Ба дасти Радиои Озодӣ наворе расид, ки нишон медиҳад, макони зисти муҳоҷирони тоҷик дар наздикии Маскав оташ гирифтааст. Муаллифони навор гуфтанд, ҳодиса зуҳри 7-уми ноябр дар шаҳри Чехов рух додааст. Ин шаҳр дар 55 километрии Маскав ҷойгир шудааст.
Дар навор дида мешавад, ки муҳоҷирон талош доранд алангаи оташро хомӯш кунанд. Дар маҷмӯъ чор вагон, ки хобгоҳи муҳоҷирони тоҷик буданд, пурра сӯхтааст.
Ба гуфтаи муаллифони навор, муҳоҷирон тавонистаанд наҷот ёбанд, аммо санаду либос ва дигар ашёи рӯзгорашон ба коми оташ рафт. Эҳтимолан сӯхтор бо айби оташдони барқӣ сар задааст.
Навори ҷойи ҳодисаро дар ин барнома тамошо кунед:
Аз ин пештар низ, ҳолатҳои зиёди ба коми оташ рафтани ҷойи хоби муҳоҷирони меҳнатӣ дар Русия ҷой дошт.
Мақомоти рус дар аксар ҳолат худи муҳоҷиронро дар сар задани сӯхтор гунаҳгор мекунанд. Аммо мӯҳоҷирон мегӯянд, корфармоёни рус барояшон шароити дурусти кору зиндагиро фароҳам намекунанд.