Даромади буҷаи Тоҷикистон аз ҳисоби ҷаримаҳо бештар аз интизории мақомоти кишварро ташкил додааст. Ин нукта дар як санади Вазорати молия омадааст, ки Радиои Озодӣ 6-уми ноябр бо он шинос шуд.
Бар асоси ин ҳуҷҷат, Вазорати молия пешбинӣ кардааст, ки дар 9 моҳи имсол, аз ҳисоби ҷаримаҳо ба буҷа 176,3 миллион сомонӣ ворид шавад. Аммо дар амал даромади буҷа аз ин ҳисоб 327,3 миллион сомонӣ шудааст.
Маблағи ҷаримаҳо 2 дарсади буҷаи кишварро дар 9 моҳи соли 2024 ташкил медиҳад. Аз оморӣ расмӣ бармеояд, ки буҷаи давлат ҳаррӯз аз ҳисоби ҷаримаҳо беш аз 1,1 миллион сомонӣ даромад медидааст.
Афзоиши даромад аз ҳисоби ҷаримаҳо дар ҳолест, ки шикоятҳо аз вазнин будани ҳаҷми ҷаримаҳо дар кишвар зиёд аст.