Эмомалӣ Раҳмон, раисҷумҳури Тоҷикистон, додситонҳои Хоруғу Конибодом, Турсунзода, Рашт, Фархор, Носири Хусрав, Балҷувон ва додситонҳои ҳарбии Суғду Бохтарро дигар кардааст. Ин тасмим рӯзи 9-уми январ эълон шуд.
Дар хабари расмӣ аз ягон кас ном бурда нашудааст.
Ба иттилои дарёфтӣ, Наврӯз Тоҳирзода додситони ҳарбии Суғд таъйин шудааст. Ӯ то ин вақт додситони ҳарбии Бохтар буд.
Аз оғози моҳи январ дар баъзе аз идораҳои давлатӣ ва ҳукуматҳои маҳаллӣ дар Тоҷикистон тағйирот ё ҷоивазкунии кадрҳо ҷараён дорад.
Бахтиёр Сафаров, сардори ширкати "Central Asia Consulting” дар Вашингтон, дар суҳбати пешинааш бо Радиои Озодӣ гуфта буд, "таъйиноти кадрие, ки солҳои дароз дар ҳукумати Тоҷикистон мушоҳида мекунем, бештар монанди намоишҳои театрӣ ҳастанд, на ислоҳоти воқеӣ."