Бино ба аксҳои нави моҳвораӣ, ба назар мерасад, Русия бахше аз таҷҳизоти низомии худро аз пойгоҳи ҳавоии Ҳмеймим дар Сурия берун мебарад.
Тасвирҳоро ширкати “Maxar” рӯзи 13-уми декабр нашр кард.
Тибқи он, дастикам ду ҳавопаймои борбар дар пойгоҳи Ҳмеймим дида мешаванд.
Ба гузориши “Рейтерс”, ин ду ҳавопаймо навъи “АН-124” ҳастанд, ки асосан барои интиқоли борҳои вазнин истифода мешаванд.
“Maxar” навиштааст, дар тасвирҳои нави моҳвораӣ чархболи Ка-52 ва бахшҳои низоми дифоии S-400 низ ба чашм мехӯранд.
Русия дар солҳои охир барои пуштибонӣ аз ҳукумати Башор Асад дар Сурия ҳузури низомӣ дошт. Ҳукумати Башор Асад рӯзи 8-уми декабри 2024 суқут кард.
Ҳафтуним ҳазор сарбозу афсари Русия дар ду пойгоҳ – Тартус ва Ҳмеймими Сурия – ҷойгир буданд. Чанд рӯз пеш дар тасвирҳои моҳвораӣ дида шудааст, ки киштиҳои низомии Русия пойгоҳи Тартусро тарк мекунанд.