Доналд Трамп ва Ҷо Байден рӯзи чаҳоршанбеи 13-уми ноябр дар Кохи Сафед вохӯрданд. Хабарнигорон танҳо ҳудуди як дақиқа иҷозаи ҳузур дар толори вохӯриро доштанд. Онҳо дар ин муддат шуниданд, ки Трамп барои интиқоли ороми қудрат ба Байден сипосгузорӣ кардааст.
Трамп гуфт, “сиёсат сахт аст ва дар бисёр маврид дунёи зебое нест, аммо имрӯз дунёи зебое аст.”
Расонаҳои амрикоӣ гузориш доданд, ки дар ин дидор Илон Маск, бунёдгузори ширкати Тесла ва соҳиби шабакаи X ҳузур дошт. Трамп ахиран Маскро ба унвони мушовири давлатӣ интихоб кард.
Дидори Доналд Трамп ва Ҷо Байден дар Кохи Сафед, ба унвони бахше аз раванди интиқоли қудрат дар Амрико ба ҳисоб меравад. Чор сол пеш вақте Трамп дар интихобот аз Ҷо Байден шикаст хӯрд, дар маросими савгандёдкунӣ ширкат накард.
Доналд Трамп рӯзи 5-уми ноябр дар интихоботи президентии Амрико ғолиб шуд. Дар назар аст, ки Трамп 20-уми январи соли 2025 савганд ёд карда, корашро дар мақоми президентии Амрико оғоз кунад.