Президенти Украина Владимир Зеленский мегӯяд, телефонӣ Доналд Трампро бо пирӯзиаш дар интихоботи президентии Амрико табрик кардааст. Ба қавли раҳбари Украина, ӯ ва Трамп мувофиқат карданд, ки муколама ва ҳамкориҳои Киеву Вашингтонро тавсеа бахшанд.
Зеленский пас аз суҳбат бо Трамп гуфт, "мо мехоҳем аз таҷовузи Русия халос шавем. Мехоҳем кишварамон, ИМА ва муттаҳидони мо низ нерӯманд бошанд. Дар ин бора бо президент Трамп моҳи июл дар як суҳбати телефонӣ ва баъд дар мулоқоти рӯ ба рӯ дар моҳи сентябр табодули назар карда будем".
Доналд Трамп моҳи сентябри имсол гуфта буд, агар дубора раиси ҷумҳури Амрико шавад, бо ҳарду ҷониб кор мекунад, то ба ҷанг дар Украина поён диҳад.
Трамп гуфта буд, ки шояд барои имзои созиши сулҳ Украина маҷбур шавад, ки аз баъзе минтақаҳояш даст кашад. Пешниҳоде, ки Киев қотеона рад кардааст.