Владимир Зеленский, раисҷумҳури Украина мегӯяд, ки бо Доналд Трамп, президенти Амрико сӯҳбати ошкор ва муфид дошт. Доналд Трамп ва Владимир Зеленский 19-уми март телефонӣ суҳбат карданд.
Пеш аз ин ибрози назари Зеленский, президенти Амрико Доналд Трамп дар сафҳаи иҷтимоии худ Truth навишт, ки ин суҳбат тақрибан як соат давом кард ва қисмати асосии он дар бораи гуфтугӯяш бо Владимир Путин, президенти Русия дар мавриди ҷанг дар Украина буд.
Президентҳои Амрико ва Русия рӯзи 18-уми март телефонӣ суҳбат карда буданд.
Қарор аст якшанбеи 23 март, ҳайатҳои Амрико ва Русия музокироти худ дар бораи Украинаро дар шаҳри Ҷиддаи Арабистони Саудӣ дубора оғоз кунанд.
Ду тараф ҳафтаи гузашта ҳам дар Ҷидда дар мавриди ҷанг дар Украина суҳбат карда буданд.