Никита Журавел, ки барои оташ задани китоби Қуръон дар Волгоград боздошт шудааст, мегӯяд, писари 15-солаи раисҷумҳури Чеченистон Одам Қодиров ӯро дар боздоштгоҳи шаҳри Грозний задааст.
Дар ин бора ваколатдори ҳуқуқи инсон дар Чеченистон Мансур Солтаев хабар дод. Ба гуфтаи Солтаев, ваколатдори ҳуқуқи инсон дар Русия Татяна Москалкова ба ӯ дастур додааст, ки қазияро баррасӣ кунад.
"Шахсан ба боздоштгоҳ рафтам. Никита Журавел дар рафти суҳбат гуфт, рӯзе, ки бо раисҷумҳури Чеченистон мулоқот дошт, баъд аз рафтани Рамазон Қодиров писари калонии ӯ Одам Қодиров ворид шуда, вайро латукӯб кардааст", - изҳор дошт Солтаев.
Тибқи иттилои "Грозний-Информ", Рамазон Қодиров дар мулоқот бо Журавел аз ӯ хостааст, ки дини Исломро қабул кунад.
Раисҷумҳури Чеченистон то ҳол хабари латтукӯб шудани Журавелро аз сӯи писараш шарҳ надодааст.
Навори оташ задани Қуръон дар наздикии Масҷиди марказии ҷомеи Волгоград сабт шудааст. Ин навор аз 11 сония иборат аст. Расонаҳои Русия навори боздошти гумонбарро рӯзи 20-уми май нашр карданд. Гумонбар Никита Журавели 19-сола, зодаи Севастополи Қрим аст.