ҷамъомади таълимиву тамринии дастаи мунтахаби олимпии кишвар 27 бозигар – 3 дарвозабон, 10 ҳимоятгар, 11 нимҳимоятгар ва 3 ҳамлагар - даъват шудаанд. Дархости ниҳоии даста барои иштирок
дар марҳалаи интихобии Ҷоми Осиё-2024 ҳамагӣ 23 бозигарро дар бар хоҳад гирифт.
Зимнан, аъзои мунтахаби олимпии Тоҷикистон (U-23) дар ҷамъомади таълимию тамриниаш ба ҳамлагари тими миллӣ ва бошгоҳи «Истиқлол»-и Душанбе Манучеҳр Ҷалилов, ки феълан дар яке аз дармонгоҳҳои шаҳри Маскави Русия бо бемории вазнин бистарӣ аст, шифои оҷилу комил таманно кард.
Ҳайати васеи дастаи мунтахаби олимпии Тоҷикистон (U-23):
Дарвозабонҳо: Муҳриддин Ҳасанов («Истиқлол»), Суҳробхуҷа Юсупов (КМВА), Шаҳобиддин Маҳмудзода («Ҳосилот»);
Ҳимоятгарон: Манучеҳр Сафаров («Локомотив», Узбекистон), Меҳрубон Каримов («Самгурали», Гурҷистон), Алиҷон Кароматуллозода, Содиқҷон Қурбонов (ҳарду аз «Истиқлол»), Раҳматшо Раҳматзода, Шаҳриёри Иноятулло (ҳарду аз «Равшан»), Исроил Холов (КМВА), Фирдавс Алиназаров («Хатлон»), Фахриддин Аҳтамов («Хуҷанд»), Ҷонибек Шарипов («Ҳосилот»);
Нимҳимоятгарон: Хусрав Тоиров («Шахтёр», Украина), Руслан Хайлоев («Зенит-2», Русия), Фатҳулло Олимзода («Атирау», Қазоқистон), Алишер Раҳимов («Амкал», Русия), Ҳамадонӣ Камолов, Алиҷони Айнӣ (ҳарду аз «Истиқлол»), Масрур Қиёмиддинов («Равшан»), Азизбек Ҳаитов («Хуҷанд»), Алишер Шукуров («Кӯктош»), Шуҳрат Элмуродов («Регар-ТадАЗ»), Шоин Боев («Моҳир»);
Ҳамлагарон: Шаҳром Самиев («Милсами», Молдова), Рустам Соиров («Локомотив», Узбекистон), Далер Шарипов («Металлург», Узбекистон).
Сармураббӣ – Мубин Эргашев.
Марҳалаи интихобии Ҷоми Осиё-2024 (U-23)
Гурӯҳи «I»
Даври 1-ум
6-уми сентябр (чоршанбе)
Лаос – Австралия – 1:7
Даври 2-юм
9-уми сентябр (шанбе)
Оғози бозӣ – соати 20:30
Тоҷикистон – Лаос
Даври 3-юм
12-уми сентябр (сешанбе)
Оғози бозӣ – соати 20:30
Австралия – Тоҷикистон
