Рӯзи 7 октябр президенти Тоҷикистон Эмомалӣ Раҳмон ба Маскав меравад ва он ҷо қарор аст дар нишасти сарони кишварҳои Иттиҳоди Давлатҳои Ҳамсуд (ИДМ) иштирок кунад.
Дар бораи баргузории ин нишаст Дмитрий Песков, сухангӯи президенти Русия хабар дод. Дар барқияи табрикии президенти Русия ба муносибати 72-солагии Эмомалӣ Раҳмон, Владимир Путин ҳам аз “мулоқоти рӯзҳои наздик” хабар додааст.
Песков дирӯз гуфт, ки дар Маскав ҷаласаи сарони давлатҳои ИДМ барпо мешавад ва ба ин муносибат шоми 7 октябр президентони кишварҳои узв вориди Маскав мешаванд. Он рӯз президент Путин ҳам зодрӯзи 72-юми худро ҷашн мегирад.
Тоҷикистон ва Русия шарики стратегӣ ба шумор мераванд, дар хоки Тоҷикистон пойгоҳи азимтарини низомии Русия ҷойгир шудааст ва ин кишвар шарики муҳими тиҷоратии Душанбе ба шумор меравад. Вале фишору азиятҳои шаҳрвандони Тоҷикистон дар Русия, бахусус баъди ҳамла ба толори консертии "Крокус", ки дар он аксар шаҳрвандони Тоҷикистон гумонбар мешаванд, бисёриҳоро дар Душанбе аз тарзи муносибати ҳукумат ва ҷомеаи Русия дилсард кардааст.
Айни замон, маълум нест, ки оё дар мулоқоти Раҳмон ва Путин ин қазия ва ҳам маъракаи фишору азияти шаҳрвандони Тоҷикистон дар Русия матраҳ мешавад ё на, чун Душанбе ҳамеша талош кардааст дар муқобили Маскав мавқеи эҳтиёткоронаро касб кунад.