Бар асари ҳамлаҳои Исроил дар маркази Бейрут, пойтахти Лубнон, камаш 20 нафар кушта шуд.
Ҳодиса рӯзи 23-юми ноябр иттифоқ уфтод.
Вазорати тандурустии Лубнон хабар дод, ки 66 каси дигар маҷруҳ гаштанд.
Ин ҳол дар замоне пеш омад, ки фиристодаи вижаи Амрико барои созиш ба поён додани даргириҳои чандмоҳа миёни Исроил ва “Ҳизбуллоҳ”-и Лубнон ба минтақа рафта буд.
“Ҳизбуллоҳ” ҳам гурӯҳи ҷангҷӯст ва ҳам ҳизби сиёсӣ, ки дар порлумони Лубнон намоянда дорад ва ҷануби ин кишвар зери назораташ аст.
Ин гурӯҳ аз ҳимояти Эрон бархурдор аст, вале Амрико онро созмони террористӣ медонад. Иттиҳоди Аврупо танҳо шохаи низомии “Ҳизбуллоҳ”- ро ба рӯйхати сиёҳ ворид кардааст.