Вақте августи соли 2021 Толибон дар Афғонистон ба сари қудрат баргаштанд, зиндагии хонаводаи Марям Кавсарӣ ҳам якбора тағйир ёфт. Хонандаи синфи 12-уми мактаб аз ҳақи таҳсил маҳрум ва хонаводааш маҷбур шуд ба Исломобод биравад. Шаш ҳафта баъди сари қудрат омадани Толибон ҷои гарму нақшаҳои зиндагии хонаводаи Кавсарӣ сарду тор шуд.
Марям Кавсарӣ, ки бо волидону бародару хоҳаронаш дар Покистон паноҳҷӯ шудааст, мегӯяд, барояшон дигар “дар Афғонистон ҷое набуд, ки мешуд зиндагиро идома дод”. Мегӯяд, рӯзе аз дарси наққошиаш ба хона бармегашт ва Толибон ӯро нигоҳ дошта гуфтанд, ки дигар бояд аз ин кораш даст кашад. "Расмкашӣ дар Ислом мамнӯъ аст", шунид Марям.
Хоҳари Марям – Хадиҷа Кавсарӣ ҳам рассом аст. Ӯ наққоширо дӯст медорад ва мегӯяд, танҳо расмкашӣ аст, ки аз он дар зиндагӣ лаззат мебарад.
Хадиҷа Кавсарӣ ғаму ғусса ва ноумедиҳояшро аз оянда бо рангу наққошиҳои шод талош мекунад ҷуброн кунад.
Мушкилоти молӣ ба Маряму чор хоҳару бародараш имкон намедиҳад дар мактабҳои Покистон таҳсил кунанд. Аз ин ҳолат додараш ҳам бисёр нороҳат аст.
Муҳаммад Абдуллоҳ Кавсарӣ мегӯяд, дар Исломобод мактабҳо "бисёр зиёд қимат ҳастанд". Ӯ ҳам мехоҳад аз роҳи расмкашӣ пуле ба даст оварад, то ки онҳоро фурӯхта пули мактабро бидиҳад.
Вале Марям мегӯяд, васоили расмкашӣ ҳам гарон мебошад. Ӯ мегӯяд, фақру ноумедӣ ҳатто фикри тарҳрезии ояндаро ҳам ба ҳам задааст. "Вазъи итисодиамон хеле бад аст. Барои он ки ҳатто дуруст фикр кунӣ ва наққоширо идома бидиҳӣ, бояд шароити иқтисодиат хуб бошад". Ӯ мегӯяд, ноумедии онҳо бештар мешавад.
СММ ҳисоб кардааст, ки баъди ба дасти Толибон гузаштани қудрат, 600 ҳазор шаҳрванди Афғонистон ба Покистон рафт ва оилаи Кавсарӣ ҳам мисли ҳамаи онҳо ҳоло бо ояндаи норӯшан рӯбарӯ ҳастанд.
"Садои Амрико"
Гуфтугӯ