Издиҳоми хашмгин дар минтақаи офатзадаи Валенсияи Испания, ба сӯи шоҳ Филипп VI лой партофта, ӯро дашном доданд. Рӯзи якшанбеи 3-юми ноябр шоҳи Испания ба минтақаи аз сел зарардида рафт.
Издиҳоми хашмгин ба сӯи шоҳи Испания “қотил” гуфта фарёд заданд ва лой партофтанд. Сокинони зарардида мақомдорони давлатиро ҳам, ки ба ҷойи ҳодиса омада буданд, дашном доданд. Одамон пурсиданд, ки чаро мақомдорон ва шоҳ пештар наомаданд?
Дар баъзе маврид полис маҷбур шуд, ки барои назорати мардум, ба вазъият дахолат кунад. Дар наворҳо аз маҳалли ҳодиса дида мешавад, ки афсарони амниятӣ Филипп VI-ро бо чатр муҳофизат мекунанд.
Рӯзи душанбеи 28-уми октябр дар пайи боридани борони зиёд, сатҳи оби дарё дар чанд минтақаи Испания боло рафт. Дар ин офати табиӣ чанд шаҳр зери лой монд ва садҳо нафар бидуни обу барқ монданд. Дар ин ҳодиса беш аз 200 нафар қурбон шуданд.