Эмомалӣ Раҳмон, раисҷумҳури Тоҷикистон, хостааст, барои истифодаи ба гуфтааш "ғайриқонунии нерӯи барқ" ва "напардохтани пули он" ҷавобгарии ҷиноӣ таъйин карда шавад.
Пешниҳод рӯзи 27-уми март дар маҷлиси ҳукумат садо додааст. Ҷаласа паси дарҳои баста ва бе ҳузури хабарнигорони мустақил гузашт ва ҷузъиёташ маълум нест.
Дафтари матбуоти президент танҳо навишт, ки "Эмомалӣ Раҳмон аз истифодаи ғайрисамараноки нерӯи барқ ва талафоти аз меъёр зиёди он дар тирамоҳу зимистони 2024-2025 изҳори нигаронӣ кард."
Мақомоти Тоҷикистон чанд сол боз мардумро гунаҳкор мекунанд, ки ҳаққи истифодаи нерӯи барқро намедиҳанд ва ё онро бидуни ҳисобкунак истифода мебаранд. Сокинон, баръакс, даъво доранд, ки ҳар моҳ нозирон пули барқро аз онҳо меситонанд, вагарна бе гармиву рӯшноӣ хоҳанд монд.
Ширкати "Барқи Тоҷик" қарзи аҳолиро аз нерӯи барқ то моҳи январи соли 2025 як миллиарду ҳафтсад миллион сомонӣ ҳисоб кардааст. Коршиносон борҳо омори қарздории аҳолиро аз барқ зери шубҳа гузошта, сабабҳои ин мушкилро бештар ба мудирияти нодуруст пайванд додаанд.
Дар айни замон баъзе аз нозирони барқ бе зикри номи худ мегӯянд, қарзҳои зиёд умдатан аз корхонаву шахсонест, ки ба хешовандони мансабдорони баландпоя тааллуқ доранд.
Ҳар киловат соат нерӯи барқ барои аҳолии Тоҷикистон ба 30,37 дирам фурӯхта мешавад. Бо қарори ҳукумат, аз якуми апрели имсол ин рақам ба 35,36 дирам хоҳад расид. Дар ҳоле ки ширкате азиме чун "Талко" (корхонаи алюминиюми тоҷик) онро ба 20,77 дирам мегирад.
Тоҷикистон дар соли 2024 зиёда аз 22 миллиард киловат соат нерӯи барқ истеҳсол кардааст. Талаботи солонаи кишвар дар умум 19 миллиард киловат соат гуфта мешавад. Дар соли 2024 ба зиёда аз 906 миллион сомонӣ ба хориҷа барқ фурӯхта шудааст.