Инчунин, ба иттилои сомонаи ҳукумати минтақавӣ, ба муҳоҷирон иҷора додани иншоот манъ шудааст. Иҷрокунандаи муваққатии вазифаи раиси вилоят Вячеслав Федоршев ҳамаи идораҳои минтақаро, ки бо тиҷорату савдо сарукор доранд, вазифадор намуд, ки муҳоҷирони бо патент коркунандаро аз кор ронанд.
Сомонаи Idel.Реалии менависад, бар асоси супориши Федоришев, коргарони хориҷӣ ҳақ надоранд дар вилояти Самара дар соҳаи фурӯши маҳсулоти хӯрокворӣ, нӯшокӣ ва маҳсулоти тамоку, нассоҷӣ, пойафзол ва дигар соҳаҳои савдо кор кунанд. Инчунин, ба муҳоҷирон кор дар истеҳсоли маҳсулоти ширӣ ва нонӣ, хӯроки кӯдак, оби нӯшокӣ, корхонаҳои хӯроки умумӣ, савдои яклухт ва чаканаи машруботи алкоҳолӣ ва спирти этил, сигор, доруворӣ, тухм ва маҳсулоти ширӣ манъ шудааст.
Ба муҳоҷирон инчунин кор дар бахши маълумот ва таҳияи пойгоҳҳои иттилоотӣ, нашри хабар, инчунин, ба мӯҳлати кӯтоҳ иҷора додани манзил ҳам манъ мебошад.
Мақомоти маҳаллии Самара мегӯянд, ки чунин маҳдудиятҳо “бо ҳадафи таъмини аминияти шаҳрвандон ва ҳимояти бозори кор” карда мешавад.
Пеш аз ин, моҳи феврали имсол бо қарори раиси пешини вилоят Дмитрий Азаров кори муҳоҷирон бо патент ба ҳайси ронандаи такси, ронандаи нақлиёти мусофирбар, кор дар соҳаи маориф ва оҷонсиҳои ҷалби коргар манъ шуда буд.
Вилояти Самара дар ҷанубушарқи Русия ва дар марз бо Қазоқистону ҷумҳурии Тотористон ҷойгир мебошад. Беш аз 3 миллион сокин дорад. Бино ба иттилои омори расмии ин минтақа, соли 2021 ба вилояти Самара беш аз 71 ҳазор муҳоҷири дохиливу хориҷӣ барои кору зиндагӣ рафтааст ва аксари муҳоҷирони хориҷӣ шаҳрвандони Тоҷикистон ва Қазоқистон будаанд.
Хабари манъи кор барои муҳоҷирон дар Самара дар ҳолест, ки пеш аз ин мақомоти вилояти Ленинград гуфтанд, муҳоҷирони Узбекистон, Тоҷикистон, Молдова ва Озарбойҷон аз ҳақи кор ба ҳайси ронандаи такси ва ронанда дар ширкатҳои нақлиётӣ маҳрум мешаванд. Мақомоти Русия гуфта буданд, дар беш аз 10 шаҳру ноҳияҳои ин кишвар, аз ҷумла дар вилояти Воронеж ва Камчатка ҷалби муҳоҷирон ба кор дар нақлиёти мусофирбар, аз ҷумла таксиронӣ манъ мешавад.
Монеаву маҳдудиятҳои шадиди кору зиндагӣ барои муҳоҷирон аз Тоҷикистон ва дигар кишварҳо баъди ҳамла ба “Крокус сити ҳол” шурӯъ шуд, ки бо гумони содир кардани ин ҷиноят асосан шаҳрвандони Тоҷикистон боздошт шудаанд.
Ирина Волк, сухангӯйи Вазорати корҳои дохилии Русия ҳафтаи ҷорӣ аз анҷоми 176 ҳазор рейд, қарори ихроҷи 92 ҳазор муҳоҷир ва манъи вуруди қариб 150 ҳазор хориҷӣ дар соли 2024 хабар дод. Волк гуфт, баъд аз сахттар кардани назорат бар ҷараёни муҳоҷират, корфармоён дар бораи бастани қарордоди корӣ бо муҳоҷирон ба мақомот бештар хабар медиҳанд. Аксар ҷабрдидаҳо шаҳрвандони Тоҷикистон мебошанд.
ИНЧУНИН, БИХОНЕД:
"Моро таҳқир мекунанд, дар сардӣ нишаставу мунтазирем"Манъи густурдаи вуруди муҳоҷирон ба Русия идома дорадМуҳоҷирони тоҷикро аз рондани таксӣ дар як вилояти Русия маҳрум карданд"Ёфтӣ мехӯрӣ, наёфтӣ мемурӣ." Заноне, ки аз Русия баргаштанд, чӣ ҳол доранд?176 ҳазор "рейд" ва қарори ихроҷи 92 ҳазор муҳоҷир дар Русия