Владимир Путин, раиси ҷумҳури Русия Доналд Трампро ба ғалаба дар интихоботи президентии Амрико табрик кардааст. Путин гуфтааст, дарҳои Маскав барои гуфтугӯ бо роҳбари нави Амрико боз аст.
Табрикоти Путин ба Трамп, 7-уми ноябр дар ҳамоише дар шаҳри Сочи садо дод.
Доналд Трамп дар маъракаҳои таблиғотиаш борҳо гуфтааст, ки дар сурати ғалаба дар интихобот, ҷанг дар Украинаро фавран хотима медиҳад, вале нагуфт, ки чигуна. Владимир Путин дар Сочи гуфт, ин ҳарф қобили таваҷҷуҳ аст ва илова кард, ки агар Трамп хоҳони барқарор кардани гуфтугӯ бо Маскав бошад, онҳо омодаанд.
Путин ҳамчунин Трампро, ки аз як сӯиқасд наҷот ёфта буд, шахси ҷасур хонд.
Худи Трамп ҳам гуфтааст, омодаи гуфтугӯ бо Путин мебошад. Раиси ҷумҳури мунтахаби Амрико дар гуфтугӯ бо шабакаи NBC афзуд, баъди ғалаба дар интихобот, бо роҳбарони 70 кишвар гуфтугӯ кардааст, аммо дар миёни онҳо Путин набуд.