Саидэҳсон Ҷалолиён барандаи ҷоизаи "Эътимод" шуд

Саидэҳсон Ҷалолиён, хабарнигори Радиои Тоҷикистон, ки дар гузашта дар расонаҳои мустақил кор кардааст, барандаи ҷоизаи “Эътимод”-и Шӯрои ВАО дар соли 2023 гардид.

Барандаи ҷоизаро рӯзи 3-юми май дар нишасте бахшида ба Рӯзи озодии баён эълон карданд. Ӯ аз миёни се номзад интихоб шуд.

Барои дарёфти ҷоиза тавассути шабакаҳои иҷтимоӣ номи чандин хабарнигор пешниҳод шуда буд. Шӯрои ВАО номзадҳои зиёдро баррасӣ накард.

Ҷалолиёни 37-сола қаблан дар радиоҳои Имрӯз, Ватан, Шаҳринав ва ҳафтаномаи Фараж кор кардааст. Ин рӯзноманигорро бештар бо қироати эълонҳо бо садои ғайримаъмулӣ ва барномаи суҳбат бо мардум мешиносанд.

Ҷойизаи “Эътимод” аз сӯи Шӯрои ВАО, як созмони рӯзноманигорӣ дар Тоҷикистон ба нафаре дода мешавад, ки меъёрҳои ахлоқии журналистиро дар кораш риоя мекунад.

Намояндагони расонаҳои байнулмилалии муқими Тоҷикистон аз ширкат дар ин озмун маҳруманд.