Дар сарҳади Тоҷикистону Қирғизистон чӣ мегузарад? Лаҳза ба лаҳза

Раҳбарони Тоҷикистону Қирғизистон дар пасманзари муноқишаи марзӣ рӯзи 16-уми сентябр дар шаҳри Самарқанд мулоқот кардаанд. Онҳо гуфтаанд, барои оташбас ва берун кашидани нерӯҳо супориш медиҳанд.

Эмомалӣ Раҳмон ва Содир Ҷабборов (Жапаров) барои иштирок дар нишасти сарони кишварҳои узви Созмони Ҳамкориҳои Шонгҳой ба Самарқанд рафта буданд.

Абдуфаттоҳ Шарифзода, сухангӯи президенти Тоҷикистон, рӯзи ҷумъа ба Радиои Озодӣ гуфт, вохӯрии Эмомалӣ Раҳмон ва Содир Ҷабборов баъд аз зуҳри 16-уми сентябр баргузор шуд.

Сомонаи расмии президенти Қирғизистон дар иттилоияе навишт, Эмомалӣ Раҳмон ва Содир Ҷабборов вазъиятро дар марзи Тоҷикистону Қирғизистон баррасӣ кардаанд.

Ба навиштаи манбаъ, роҳбарони ду кишвар ба тавофуқ расидаанд, ки барои оташбас ва берун кашидани қувваҳо ба ниҳодҳои дахлдор супориш медиҳанд.

Бино ба хабари дафтари матбуоти президенти Қирғизистон, Қамчибек Тошиев ва Саймумин Ятимов, роҳбарони кумитаи амнияти миллии ду кишвар, комиссия ташкил карда, сабабҳои ҳодисаро таҳқиқ мекунанд.

Хадамоти матбуоти ҳукумати Суғд мегӯяд, барои назорати риояи оташбас дар минтақаҳои марзӣ кумисюни муштарак ташкил доданд: “Дар натиҷа, зери роҳбарии раиси вилояти Суғд Раҷаббой Аҳмадзода ва раиси вилояти Бодканд Абдукарим Алимбаев комиссияи муштарак ташкил гардид. Вазифаи асосӣ назорати риояи оташбас дар минтақаҳои наздисарҳадӣ буда, комиссия кори худро оғоз намуд.”

Русия аз Тоҷикистону Қирғизистон хостааст, ҷанҷолро дар марз ба гуфтугӯи сиёсӣ ва дипломатӣ иваз карда, аз ҳар гуна кӯшиши бад кардани авзоъ ва иғвои ҷониби сеюм пешгирӣ кунанд.

Вазорати корҳои хориҷии Русия рӯзи 16-уми сентябр дар баёнияе гуфт, вазъи муташанниҷро дар сарҳади ду ҳамсояро бо ташвиш пайгирӣ доранд.

“Мо бори дигар омодагии самимонаи худро барои расондани ҳама гуна ёрии қобили қабули шариконамон тасдиқ мекунем,” -- гуфт вазорат.

Ҷониби Тоҷикистон бегоҳи 16-уми сентябр дар бораи музокирот ва таъкиди тарафҳо барои оташбас хабар дод, вале нагуфт, ки оё оташбас шудааст ё не.

Хадамоти марзбонии Қирғизистон иттилоъ дод, ки раҳбарони Кумитаи давлатии амнияти миллии Қирғизистону Тоҷикистон дар бораи оташбас аз соати 16:00-и имрӯз ба мувофиқа расиданд.

Рӯзи 16-уми сентябр дар сарҳади Тоҷикистону Қирғизистон дигарбора ҷанҷол сар зад. Ҷонибҳо якдигарро ба оғози муноқиша ва истифода аз силоҳҳои сангин гунаҳкор карданд.

Мақомоти Қирғизистон гуфтанд, дар ин даргирӣ беш аз 40 нафар захмӣ шудааст. Ҷониби Тоҷикистон дар бораи захмиён ва ё кушташудаҳо оморе надод. Пештар хабаргузории “Рейтерз” гуфта буд, ки дар ҷанги 16-уми сентябр як кас дар Исфара ҷон бохтааст.

Вазорати ҳолатҳои фавқулодаи Қирғизистон гуфтааст, ки сокинони минтақаҳои наздимарзиро дар вилояти Бодканд ба ҷойи амн кӯчондааст. Ба иттилои бахши қирғизии Радиои Озодӣ, марказҳои зисти муваққатӣ боз шудаанд ва сокинон бо нақлиёти шахсӣ ба онҷо мераванд.