Нуршед Машрабов, молики "Корвон", бозори бузургтарини Душанбе, вакили Маҷлиси пойтахт шудааст.
Интихоботи миёндарвӣ ба Маҷлиси шаҳри Душанбе рӯзи 28-уми ноябри имсол дар ҳудуди ноҳияи Фирдавсӣ баргузор шудааст, вале натиҷаҳои онро Ҳизби халқии демократии Тоҷикистон ва Комиссияи марказии интихобот эълон накарданд.
Дар Кумитаи Ҳизби халқии демократии Тоҷикистон дар ноҳияи Фирдавсӣ пирӯзии Нуршед Машрабовро тасдиқ карданд, аммо нагуфтанд, ки интихобот чӣ гуна гузашт. Бисёре аз сокинони ноҳияи Фирдавсӣ мегӯянд, шоҳиди ҳеч гуна интихобот набуданд.
Нуршед Машрабов, фарзанди Хол Машраб, раиси пешини ноҳияи Рӯдакӣ аст. Ӯ барои соҳиб шудан ба курсии холишудаи Хуршед Мирзо, ки моҳи апрели имсол муовини аввали раиси Кумитаи давлатии сармоягузорӣ ва идораи амволи давлатӣ таъин шуд, вориди корзори интихоботӣ гардид.
Хуршед Мирзои 37-сола аз дӯстони наздики Рустами Эмомалӣ, шаҳрдори Душанбе, гуфта мешавад ва дар Федератсияи футболи Тоҷикистон солҳо боз муовини ӯст.
Созмонҳои байнулмилалӣ пайваста интихоботҳои Тоҷикистонро барои ношаффоф будан танқид кардаанд. Мақомот ҳамеша гуфтаанд, ки интихоботҳо шаффоф гузаштаанд.
