Вазорати кору муҳоҷирати Тоҷикистон гуфтааст, кафшергарони тоҷик аз аввали соли 2025 метавонанд ба муҳоҷират ба Кореяи Ҷанубӣ бираванд.
Эълон дар ин бора рӯзи 25-уми декабр нашр шуд.
Аммо мақомот гуфтаанд, корҷӯёни аз 18 то 39-сола бояд шаҳодатномаи кафшергарӣ дошта, забони кореягиро азхуд карда бошанд.
Аз корҷӯёни дигар хоста шудааст, ки барои омӯхтани забони кореягӣ ва касбҳои зарурӣ ба маркази таълимии Вазорати кору муҳоҷират дар Душанбе, Бохтар ва Хуҷанд муроҷиат кунанд.
Бекорӣ ё кор бо маоши кам яке аз душвориҳои асосии ҷомеаи Тоҷикистон аст. Ин вазъ садҳо ҳазор касро ба муҳоҷирати корӣ дар хориҷа маҷбур мекунад.
Ҳукумати Тоҷикистон дар моҳи ноябри соли 2024 бо Кореяи Ҷанубӣ ва Кувайт тафоҳумномаи ҳамкориро дар заминаи муҳоҷират имзо кард.
То ин вақт муҳоҷирони кории тоҷик асосан ба Русия ва Қазоқистон мерафтанд.