Гурӯҳҳои наҷот 11 қоиқро, ки дар онҳо тақрибан 2000 паноҳҷӯ нишаста буданд, дар обҳои Баҳри Миёназамин наҷот доданд ва ба Италия расонданд.

Дар давоми бештар аз як моҳи охир ин бузургтарин шумораи паноҳҷӯён буд, ки дар роҳ ба сӯи Италия наҷот ёфтанд. Нируҳои соҳилии Италия мегӯянд, ки онҳо тавассути телефони моҳвораӣ аз як қоиқ дар ин бора паём дарёфт кардаанд.

Соли ҷорӣ бештар аз 140 000 муҳоҷир ба Италия ворид шудаанд. Дар маҷмуъ шумораи муҳоҷирон ё паноҳҷӯён, ки ба қаламрави кишварҳои аврупоӣ омадаанд, 900 000 нафарро ташкил медиҳад.

Вакилони Маҷлиси Намояндагон, палатаи поёнии порлумони Тоҷикистон, 18-уми март, дар рӯзи охирини кори панҷсолаи худ созишномаи сарҳадиро бо Қирғизистон қабул карданд.

Дар ин рӯз ду ҳуҷҷати дигар дар бораи бунёду истифодаи роҳҳо ва дастрасӣ ба иншооти обу энержӣ дар марзи ду кишвар ҳам пазируфта шуд.

Аз рӯзи 19-уми март ҳайати нави вакилони порлумон ба кори худ сар мекунад.

Созишномаи марзии Тоҷикистон ва Қирғизистон рӯзи 13-уми март дар шаҳри Бишкек имзо шуд.

ИНЧУНИН, БИХОНЕД:

Муомилаи таърихӣ? Имзои созишномаи марзии Тоҷикистон ва Қирғизистон

Ҳарчанд мақомоти Қирғизистон баъзе ҷузъиёти онро ошкор карданд, ҷониби Тоҷикистон на дар гузашта ва на ҳоло тафсилоти музокирот ва созишномаро нагуфтааст.

Дар як ҳуҷҷате, ки Радиои Озодӣ дид, созишномаи марзии Тоҷикистону Қирғизистон "бемуҳлат аст" ва тибқи он "парвози ҳама гуна ҳавопаймоҳои бесарнишин дар қитъаҳои сарҳадӣ манъ аст".

"Марзро нерӯҳои сарҳадӣ аз дидбонгоҳҳо бо истифода аз аслиҳа ва техникаи низомии муқаррарӣ ҳифз намоянд. Тоҷикистону Қирғизистон ба ҷобаҷоии техникаи вазнини ҳарбӣ, қувваҳо ва воситаҳои иловагӣ дар минтақаҳои наздисарҳадӣ роҳ надиҳанд," – гуфта шудааст дар санад.

Тоҷикистон ва Қирғизистон беш аз ҳазор километр сарҳад доранд. Тақрибан панҷсад километри он дар се соли охир мушаххас шудааст.

Номуайянии марз дар гузашта сабаби ҷангу хунрезӣ байни ду кишвари Осиёи Марказӣ шуда буд. Аз ҷумла, дар муноқишаи солҳои 2021-2022 аз ду тараф даҳҳо кас куштаву захмӣ гаштанд.

ИНЧУНИН, БИХОНЕД:

Хатти гумшуда. Таърихчаи кӯтоҳи низоъ дар марзи Тоҷикистону Қирғизистон

Доналд Трамп, президенти Амрико, гуфтааст, рӯзи 18-уми март бо Владимир Путин, президенти Русия дар бораи хатми ҷанг дар Украина суҳбат мекунад.

Вай умед дорад, Путин тарҳи оташбаси 30 рӯзаро, ки Украина ба он розӣ шудааст, қабул мекунад: “Бубинем, ки то куҷо метавонем ҷангро поён диҳем. Фикр мекунам, имкони хуб дорем."

Трамп дар суҳбат бо хабарнигорон гуфт, бо Путин дар масъалаи ба кӣ додани нерӯгоҳи ҳастаии Запарожйе ва гузашти ҳудудӣ низ гап мезанад.

"Бале, дар бораи замин гап мезанем. Онҷо замини зиёд аст. Медонед, вазъ дар муқоиса ба пеш аз ҷанг хеле фарқ мекунад. Дар бораи замин гап мезанем ва дар бораи нерӯгоҳ. Ин як баҳси бузург аст, вале мо аз пеш бо Украина ва Русия дар бораи бисёр масъалаҳо суҳбат кардаем," – афзуд ӯ.

Раисҷумҳури Амрико дақиқ нагуфт, кадом нерӯгоҳро дар назар дорад, вале нерӯгоҳи Запарожйеи Украина, бузургтарини нерӯгоҳи ҳастаӣ дар Аврупо таҳти ишғоли Русия қарор дорад. Русия ва Украина борҳо бар сари фалокати эҳтимолӣ аз ин неругоҳ ҳамдигарро айбдор кардаанд.

Дар Кремл ҳам тасдиқ карданд, ки Путин бо Трамп телефонӣ суҳбат мекунад. Ҳарчанд Трамп дар бораи замину нерӯгоҳ гуфт, мақомоти Русия гуфтанд, то анҷоми суҳбати телефонӣ ин мавзуъро шарҳ намедиҳанд.

Дар ҳамлаи ҳавопаймоҳои бесарнишин ба вилояти Белгород дар Русия як кас захмӣ шудааст.

Дар ин бора саҳифаи "Пепел" дар Телеграм хабар дод, ки вазъро дар минтақаҳои наздисарҳадӣ бозтоб медиҳад. Вячеслав Гладков, волии Белгород, хабари захмӣ шудани як сокини 18-соларо тасдиқ кард.

Суқути ҳавопаймои бесарнишин сабаби сӯхтор дар як маркази савдо дар наздикии “Белгород Арена” шудааст.

Дар вилояти Красноярск бар асари таркиши ду мусофирбар панҷ нафар маҷруҳ гашт. Ба гузориши саҳифаи “Маш” дар Телеграм, осебдидаҳо кормандони ширкати “Краснояругский бройлер” ҳастанд.

Дертар Гладков таркиши автобусро тасдиқ кард, вале гуфт, ки се кас захмӣ шуд.

Вазорати дифои Русия аз маҳви 46 ҳавопаймои бесарнишини украинӣ хабар дод. Ба иттилои манбаъ, 41 ҳавопаймои бесарнишин дар фазои Белгород сарнагун карда шудааст.

Александр Хинштейн, раиси вилояти Курск, мегӯяд, дар ҳамлаи ҳавопаймоҳои бесарнишин ба ин минтақаи Русия панҷ кас маҷруҳ шуд.

Додугирифти Тоҷикистон ва Русия дар соли 2024 ба тақрибан ду миллиард доллар расидааст. Ҳудуди ҳабдаҳ дарсад бештар аз соле қабл аз он.

Ин омор дар мулоқоти президенти Русия Владимир Путин бо раисҷумҳури Тоҷикистон Эмомалӣ Раҳмон рӯзи 17-уми март дар Маскав садо дод.

Ба иттилои Кремл, Путин гуфтааст, "равобити мо рушд мекунад. Сармоягузорӣ ҳам тақрибан ҳамин хел ва ҳатто андаке бештар аз 1,6 миллиард долларро ташкил медиҳад."

Эмомалӣ Раҳмон аз "рушди босуръати равобит" байни ду кишвар ситоиш карда, гуфтааст, Маскав "шарики пешрафтаи тиҷоратӣ ва иқтисодӣ"-и Тоҷикистон мемонад.

Дертар ҳардуи онҳо ба хабарнигорон гуфтанд, ки масъалаи муҳоҷирати кориро ҳам баррасӣ карданд.

“Имрӯз мо ҳамкорӣ дар соҳаи муҳоҷирати меҳнатиро муфассал баррасӣ намудем,” - гуфт президенти Тоҷикистон, вале тафсилот надод.

Раисҷумҳури Русия изофа кард, ки “ҳудуди як миллион шаҳрванди Тоҷикистон дар Русия кору зиндагӣ мекунанд. Онҳо дар соҳаҳои гуногун, бавижа сохтмон ва хоҷагии манзилию коммуналӣ, нақлиёт ва ҳамлу нақл кор мекунанд ва дар рушди иқтисоди Русия саҳми намоён доранд. Ва муҳим он аст, ки пулҳои фиристодаи онҳо ба ватан дастгирии қобили мулоҳиза ҳам барои Тоҷикистон ва ҳам барои хонаводаҳояшон аст.”

Аммо дар бораи он чӣ ки дар мулоқоти як ба як ва паси дарҳои бастаи ду тараф садо додааст, иттилое дар даст нест.

Ин ҳам дар ҳолест, ки тайи як соли охир, баъди ҳамлаи маргбор ба "Крокус", муҳоҷирони кории тоҷик дар Русия дар шароити сахттарин қарор доранд.

Сафари президент Раҳмон ба Маскав низ дар остонаи яксолагии ҳамла ба толори консертии “Крокус" сурат гирифт. Бо гумони ҳамла, тарҳрезӣ ва кумак дар он беш аз бист нафар, асосан шаҳрвандони Тоҷикистон гумонбар дониста мешаванд.

Ниҳодҳои интизомии Русия ҳангоми боздошту бозпурсии шаҳрвандони Тоҷикистон ба таври ошкор онҳоро шиканҷа карданд.

Бо ин вуҷуд Русия макони муҳими муҳоҷирати кории шаҳрвандони Тоҷикистон боқӣ мемонад.

Доналд Трамп, президенти Амрико, гуфт, рӯзи 18-уми март бо раисҷумҳури Русия Владимир Путин телефонӣ суҳбат хоҳад кард. Вай талош дорад, ки ба ҷанги сесолаи Маскав дар Украина поён бахшад.

"Рӯзи сешанбе бо президент Путин суҳбат хоҳам кард. То ин дам корҳои зиёде анҷом дода шуд," – гуфт Трамп шоми 16-уми март ба хабарнигорон ҳангоми бозгашт аз осоишгоҳаш дар Флорида ба Вашингтон.

"Мехоҳем, бубинем, ки оё ҷангро ба поён расонда метавонем ё на. Шояд тавонем, шояд натавонем, аммо фикр мекунам, ки мо шонси бисёр хуб дорем," – афзуд ӯ.

Хабарнигорон аз раисҷумҳури Амрико дар бораи гузаштҳои эҳтимолӣ пурсиданд. Доналд Трамп гуфт, "мо дар бораи замин, дар бораи нерӯгоҳҳои барқӣ суҳбат хоҳем кард."

Кремл то ҳол дар ин бора изҳори назар накардааст.

Мақомоти Украина ва Амрико баъд аз музокироти худ дар Арабистони Саудӣ рӯзи 11-уми март эълон карданд, ки Киев ба пешниҳоди оташбаси 30-рӯза розӣ шуд, ба шарте ки Русия онро бипазирад.

Маскав то кунун ба ин пешниҳод дилгармӣ нишон надодааст. Баръакс, Путин шартҳои изофӣ, аз ҷумла қатъи интиқоли силоҳро аз Амрико ба Киев дар миён гузошт.

Дар ҳамин ҳол, як мансабдори баландпояи Русия гуфт, Маскав исрор хоҳад кард, ки Украина иҷозаи пайвастан ба НАТО-ро надошта бошад ва дар ҳама гуна созиши сулҳ кишвари бетараф боқӣ монад.

Киев дар гузашта чунин шартҳоро рад карда буд.

Пентагон ё Вазорати дифои Иёлоти Муттаҳидаи Амрико гуфтааст, то замоне ки ҳусиҳои Яман монеи ҳаракати киштиҳо дар Баҳри Сурх мешаванд, амалиёти зидди ин гурӯҳ идома хоҳад кард.

Ҳусиҳои Яман, ки аз ҷониби Эрон пуштибонӣ мешаванд, пас аз ҳамлаҳои Амрико эълон карданд, ки интиқом мегиранд.

Амрико рӯзи 15-уми март ҳамла ба ҳусиҳои Яманро оғоз кард.

“Лаҳзае, ки ҳусиҳо гуфтанд, ба киштӣ ва ҳавопаймоҳои шумо ҳамла намекунем, амалиёт бас мешавад, вагарна беист идома медиҳем,” – гуфт Пит Ҳегсет, вазири дифои Амрико.

Вазорати тандурустии ҳусиҳои Яман гуфт, дар ин ҳамлаҳо 31 нафар кушта шуданд.

Сухангӯи артиши ҳусиҳо эълон кард, ки нови ҳавопаймобари Амрико ва киштиҳои ҷангии ин кишвар дар Баҳри Сурх бо мушакҳои дурпарвоз ва бесарнишинҳо ҳамла кард. Пентагон ба ин иддао ҳанӯз вокуниш накардааст.

Фармондеҳи марказии артиши Амрико рӯзи шанбе наворе нашр кард, ки ҳавопаймоҳои ҷангии Иёлоти Муттаҳида аз макони номаълум парвоз карда, ба ҳадафҳо зарба мезананд. Маскав аз Вашингтон хостааст, ки ҳамлаҳоро қатъ кунад.

Ҳусиҳо ҳафтаи гузашта эълон карданд, ки агар Исроил роҳи кумакҳои башардӯстона ба Ғаззаро боз накунад, ба киштиҳои ин кишвар дар Баҳри Сурх ҳамла мекунанд.

Ин гурӯҳ бо пуштибонӣ аз фаластиниён аз моҳи октябри соли 2023 эълон кард, ки ба киштиҳои марбут ба Исроил ҳамла мекунад.

Доналд Трамп аз Эрон хост, ки аз пуштибонии ҳусиҳои Яман даст кашад, вагарна ҷавоб хоҳад дод. Эрон ҳамлаҳои Амрикоро маҳкум кард ва Сипоҳи посдорони ин кишвар гуфт, ҳусиҳо худашон тасмим мегиранд, ки чӣ кор кунанд.

Додгоҳе дар Тбилиси раисҷумҳури пешини Гурҷистон Михаил Саакашвилиро бо иттиҳоми ғайриқонунӣ гузаштан аз сарҳад дар соли 2021 ба чоруним сол зиндон маҳкум кард.

Ба гузориши расонаҳои Гурҷистон аз 17-уми март, Саакашвили дар мурофиа ширкат надошт.

Михаил Саакашвилӣ дар моҳи октябри соли 2021, баъди ҳашт сол аз хориҷа ба ватанаш баргашт, вале аз тарафи маъмурони интизомӣ дастгир шуд. Аз он замон то ҳоло дар ҳабс аст.

Ҳафтае пеш додгоҳи Тбилиси президети пешини Гурҷистонро бо гуноҳи тасарруфи пули давлат дар солҳои 2009-2013 ба 9 сол зиндон маҳкум кард. Ҳизби “Ҷунбиши муттаҳиди миллӣ”-и Саакашвилӣ ин ҳукмро дорои ангезаи сиёсӣ номид.

Қаблан Саакашвилӣ бо гуноҳи суистифода аз мансаб ба шаш сол ҳабс маҳкум шуда буд.

Михаил Саакашвилӣ аз соли 2004 то 2012 раисҷумҳури Гурҷистон буд.

Ҳукумати Тоҷикистон нархи истифода аз нерӯи барқро барои мардум ва корхонаҳо гарон кард.

Сокинон аз якуми апрел барои ҳар киловат соат барқ 35,36 дирам хоҳанд супурд. Дар ҳоли ҳозир ин рақам ба 30,75 дирам баробар аст.

Қарори ҳукумати Тоҷикистон рӯзи 17-уми март дар нашрияи расмии "Ҷумҳурият" нашр шуд.

Тибқи он, нархи нерӯи барқ аз якуми апрел барои корхонаҳои коркарди нахи пахта 40,45 дирам, литсейу гимназияҳои хусусӣ 60,70 дирам ва корхонаҳои истеҳсолӣ 80,90 дирам таъйин шудааст.

Ин дар ҳолест, ки корхонаҳои "Талко", "Азот" ва "Комбинати металлургии Тоҷикистон" нерӯи барқро арзонтар мегиранд. "Талко" ё ширкати алюминиюми тоҷик – 20,77 дирам, "Азот" – 35,36 дирам ва "Комбинати металлургии Тоҷикистон" – аз 1-уми май то 30-юми сентябр 14,19 дирам ва аз 1-уми октябр то 30-юми апрел 80,90 дирам.

"Талко" давлатӣ аст ва Комбинати металлургии Тоҷикистон тибқи ҳуҷҷатҳои Кумитаи андоз аз сӯйи “Фароз” таъсис ёфтааст. Намояндагони Комбинати металлургӣ борҳо гуфтаанд, ки ба “Фароз” ҳеч робита надоранд.

Корхонаи нуриҳои “Азот”-ро соли 2022 ширкати “Осиё Кемикал” харид ва як сол баъд фаъол шуд. Номи соҳиби ширкате, ки “Азот”-ро харид, маълум нест ва дар борааш дар интернет маълумоти зиёд ҳам вуҷуд надорад.

Додани имтиёз ба ширкатҳои алоҳида дар Тоҷикистон ҳамеша як мавзӯи баҳсбарангез буда, наздикии баъзе аз онҳо бо хонаводаи президент шубҳаеро ба миён овардааст, ки ширкатҳои дигари соҳиби имтиёз низ ба ин оила ва ё шахсони наздик ба онҳо рабт доранд.

Ин тарҳҳо шомили хати интиқоли 500-мегават аз Узбекистон ба Афғонистон ва бунёди як нерӯгоҳи тавлиди барқӣ бо ангишт, дар шимоли Афғонистон мешавад.

Бар асоси хабарномае, ки ширкати афғонистонии "Брешна" рузи 16 март нашр кард, ҳайати техникии Узбекистон дар ин нишаст бар ӯҳдадориҳои ин кишвар барои ҳамкорӣ дар рушди зерсохторҳои энержии Афғонистон таъкид кардааст.

Абдулборӣ Умар, раиси ширкати "Брешна" дар ин нишаст гуфт, ки пас аз ниҳоӣ шудани баррасиҳои техникӣ, кори ин ду тарҳ ҳамзамон бо оғози соли нави хуршедӣ оғоз хоҳад шуд.

Дар ҳоле, ки Афғонистон бо камбуди шадиди барқ рӯбарӯ аст, ин тарҳҳо барои рушди энержии Афғонистон муҳим гуфта мешаванд.

Манобеи амниятӣ дар Кветта, маркази Балуҷистони Покистон, гуфтанд, дар таркише, ки дар ҷараёни ҳамлаи ҷангҷӯён рух дод, 11 сарбоз кушта ва 21 тани дигар захмӣ шудаанд.

Ҳамла ба автобуси сарбозон рӯзи 16-уми март сурат гирифт.

Артиши Покистон гуфт, ки билофосила ба ин ҳамла вокуниш нишон дод ва се ҷангҷӯро кушт.

Масъулияти ҳамла ба сарбозонро гурӯҳи ҷудоихоҳ бо номи “Артиши озодибахши Балуҷ” ба уҳда гирифтааст.

Ин гурӯҳ дар изҳороте, ки ба расонаҳо фиристод, иддао кардааст, ки дар ҳамла ба корвони автобусҳои артиши Покистон 90 сарбозро кушта ва захмӣ кард.

Радиои Аврупои Озод/Радиои Озодӣ иттилои ҳарду ҷонибро дар бораи талафот мустақилона тасдиқ карда наметавонад.

Иёлоти Муттаҳидаи Амрико ва Иттиҳоди Аврупо гурӯҳи "Артиши озодибахши Балуҷ"-ро дар феҳрасти созмонҳои террористӣ ҷой додаанд.

Пулиси Русия мегӯяд, издиҳоми коргарони хориҷӣ дари Маркази муҳоҷиратро дар шаҳри Екатеринбург шикастаанд.

Ҳодиса рӯзи 11-уми март ҳангоми навбатпойӣ барои дарёфти патент ё иҷозаномаи кор рух додааст.

Як вакили маҷлиси шаҳри Екатеринбург аз додситонӣ хостааст, ки ин ҳодисаро санҷад.

Шаҳрвандони хориҷӣ дар Русия ҳақ надоранд, ки бе патент кор кунанд. Парвонаи кор бояд мунтазам дароз ва пули ҳармоҳаи он пардохт карда шавад, вагарна, шаҳрвандони хориҷӣ ҳаққи дарёфти даромади расмиро аз даст медиҳанд.

Як муҳоҷири тоҷик дар Русия гуфт, ҷараёни дарёфти ҳуҷҷат имсол дар он кишвар печида ва тӯлонӣ шудааст. Ӯ афзуд, "агар як сол пеш ҷараёни супоридани ҳуҷҷатҳо 15 дақиқа вақт мегирифт, имсол барои як муҳоҷир ин ҷараён 45 дақиқа вақт мегирад. Барои ҳамин навбатпойӣ тӯлонӣ мешавад.”

Илова ба ин, қонунгузории муҳоҷират дар Русия дар охири соли 2024 ва аввали соли 2025 сахттар шуд.

Ирина Волк, сухангӯи ВКД-и Русия, хабар дод, ки ҳудуди 700 ҳазор муҳоҷир, асосан аз кишварҳои Осиёи Марказӣ, шомили рӯйхати “шахсони зери назорат” ҳастанд. Ин муҳоҷирон то 30-юми апрел вақт доранд, ки будубоши худро дар Русия қонунӣ гардонанд, вагарна ронда хоҳанд шуд.

Иттиҳоди Аврупо барои гузаштан ба энергияи сабз ва ба вуҷуд овардани занҷираи маҳаллии арзиши пахта дар Тоҷикистон 40 миллион евро ҷудо мекунад. Созишнома рӯзи 14-уми март дар шаҳри Душанбе имзо шуд.

22 миллион евро барои кам кардани талафоти нерӯи барқ дар Тоҷикистон дар назар аст ва аз тариқи Бонки аврупоии таҷдид ва рушд дастрас хоҳад шуд. Бахши дигари ин ёрӣ, ки беш аз 18 миллион евро аст, аз сӯйи Оҷонси рушди Олмон барои ба вуҷуд овардани занҷираи маҳаллии арзиши пахта равона мешавад.

Ба гуфтаи Йозеф Сикела, комиссиари Иттиҳоди Аврупо дар бахши ҳамкориҳои байнулмилалӣ бо Осиёи Марказӣ, ин ёрӣ гузаштан ба иқтисоди сабз ва суботи иқтисодии Тоҷикистонро тақвият хоҳанд дод.

“Бо коҳиш додани талафоти барқ, мо на танҳо хароҷотро барои хонаводаҳо ва соҳибкорон коҳиш медиҳем, балки роҳро барои сармоягузорӣ ба энергияи барқароршаванда мекушоем, ки ояндаи Тоҷикистон аст,” -- гуфт Сикела.

Аз назари комиссари аврупоӣ, соҳаи пахтаи Тоҷикистон дар иқтисоди кишвар, таъмини ҷойҳои корӣ ва баланд бардоштани рушди саноати нассоҷӣ ва содирот нақши муҳим мебозад ва Иттиҳоди Аврупо бо як барномаи 5-сола мехоҳад ин бахшро ба тағйироти иқлим устувортару самарбахштар гардонад.

Дар ҳоле ки масъулони Иттиҳоди Аврупо ба муассир воқеъ шудани тарҳҳояшон дар Тоҷикистон таъкид мекунанд, баъзе аз коршиносоне, ки бо ин гуна тарҳҳо кор кардаанд, самарбахшии онро ба чанд шарт бастагӣ медиҳанд.

“Якум, шакли мустақим, яъне як ба як бо соҳибкор. Агар ин ҷо миёнаравҳо зиёд бошанд, масалан, ташкилоти кредитиву бонкӣ, монеаи изофӣ пайдо мешавад. Баъд, дили соҳибкор ҳам мемонад. Даводаваш зиёд ва болои ин фоизҳо дорад. Дуюм, ҳамин пахта барои деҳқон ҳама вақт зараровар буд ва зараровар мемонад. Фақат системаро дигар кардан даркор, ки инҳо намехоҳанд,” – мегӯяд Сайфиддин Қараев, рӯзноманигор ва таҳлилгари масъалаҳои иқтисодӣ.

Дар Тоҷикистон солҳои охир сатҳи баланди талафоти нерӯи барқ яке аз мушкилоти умдаи таъмини мардум бо барқ, аз ҷумла дар мавсими зимистон дониста мешавад. Ба иттилои расмӣ, ҳар 5-ум киловат барқи истеҳсолкардаи Тоҷикистон талаф мешавад. Дар ним соли 2024 ду миллиарду 203,2 миллион киловатт-соат барқи Тоҷикистон талаф шудааст, ки беш аз 21%-и нерӯи барқи истеҳсолшударо дар бар мегирад.

Ҳамчунин пойин рафтани арзиши пахта, яке аз молҳои асосии содиротии Тоҷикистон низ солҳои ахир таваҷҷуҳи деҳқононро ба кишту парвариши он кам кардааст. Аммо мақомоти давлатӣ дар навоҳии пахтакор деҳқононро маҷбур мекунанд, ки дар бештари заминҳои худ пахта бикоранд.

Дар натиҷаи сӯхтор дар як клуби шабона дар шаҳри Кочании Мақдунияи Шимолӣ камаш 51 кас ҷон бохтааст.

Панче Тошковски, вазири корҳои дохилии Мақдунияи Шимолӣ, рӯзи 16-уми март дар нишасти матбуотӣ гуфт, “зиёда аз 100 тани дигар дар бемористон ҳастанд”.

Ӯ афзуд, сӯхтор ҳангоми истифода аз маводи пиротехникӣ дар консерти гурӯҳи DNA рух додааст.

Хешовандон ва дӯстони қурбониён дар назди бемористону идораҳои шаҳр ҷамъ омада, талоши гирифтани маълумоти бештар доранд.

Додситонии Мақдунияи Шимолӣ дар изҳороте гуфт, “теъдоди қурбониён ва захмиён дар сӯхтор муайян карда мешаванд.”

Кочанӣ дар 100-километрии шарқи Скопйе, пойтахти Мақдунияи Шимолӣ ҷойгир аст.

Иёлоти Муттаҳида алайҳи шӯришиёни ҳусии зери ҳимояти Эрон дар Яман ҳамлаи густардаеро анҷом дода, ҳамзамон ба Теҳрон гӯшзад кард, ки пуштибониро аз ин гурӯҳ фавран бас кунад. Амрико шӯришиёни ҳусиро як гурӯҳи террористӣ медонад.

Ҳамла рӯзи 15-уми март сурат гирифт. Қабл аз он Доналд Трамп, раисҷумҳури Амрико, ҳушдор дода буд, ки агар ҳусиҳо ҳамларо ба киштиҳои Иёлоти Муттаҳида ва мушакпарониро ба хоки Исроил хотима надиҳанд, дӯзах бар сарашон чаппа хоҳад шуд.

Трамп ҳамчунин ба Эрон ҳушдор дод, ки агар ба ҳимоят аз ҳусиҳо поён надиҳад, Амрико Теҳронро комилан ҷавобгар медонад ва ҳеч нармише нисбат ба он нишон нахоҳад дод.

Президенти Амрико дар шабакаи иҷтимоии Truth ҳусиёнро “авбош” номид, ки “аз ҷониби Эрон сармоягузорӣ мешаванд” ва “корзори беамони дуздии дарёӣ, хушунат ва терроризмро алайҳи Амрико ва дигарон ба роҳ мондаанд”.

Шӯришиёни ҳусӣ тайи 18 моҳи гузашта ба киштиҳо даҳҳо бор ҳамла карда, иддао доранд, ки дар ҷанги Исроил бо “Ҳамос” (аз сӯи Амрико ва Иттиҳоди Аврупо созмони террористӣ дониста шудааст) дар Ғазза аз дувумӣ ҳимоят мекунанд.

Ба назар мерасад, ҳамлаҳо дар Яман амалиёти бузургтарини низомии Амрико дар Ховари Миёна баъди ба қудрат расидани Доналд Трамп дар моҳи январи имсол аст.

Хабаргузории “Reuters” аз қавли сокини маҳаллӣ Абдуллоҳ Яҳё навишт, ки “таркишҳо шадид буданд ва маҳалларо мисли заминларза такон доданд.”

Мақомҳои ҳусӣ гуфтаанд, ки ҳадди ақал 12 ғайринизомӣ кушта ва 9 ғайринизомӣ захмӣ шуд, аммо ин иддаоро ба таври мустақилона тасдиқ кардан имконпазир нест.

Дар ҳоле ки раҳбарони Амрико ва Аврупо барои созиши оташбас миёни Русия ва Украина талош доранд, нерӯҳои ду кишвар шаби 15 ба 16-уми март аз ҳаво ба хоки якдигар зарба задаанд.

Вячеслав Гладков, волии Белгород дар Русия, гуфт, бар асари бархӯрди ҳавопаймоҳои бесарнишини украинӣ ба як манзил дар шаҳри Губкин се кас захмӣ шуд.

Александр Гусев, волии Воронеж дар ҷанубу ғарби Русия, хабар дод, ки дар се ноҳия зиёда аз 15 ҳавопаймои бесарнишини украиниро аз байн бурданд. Дар бораи талафот гузорише дар даст нест.

Мақомот дар вилояти Ростови Русия низ аз ҳамлаҳои ҳавопаймоҳои бесарнишини Украина гузориш доданд.

Дар ҳамин ҳол, Сергей Лисак, раиси Идораи низомии вилояти Днепропетровск дар Украина гуфт, ки русҳо шаҳри Никополро тирборон карда, як зани 70-соларо куштанд.

Мақомот дар Черниҳов гуфтанд, ки ҳавопаймоҳои бесарнишини Русия ба як бинои панҷошёна бархӯрда, ду табақаи болоиро вайрон кард. Теъдоди қурбониён дар ҳоли ҳозир маълум нест.

Бар асари ҳамлаҳои Русия дар шаҳри Изюми вилояти Харкови Украина низ як кас кушта ва ду кас маҷруҳ шудааст.

Матбуоти Украина аз чанд таркиш дар наздикии Киев низ гузориш дод. Мақомот аз эҳтимоли ҳамлаҳои ҳавопаймоҳои бесарнишин дар минтақа ҳушдор додаанд.

Кумитаи Дифоъ аз Рӯзноманигорон (CPJ) аз раҳбарони Конгресс хостааст, ки аз USAGM ё Оҷонси Расонаҳои Байнулмилалии Амрико ҳимоят кунанд.

Доналд Трамп, раисҷумҳури Амрико, рӯзи 14-уми март дар бораи ихтисори шадиди буҷаи ҳафт ниҳод, аз ҷумла USAGM дастур дод. Радиои Аврупои Озод/Радиои Озодӣ бахше аз ин Оҷонсӣ аст.

Рӯзи 15-уми март Кэри Лейк (Kari Lake), мушовири аршади мудири муваққати USAGM, дар номае эълон кард, ки ёрии тасдиқшуда аз тарафи Конгресс қатъ гардид.

Карлос Мартинез де ла Серна, мудири Кумитаи Дифоъ аз Рӯзноманигорон, қароргоҳаш дар Ню-Йорк, дар баёнияе гуфт, “ин ки Кохи Сафед қасд дорад ин ниҳоди таъминшуда аз сӯи Конгрессро, ки аз рӯзноманигории мустақил дар баробари ривоятҳои ҳукуматҳои худкома ҳимоят мекунад, суст кунад, иқдоме такондиҳанда аст.”

Ӯ рӯзи 15-уми март афзуд, “аз раҳбарони Конгресс мехоҳем, аз ин ниҳоди ҳаётӣ, ки ахбори бидуни сензураро барои кишварҳое бо расонаҳои маҳдуд нашр мекунад, дифоъ кунанд.”

Буҷаи USAGM барои соли молии 2025 ба маблағи 950 миллион доллар дархост шудааст ва ин пул барои кор ва пардохти маоши кормандон равона мешавад.

Ин оҷонсӣ кори Радиои Аврупои Озод/Радиои Озодӣ, Садои Амрико, Радиои Осиёи Озод, Радиои Мартӣ (барои Куба), шабакаҳои Ховари Миёна ва Бунёди фанновариҳои бозро назорат мекунад.

Рӯзи 15 март бо нашри изҳороте ҳукумати Толибон, ки худро “Аморати исломии Афғонистон” меномад, аз қарордоди имзошудаи миёни Тоҷикистон ва Қирғизистон истиқбол кардааст.

Вазорати корҳои хориҷии Толибон, аз ҷумла, навиштааст: “Аморати исломии Афғонистон дастёбӣ ба хатми баҳси дарозмуддати миёни ду кишвари бародарро аз роҳи ҳамдигарфаҳмӣ қадами мусбате ба самти суботи минтақавӣ, рушди иқтисодӣ ва тақвияти эътимоди байниҳамдигарӣ арзёбӣ мекунад”.

Дар изҳорот гуфта шудааст, ки “Афғонистон ҳамеша пуштибони сулҳ, ҳамдигарфаҳмӣ ва тавсеаи ҳамкориҳои минтақавӣ аст ва бовар дорад, ки ин созишнома саҳифаи навро дар сулҳи давомдор дар Осиёи Марказӣ боз хоҳад кард”.

Ҳукумати Толибон, ки соли 2021 дар Афғонистон сари қудрат баргаштааст, ҳанӯз аз ҷониби ҳукумати Тоҷикистон ба расмият шинохта нашудааст, вале ҳамкориҳои энержӣ ва тиҷоратӣ миёни ин кишварҳо вуҷуд доранд.

Созиши марзии миёни Душанбе ва Бишкек рӯзи 13 март имзо шуд ва то ҳол бисёр давлату созмонҳои шарики ин кишварҳо, аз ҷумла, СММ, Иттиҳоди Аврупо, кишварҳои ИМА, Русия, Чин ва дигарҳо аз имзои ин санад истиқбол кардаанд.

ИМА қоидаҳои вуруд ба ин кишвар барои шаҳрвандони 43 кишварро шадидтар мекунанд ва дар ин феҳрист аз миёни давлатҳои собиқ шӯравӣ инчунин Русия, Беларус, Туркманистон ёд мешаванд. Дар ин бора рӯзи 15 март нашрияи The New York Times хабар додааст.

Бино ба навиштаи ин расонаи амрикоӣ, феҳристи кишварҳо ба се гурӯҳ – “сурх”, “норанҷӣ” ва “зард” тақсим шудааст.

Шаҳрвандони кишварҳое, ки ба гурӯҳи “сурх” ворид карда шудаанд, ҳақи ворид шудан ба хоки ИМА-ро надоранд. Ин кишварҳо: Афғонистон, Бутан, Венесуэла, Эрон, Куба, Кореяи Шимолӣ, Либия, Сомалӣ, Судон, Сурия, Яман мебошанд.

Русия, Беларус, Туркманистон ва Покистон ба гурӯҳи “норанҷӣ” ворид шудаанд ва додани виза ба шаҳрвандони ин кишварҳо метавонад маҳдуд шавад. Барои шаҳрвандони ин кишварҳо танҳо дар сурати “сайёҳони бисёр сарватманду соҳиби кор” буданашон додани виза иҷоза дода мешавад.

Ба кишварҳое аз рӯйхати “зард” 60 рӯз фурсат дода мешавад, ки нигарониҳои мавриди ИМА-ро ислоҳ кунанд. Ба ин гурӯҳ исми 22 давлат, аз ҷумла Зимбабве, Чад, Сент-Китс и Невис, Вануату ва дигарҳо ворид карда шудаанд.

Нашрия навиштааст, ки феҳристи ниҳоии кишварҳо метавонад тағйир ёбад.

Трамп аз аввалин рӯзи раёсатҷумҳуриаш мубориза бо муҳоҷирати ғайриқонуниро аз ҳадафҳои муҳими худ эълон карда дар сарҳад бо Мексика ҳолати фавқулодда ҷорӣ кард.

Як гузориши СММ мегӯяд, мақомот дар Эрон барои назорат аз қонуни пӯшидани ҳиҷоб аз фанновариҳои пешрафтаи мисли паҳподу дастгоҳҳои шинохти чеҳра ва замимаҳои гузоришдиҳии шаҳрвандон истифода мекунанд. Муҳимтарин дастгоҳи назорат аз болои занон дар ҷомеаи Эрон замимаи ҳукуматии бо номи “Назорат” мебошад.

Ин замима ба полис имконият медиҳад, ки аз мавридҳои эҳтимолии вайрон кардани қонуни ҳиҷоб дар дохили мошинҳо, аз ҷумла, мошини ёрии таъҷилӣ, мусофирбарҳо ваё таксиҳо назорат кунанд.

Замима ба корбарон имкон медиҳад, ки маълумот дар бораи шаҳодатномаи мошин, маҳалли ҳаракати он ваё замони нақзи муқаррарот хабар диҳанд.

Маълумот рост ба полис меравад. Бар асоси ин шикоят, полис метавонад ба соҳиби мошин паёмак ё СМС фиристода ҳушдор диҳад, ки онҳо ҳолати вайрон кардани қоидаи пӯшидани ҳиҷобро сабт кардаанд ва дар сурати нодида гирифтани ҳушдорҳо, мошин мусодира мешавад.

Гузориши СММ мегӯяд, мақомот дар Теҳрон ва минтақаҳои ҷанубии кишвар бо истифода аз паҳпод ё дрон пӯшидани ҳиҷобро аз ҷониби занҳо назорат мекунанд. Илова ба ин, дар даромадгоҳи донишгоҳи Амиркабири Теҳрон як нармафзоре насб шудааст, ки вазифааш чеҳрашиносӣ ва сабти симои духтарони беҳиҷоб мебошад. Қарор аст ин гузориш рӯзи сешанбе дар ихтиёри Шӯрои ҳуқуқи башари СММ вогузор шавад.

Нахуствазири Бритониё Кейр Стармер дар як мулоқот бо сарони кишварҳои аврупоӣ гуфт, президенти Русия Владимир Путин бояд ҳамлаҳо ба Украинаро хотима дода созиши оташбаси пешниҳодии ИМА-ро бипазирад. Стармер, ки 15 март дар як ҷаласаи маҷозие бо иштироки 25 раҳбари аврупоӣ сӯҳбат мекард, аз ҳамкорони аврупоиаш даъват намуд, ки фишорро болои Маскав афзоиш дода ҳама гуна созиши сулҳро дифоъ кунанд.

Ӯ гуфт, “агар Путин дар робита бо сулҳ нияти ҷиддӣ дорад, дигар кор осон аст: ӯ бояд ҳамлаҳои барбариаш ба Украинаро хотима дода бо оташбас розӣ шавад”. Дар ҷаласа инчунин раҳбарони Канада, Австралия ва Зеландияи Нав иштирок карданд, намояндаи ИМА дар нишаст ҳузур надошт.

Ӯ афзуд, “мо бояд ба пешрафт дар ин масъала, барои сулҳ ва сулҳи давомдор пойфишорӣ кунем”.

Дар ҳоле, ки Русия, ИМА ва Украина дар атрофи пешниҳоди Доналд Трамп, президенти ИМА оид ба оташбаси 30-рӯза баҳс мекунанд, Стармер хостори кӯмакҳои амалии молию ҳарбӣ ва таъминотӣ ба Киев мебошад.

Бритониё, Фаронса ва давлатҳои дигар гуфтаанд, ки дар доираи созиши оташбас омода ҳастанд ба Украина нирӯҳои посдори сулҳи худро фиристанд. Стармер аз Вашингтон даъват намуд, ки ба хотири пешгирӣ аз ҳамлаҳои бештари Русия ба ин нирӯҳо кӯмаку пуштибонии худро фароҳам кунад. Ӯ гуфт, дар сурати сари мизи гуфтушунид нишастани Русия мо бояд ҷараёни оташбасро назорат кунем, то ки оташбаси ҷиддӣ ва сулҳи давомдор таъмин шавад”. Ӯ гуфт, дар сурати ғайр, фишори иқтисодӣ болои Русия бояд афзоиш дода шавад.

Рӯзи 14 март баъди сӯҳбат бо Стармер, президенти Фаронса Эммануэл Макрон ҳам гуфт, Русия бояд пешниҳоди оташбасро бипазирад.

Президенти Украина Владимир Зеленский гуфт, нирӯҳои кишвараш вазифаи худро дар вилояти Курски Русия иҷро карданд, ки ба гуфтаи ӯ, ҳадаф аз хатҳои дигари ҷабҳа ба ин сӯ кашидани нирӯҳои русӣ буд.

Дар ин бора нашрияҳои "Суспільне" ва "Укринформ" хабар медиҳанд. Ӯ гуфт, ки дар ин қитъаи ҷабҳа вазифаи нирӯҳои украинӣ ин буд, ки сарбозони русро аз самтҳои Покровск, Харков ва Суми ба ин сӯ ҷалб кунанд.

Зеленский, ки сарбозони украиниро ҳамчун қаҳрамонон ситоиш кард, гуфт, «аввал шуда фишор дар самти Харков кам карда шуд. Онҳо шумори зиёди сарбозонро ба самти Куршина равона карданд. Баъди ин аз самти шарқӣ сарбозонро ин сӯ кашиданд, вале ҳадафи асосии худ Покровскро аз даст надоданд. Мо инро дарк мекардем.

Одамон қавиирода ҳастанд ва дарк мекарданд, ки шонсе даст медиҳаду русҳо дар самти Покровск бозмеистанд. Ҳамин тавр ҳам шуд». Зеленский гуфт, ки дар натиҷа, вазъ дар самти Покровску Харков «мӯътадил шуд».

Зеленский гуфт, бовар дорад, амалиёт дар вилояти Курск ба анҷом расид ва дар самти Покровск вазъ ҳоло мӯътадил аст ва «барои аз нав ишғол кардани Покровск осон нахоҳад шуд».

Артиши Украина августи соли 2024 амалиёти худро дар вилояти Курск шурӯъ карда, чанд маҳалли истиқоматиро ба даст даровард. Он вақт Зеленский гуфт, ки бо ин кор аз муҳосираи як қисми вилояти Суми пешгирӣ мешавад, мавқеи нирӯҳои украинӣ ба ҳангоми музокироти эҳтимолӣ бо Русия қавитар хоҳад шуд ва ҳам ба сокинони Русия «воқеиятро» нишон медиҳад.

Пажӯҳишгоҳи омӯзиши низоъҳо мегӯяд, амалиёти низомӣ дар масоҳати 1160 километри мураббаъ қаламрави вилояти Курск идома дошт. Сентябри соли гузашта 907 км мураббаъ ва оғози моҳи март 407 км мураббаъ қаламрави вилояти Курск зери назорати артиши Украина қарор дошт.

Аз аввали моҳи март артиши Русия беш аз 20 маҳалли истиқоматӣ дар Курскро зери назорати худ дароварда рӯзи 13 март дар бораи ба даст даровардани шаҳри Суҷа хабар дод.

Сардори ситоди кулли Русия Валерий Герасимов гуфт, ки беш аз 400 низомӣ асир гирифта шуданд. Путин бори аввал аз замони шурӯи ҷанг дар вилояти Курск бо либоси ҳарбӣ дида шуд ва ваъда дод, ки ба низомиёни украинӣ ҳамчун «террорист» муносибат хоҳад кард.

Вале баъди сӯҳбат бо президенти ИМА Доналд Трамп гуфт, ки «ҳазорҳо» сарбози дар вилояти Курск асирафтода «агар силоҳро замин гузошта таслим шаванд», зинда хоҳанд монд. Дар Ситоди кулли Украина ба муҳосираи сарбозони русӣ афтодани низомиёни украиниро рад карданд.

Иттиҳоди Аврупо барои гузариш ба энергияи сабз ва ба вуҷуд овардани занҷираи маҳаллии арзиши пахта дар Тоҷикистон 40 миллион евро ҷудо мекунад.

22 мииллион еврои ин ёрии молии Иттиҳоди Аврупо, ки барои кам кардани талафоти неруи барқ дар низоми энергетикии Тоҷикистон равона мешавад, аз тариқи Бонки аврупоии таҷдид ва рушд татбиқ хоҳад шуд.

Бахши дигари ин ёрии молӣ, ки беш аз 18 миллион евро аст аз сӯйи Агентии рушди Олмон барои ба вуҷуд овардани занҷираи маҳаллии арзиши пахта равона мешавад.

Ба гуфтаи Йозеф Сикела, Комиссари Иттиҳоди Аврупо оид ба шарикии байналмилалӣ, ин ёрии молиявӣ устуворӣ, гузариш ба иқтисоди сабз ва суботи иқтисодии Тоҷикистонро тақвият хоҳанд дод.

Тафсилоти бештар аз тарҳи нави ҳамкориҳои ИА ва Тоҷикистон дар рӯзҳои наздик дар Радиои Озодӣ нашр мешавад.

Раҳбари Ҳизби "Справедливая Россия" Сергей Миронов аз Додситонии кулл дархост кардааст, ки фаъолияти клубҳои варзишии муҳорибаҳоии бидуни қоида ва ё MMA-ро ҳамаҷониба тафтиш кунад.

Ба бовари вакили муҳоҷирситези рус, чунин клубҳо ба ифротӣ намудани муҳоҷирон машғуланд ва бидуни назорат гузоштани онҳо ба амнияти кишвар хатарбор аст.

Ба гуфтаи вай, танҳо дар Маскав ҳудуди 500 клуби ММА вуҷуд дорад.

Миронов мисли раҳбари қаблии Ҳизби либерал-демократи Владимир Жириновский, бо изҳороти таҳқиромезаш нисбати муҳоҷирон маъруф аст.

Дар гузашта ӯ тарафдори манъи тақдими шаҳрвандии Русия ба тоҷикистониҳо шуда буд ва ҳоло пешниҳод кард, ки додани шаҳрвандӣ ба тамоми муҳоҷирон аз Осиёи Марказӣ муваққатан манъ шавад.

Муҳаммад Шиа ас-Судонӣ, нахуствазири Ироқ рӯзи 14 март гуфт, раҳбари гурӯҳи “Давлати исломӣ дар Ироқ ва Сурия” кушта шуд. Судонӣ гуфт, ӯ “яке аз хатарноктарин террористон дар Ироқ ва ҷаҳон дониста мешуд”. Дар ин бора хабаргузории Рейтерс иттило додааст.

Судонӣ афзуд, ки дар амалиёти муштараки нирӯҳои амниятии Ироқ ва сарбозони эътилофии муборизи зидди гурӯҳи ҷангӣ Абдулло Мокӣ Муслиҳ ар-Рифоӣ, маъруф бо лақаби Абу Хадичаро куштанд.

Иёлоти Муттаҳидаи Амрико мақомоти Тоҷикистон ва Қирғизистонро бо имзои "санади таърихӣ – Шартнома оид ба сарҳади давлатӣ" табрик кардааст. Тэмми Брюс, сухангӯи Департаменти Давлатии ИМА бо нашри изҳороте рӯзи 14 март гуфт, "Ин дастовард нишондиҳандаи тааҳҳуди ду давлат барои дипломатия ва суботи минтақавӣ мебошад".

Аз ин пеш имзои созишномаи байни ду кишвари ҳамсояро мақомоти СММ, Иттиҳоди Аврупо, кишварҳои Чину Русия ва дигар ҷонибҳо ҳам истиқбол карданд.

Брюс навиштааст, ҳалли масоили марзӣ "яке аз душвортарин вазифаҳои дипломатӣ аст, ки як ҳукумат метавонад анҷом диҳад". Иёлоти Муттаҳида изҳори умедворӣ кардааст, ки ин тавофуқи муҳими таърихӣ роҳро барои рушди равобити тиҷоратӣ ва иртибототи миёни сокинони наздимарзӣ боз ва барои пойдории сулҳ дар минтақа мусоидат мекунад.

Созишномаи марзи байни Тоҷикистону Қирғизистон рӯзи 13 март дар маросиме дар шаҳри Бишкек миёни президентон Эмомалӣ Раҳмон ва Содир Ҷабборов имзо шуд.