Дар Чин як мошин издиҳоми одамонро пахш кардааст, ки дар натиҷа 35 нафар ҳалок шуда, 43 каси дигар маҷруҳ гардиданд. Ҳодиса шоми 11-уми ноябр, дар назди маркази варзишии шаҳри Жуҳа рух додааст. Дар ин бора нашрияи South China Morning Post хабар додааст.
Ба навиштаи ин расонаи чинӣ, дар миёни қурбониён кӯдакон ҳам ҳастанд. Шоҳидон гуфтаанд, ҳодиса замоне рух дод, ки чанд гуруҳи одамон дар назди маркази варзишӣ гаштугузор мекарданд.
Пулиси маҳаллӣ гуфтааст, ронандаи 62-сола тӯдаи одамонро пахш карда, баъдан мехост худкушӣ кунад. Мардро боздошт карда, ба беморхона фиристоданд, вале феълан ӯ беҳуш аст.
Бино ба маълумоти пешакӣ, ин мард чанде пеш аз ҳамсараш ҷудо шуда, ба тақсими молу мулк норозӣ будааст.