"Ҷонибҳо розӣ шуданд, ки оташбас шавад.” Музокирот дар марз
Баъд аз даҳ соати муноқиша дар марзи Тоҷикистону Қирғизистон, ҷонибҳо музокирот кардаанд.
Дафтари матбуоти ҳукумати Суғд пас аз зуҳри 16-уми сентябр дар хабарномае гуфт, музокирот дар дидбонгоҳи гумрукии "Равод" дар сарҳади Тоҷикистону Узбекистон ҷараён гирифт.
Ба гуфтаи манбаъ, ҳайати Тоҷикистонро Саймумин Ятимов, раиси Кумитаи давлатии амнияти миллӣ ва ҳайати Қирғизистонро раиси КДАМ-и он кишвар Қамчибек Тошиев роҳбарӣ мекунанд.
Дар музокироти ду кишвар вазирони корҳои дохилӣ ва раисони вилояти Суғди Тоҷикистон ва Бодканди Қирғизистон низ ширкат доштаанд.
Дар бораи ҷузъиёти музокирот чизе гуфта нашудааст. Дар хабари расмии ҳукумати Суғд танҳо омадааст, “зимни гуфтушунид ҷонибҳо ба зарурати эълони оташбас изҳори назар намуданд. Ҷонибҳо ба мувофиқа расиданд, ки оташбас эълон карда шавад.” Аммо маълум нест, оташбас кай эълон мешавад.
Муноқишаи нав дар марзи Тоҷикистону Қирғизистон субҳи 16-уми сентябр оғоз шуд. Ҳарду кишвар ҳамдигарро сабабгори ҷанҷол медонанд.
Тоҷикистон дар бораи захмиён ва ё кушташудаҳо оморе надодааст. Ҷониби Қирғизистон мегӯяд, дар ҷараёни даргирӣ беш аз 40 нафар захмӣ шуданд.
Таҷаммӯи сокинон дар Бишкек дар робита ба задухӯрд дар марз
Сокинони шаҳри Бишкек рӯзи 16-уми сентябр дар назди бинои порлумони Қирғизистон ҷамъ шуда, қатъи низоъро дар марз бо Тоҷикистон талаб карданд.
Расонаҳо менависанд, дар ин гирдиҳамоӣ сокинони вилояти Бодканди ҳаммарз бо Тоҷикистон низ ширкат доранд.
Ҷамъшудаҳо аз мақомоти Қирғизистон талаб доранд, ки ба сарҳад нерӯи иловагӣ фиристода, сокинонро ба ҷои амн кӯчонад ва аз Исфанаи Бодканд ба шаҳри Бишкек парвози махсус ташкил кунад.
Дар маркази матбуотии порлумони Қирғизистон хабар доданд, ки вакилон рӯзи ҷумъа дар ҷаласаи ғайринавбатӣ вазъро дар марз бо Тоҷикистон баррасӣ мекунанд.
Субҳи 16-уми сентябр дар сарҳади Тоҷикистону Қирғизистон дигарбора муноқиша сар зад.
Нерӯҳои марзбонии Тоҷикистон гуфтанд, ҳамларо аввал сарҳадбонони Қирғизистон оғоз карданд. Бишкек мегӯяд, низомиёни тоҷик буданд, ки ба чанд дидбонгоҳи марзии ин кишвар ҳамла бурданд.
Аз ин пеш, 14-уми сентябр, дар марзи Тоҷикистон бо Қирғизистон чанд соат тирпарронӣ рух дод.
Дар ин ҳодиса аз тарафи Тоҷикистон ду марзбон кушта ва 11 нафар маҷруҳ шуд. Қирғизистон аз захмӣ шудани ду сарҳадбон ва 3 нафари мулкӣ хабар дод. Ҳарду тараф якдигарро дар сар задани ин муноқиша айбдор карданд.
Ҷамоати Хистеварзи ноҳияи Бобоҷон Ғафуров ҳамсарҳад бо деҳаи Борбордуки ноҳияи Лайлаки Қирғизистон. 16-уми сентябри 2022
Дабири кулли СПАД ба оташбаси фаврӣ хонд
Дабири кулли Созмони Паймони Амнияти Дастҷамъӣ ба оташбаси фаврӣ дар сарҳади Тоҷикистону Қирғизистон даъват кард.
Станислав Зас рӯзи 16-уми сентябр бо дабири Шӯрои амнияти Тоҷикистон Насрулло Маҳмудзода ва ҳамтои қирғизистонияш Марат Имонқулов дар ин бора телефонӣ гап задааст.
Созмони Паймони Амниятӣ Дастҷамъӣ дар баёнияе гуфт, ки ҷонибҳо “зарурати оташбаси фавриро” зикр карданд.
Ҳамчунин дар мулоқот хоста шудааст, ду тараф барои ҳалли сулҳомези низоъ тавассути мақомоти салоҳиятдор музокиротро ба роҳ монанд.
Рӯзи 16-уми сентябр дар сарҳади Тоҷикистон ва Қирғизистон дигарбора тирпарронӣ шуд. Ду ҷониб якдигарро ба истифода аз силоҳҳои сангин муттаҳам карданд.
Тоҷикистон дар бораи талафот ва захмиҳо чизе нагуфтааст. Мақомоти Қирғизистон гуфтанд, дар даргирии рӯзи ҷумъа 31 кас захмӣ шуд.
Ба Созмони Паймони Амнияти Дастҷамъӣ Арманистон, Беларус, Қазоқистон, Қирғизистон, Русия ва Тоҷикистон шомиланд.
Гуфтугӯ