Тоҷиддин Мардонӣ, ховаршинос ва дипломати тоҷик, шаби 14-уми ноябр бар асари бемории қанд даргузашт. 77 сол дошт.
Намояндагони Фарҳангистони улуми Тоҷикистон гуфтанд, ки ӯ рӯзи 15-уми ноябр дар зодгоҳаш, деҳаи Дурбати Ҳисор, дафн карда шуд.
Аз соли 1995 то 2001 сафири Тоҷикистон дар Узбекистон буд. Дар солҳои 2001-2004 сафорати Тоҷикистонро дар Туркманистон раҳбарӣ кардааст.
Баъд аз поёни маъмурияти дипломатӣ ба Пажӯишгоҳи шарқшиносӣ ва мероси хаттӣ баргашт. Як муддат муовини раиси Донишкадаи исломии Тоҷикистон низ буд.
Тоҷиддин Мардонӣ дар замони Шӯравии собиқ ба ҳайси тарҷумон дар Яман ва Ироқ хидмат кардааст. То дами марг раёсати ҷомеаи дӯстии Тоҷикистон ва кишварҳои арабро бар уҳда дошт.
“Пайдоиш ва инкишофи анъанаи дузабонӣ” ва “таъсири адабиёти араб ба эҷодиёти шоирони форсу тоҷик” кори илмии ӯст.