Дастаи мунтахаби футболи Тоҷикистон дар даври дувуми мусобиқоти интихобии қаҳрамонии ҷаҳон-2026 дар гурӯҳи «G» бо тимҳои миллии Арабистони Саудӣ, Урдун ва ғолиби ҷуфти даври аввали интихобӣ миёни дастаҳои Камбоҷа – Покистон рақобат хоҳад кард.
Ба иттилои Федератсияи футболи Тоҷикистон, дар марҳилаи дувуми интихобии қаҳрамонии ҷаҳон-2026 дар қораи Осиё 36 дастаи мунтахаби миллӣ рақобат мекунад. Бозҳо аз 16-уми ноябри соли 2023 то 11-уми июни соли 2024 баргузор хоҳанд шуд.
Баъди ҷамъбасти даври дувуми интихобӣ ғолибони нӯҳ гурӯҳ ва дастаҳое, ки дар чаҳоргонаи худ ҷойҳои дувумро мегиранд, муборизаро дар даври севуми марҳилаи интихобии қаҳрамонии ҷаҳон-2026 идома дода, ҳамзамон соҳиби роҳхат ба марҳилаи ниҳоии Ҷоми Осиё-2027 мешаванд.
Қуръакашии даври севуми қаҳрамонии ҷаҳон-2026 соли 2024 доир мегардад. Аз рӯи натиҷаи он 18 даста ба се гурӯҳ тақсим мешаванд. Пас аз натиҷагирии даври севум ду дастаи беҳтарин аз ҳар гурӯҳ соҳиби роҳхат ба марҳилаи ниҳоии қаҳрамонии ҷаҳон-2026 мегарданд.
Боз ду дастаи иштироккунандаи мустақим аз қораи Осиё дар даври чаҳоруми интихобии Ҷоми ҷаҳон-2026 муайян мешаванд ва як роҳхати дигари эҳтимолӣ тавассути плей-оффи байниқитъавӣ дастрас хоҳад шуд.
18 даста, ки дар даври дувуми марҳилаи интихобии қаҳрамонии ҷаҳон-2026 ҷойҳои севуму чаҳорумро мегиранд, ба даври севум ва ниҳоии марҳилаи интихобии Ҷоми Осиё-2027 роҳ меёбанд.
Натоиҷи қуръакашии даври дувуми мусобиқоти интихобии қаҳрамонии ҷаҳон-2026:
Гурӯҳи «А»: Қатар, Ҳиндустон, Кувайт, ғолиби ҷуфти Афғонистон – Муғулистон.
Гурӯҳи «В»: Ҷопон, Сурия, Кореяи Шимолӣ, ғолиби ҷуфти Мянмар – Макао.
Гурӯҳи «С»: Кореяи Ҷанубӣ, Чин, Тайланд, ғолиби ҷуфти Сингапур – Гуам.
Гурӯҳи «D»: Умон, Қирғизистон, Малайзия, ғолиби ҷуфти Тайбейи Чин – Тимори Шарқӣ.
Гурӯҳи «E»: Эрон, Узбекистон, Туркманистон, ғолиби ҷуфти Ҳонконг – Бутан.
Гурӯҳи «F»: Ироқ, Ветнам, Филиппин, ғолиби ҷуфти Индонезия – Бруней.
Гурӯҳи «G»: Арабистони Саудӣ, Урдун, ТОҶИКИСТОН, ғолиби ҷуфти Камбоҷа – Покистон.
Гурӯҳи «H»: Имороти Муттаҳидаи Араб, Баҳрайн, ғолиби ҷуфти Яман – Шри-Ланка, ғолиби ҷуфти Непал – Лаос.
Гурӯҳи «I»: Австралия, Фаластин, Лубнон, ғолиби ҷуфти Молдив – Бангладеш.
Дастаи мунтахаби Тоҷикистон дар маҷмуъ дар чаҳорчӯби даври дувуми марҳилаи интихобии қаҳрамонии ҷаҳон-2026 ҳамагӣ шаш бозӣ – ду дидор моҳи ноябри соли равон ва чаҳор бозии дигар моҳҳои март ва июни соли оянда - анҷом медиҳад.
Ҷоми ҷаҳон-2026. Мусобиқоти интихобӣ
Марҳилаи дувум. Гурӯҳи «G»
Даври 1-ум
16-уми ноябри соли 2023
ТОҶИКИСТОН – Урдун
Даври 2-юм
21-уми ноябри соли 2023
Камбоҷа/Покистон – ТОҶИКИСТОН
Даври 3-юм
21-уми марти соли 2024
Арабистони Саудӣ – ТОҶИКИСТОН
Даври 4-ум
26-уми марти соли 2024
ТОҶИКИСТОН – Арабистони Саудӣ
Даври 5-ум
6-уми июни соли 2024
Урдун – ТОҶИКИСТОН
Даври 6-ум
11-уми июни соли 2024
ТОҶИКИСТОН – Камбоҷа/Покистон
Гуфтугӯ