Каролин Ливит, сухангӯи ҳукумати Амрико гуфт, сар аз моҳи феврал ин кишвар барои маҳсулоти воридии Канада, Мексика ва Чин боҷ меситонад. Ба қавли ӯ, ҳаҷми боҷ аз Мексикаву Канада 25 дар сад ва аз Чин 10 дар сад хоҳад буд.
Ситонидани боҷ аз шарикони асосии тиҷоратии Амрико, яке аз ваъдаҳои асосии Доналд Трамп, раиси ҷумҳури Амрико дар замони маъракаи интихоботиаш буд. Иқтисоди Амрико ба воридот аз се кишвар бисёр пойбанд аст ва аз 20 то 25 дар сади корхонаҳои саноатии Амрико аз нафти воридотӣ аз Канада истифода мебаранд.
Тақрибан 64 дар сади меваву сабзавоти мағозаҳои Амрико аз Мексика ворид мешаванд. Иқтисоддонҳо мегӯянд, мумкин аст, ситонидани боҷ сабаби болоравии қиматҳо дар худи Амрико шавад, вале Кохи Сафед нагуфт, ки барои роҳ надодан ба ин чӣ кор мекунад.
Ҷастин Трюдо, нахуствазири Канада гуфтааст, ки дар сурати боҷситонии Амрико, кишвараш тадбирҳои ҷавобӣ меандешад ва афзуд, ки ин “боҷситонӣ на ба Амрико зарур аст ва на ба Канада.”