Хабарнигори тоҷик Рухшона Ҳакимова рӯзи 5-уми феврал дар доираи парвандаи пурсарусадои "табаддулот" бо гуноҳи "хиёнат ба давлат" ба ҳашт сол зиндон маҳкум шуд. Худаш дар додгоҳ иттиҳомро рад кард.
Ҳабси Рухшона Ҳакимова вокунишҳои зиёдро дар шабакаҳои иҷтимоӣ ба миён овард. Бахусус инки ӯ ду кӯдак (яке нуҳмоҳа ва дигаре дуюнимсола) дорад.
Корбарони шабакаҳои иҷтимоӣ бо ишора ба муқаррароти қонунгузории Тоҷикистон дар бораи ба таъхир гузоштани ҷазои зане, ки кӯдаки хурдсол дорад, аз мақомот талаб карданд, ки Ҳакимоваро аз фарзандонаш ҷудо накунанд.
Шавкат Лутфуллозода, муовини аввали раиси Додгоҳи олии Тоҷикистон, рӯзи 13-уми феврал зимни нишасти хабарӣ гуфт, "ҳукми Рухшона Ҳакимова ба гурӯҳи ҷиноятҳои махсусан вазнин дохил мешавад ва мавқуф гузоштани иҷрои онро қонунгузорӣ пешбинӣ накардааст." Вай аз додани ҷузъиёти бештар худдорӣ кард.
Дар посух ба пурсишҳои батакрори хабарнигорон, ки то куҷо дуруст аст Рухшона Ҳакимова барои анҷоми як пурсиш дар бораи нуфузи Чин боздошту маҳкум шудааст, Лутфуллозода посух дод, ки парванда махфӣ аст ва бинобар ин, ҷузъиёт ироа карда наметавонад.
Рухшона Ҳакимова 31-сола аст ва хатмкардаи бахши рӯзноманигории Донишгоҳи миллии Тоҷикистон. Корро соли 2013 дар Маркази таҳқиқоти журналистӣ оғоз кардааст. Корманди нашрияҳои “Самак”, “Фараж” ва “Ҷавонони Тоҷикистон” буд. Матолиби таҳлилияш дар сомонаҳои “Кабар Азия” ва “Фактчек.тҷ” низ нашр шудаанд. Барандаи ҷоизаи ба номи Воҳид Асрорӣ, ҷоизаҳои Кумитаи ҷавонон, Эътилофи бонувони журналист ва "Медиа-Алянс"-и Тоҷикистон аст.
Дар бештар аз ду соли охир нуҳ рӯзноманигору блогери тоҷик – Абдулло Ғурбатӣ, Завқибек Саидаминӣ, Далери Имомалӣ, Абдусаттор Пирмуҳаммадзода, Хуршед Фозилов, Хушом Ғулом, Улфатхоним Мамадшоева, Муҳаммади Султон ва Аҳмади Иброҳим – аз 7 то 20 сол зиндонӣ шуданд. Созмонҳои ҳомии ҳуқуқ, аз ҷумла Human Rights Watch ин вазъро ташвишовар донистаанд.