Раисҷумҳури Озарбойҷон масъулияти суқути як ҳавопаймои кишварашро дар Қазоқистон "ба дӯши намояндагони Русия" гузошт.
Илҳом Алиев дар ин бора рӯзи 6-уми январ изҳорот дод.
Ҳавопаймои ширкати "Озарбойҷон Эйрланз", ки рӯзи 25-уми декабри соли 2024 аз Боку ба Грозний парвоз дошт, дар фазои Русия осеб дида, дар наздикии шаҳри Оқтау дар Қазоқистон афтод. 38 нафар ҷон бохта, 29 тани дигар маҷрӯҳ шуданд.
Президенти Озарбойҷон муҷозоти онҳоеро талаб кард, ки "сабаби марги шаҳрвандони Озарбойҷон" гаштаанд.
"Мо адолат, муҷозоти гунаҳкорон ва шаффофияти комилро талаб дорем," -- гуфт ӯ.
Мақомоти Русия дар бораи сабабҳои тасодуф ва масъулияти онҳо дар ин ҳодиса чизе нагуфтаанд.
Владимир Путин, раисҷумҳури Русия, рӯзи 28-уми декабр аз ҳамтои озариаш Илҳом Алиев барои он ки ҳодисаи фоҷиабор дар қаламрави ҳавоии Русия рух додааст, узр пурсид.