Дар роҳи Душанбе-Чаноқ, ягона масир ба шимоли Тоҷикистон, барфи зиёд борида истодааст. Дар ин бора ширкати IRS хабар додааст. Ин ширкат масъули нигаҳбони роҳ буда, барои ин аз ронандагон маблағ мегирад.
Ширкати IRS субҳи 13-уми ноябр дар саҳифаи Фейсбукиаш навиштааст, боридани барф аз километри 113 то 183 сахту пуршиддат аст. Ин қисмати роҳ дар ҳудуди ноҳияҳои Варзоб ва Айнӣ ҷойгир аст.
Намояндагони IRS гуфтаанд, феълан роҳ барои ҳаракати нақлиёт боз аст, аммо аз ронандагон мехоҳанд “бидуни омодагии марбут ба мавсими сармо ба роҳ набароянд.”
Роҳи Душанбе-Хуҷанд дар зимистону баҳор хатарнок мешавад. Ҳодисаҳои фаромадани тармаву сангпора дар ин ду фасли сол сабт мешавад ва борҳои боиси талафоту бастани роҳ шудааст.
Ҳукумат масъулияти нигаҳбонии ин роҳро аз соли 2009 ба ширкати номаълуми "IRS” додааст ва ин ширкат аз ронандагон пул мегирад. Соҳиби ширкат маълум нест ва ҳукумат низ соҳибони онро фош намекунад.