Темур Раҳимов, паҳлавони маъруфи тоҷик, дар мусобиқаи қаҳрамонии ҷудои Аврупо миёни бузургсолон, ки рӯзи 26-уми ноябр дар шаҳри Гории Гурҷистон баргузор шуд, дар ҳайати дастаи “Red Star”-и Сербия медали нуқра ба даст овард.
Дастаи “Red Star”, ки дар ҳайати он Темур Раҳимов ҳунарнамоӣ кард, ба финал роҳ ёфт, вале дар даври ниҳоӣ аз тими мизбон - “Fighter”-и Гурҷистон мағлуб шуд.
Ба иттилои сомонаи расмии Федератсияи байналмилалии ҷудо (IJF), дар мусобиқаи қаҳрамонии ҷудои Аврупо дар Гурҷистон (European Judo Championships - Champions League (W&M) 2022) ҳамагӣ 143 варзишгар (70 мард ва 73 зан) аз 25 кишвари чаҳор қораи олам иштирок кард.
Мусобиқа аз рӯ панҷ вазн миёни мардон (-66 кг, -73 кг, - 81 кг, - 90 кг, +90 кг) ва панҷ вазн миёни занон (-52 кг, -57 кг, - 63 кг, - 70 кг, +70 кг) сурат гирифт.
Паҳлавони тоҷик Темур Раҳимов дар вазни +90 кг қувваозмоӣ кард. Дар ин вазн 16 гуштигир аз 6 кишвар рақобат намуд, ки 8 нафарашон аз Гурҷистон, чаҳор нафар аз Фаронса, якнафарӣ аз Испания, Сербия, Тоҷикистон ва Юнон буданд.
Ёдовар мешавем, Темур Раҳимов дар мусобиқаи байналмилалии ҷудо "Baku Grand Slam 2022", ки рӯзҳои 4-6-уми ноябр дар пойтахти Озарбойҷон - шаҳри Боку - баргузор шуд, дар вазни беш аз 100 кило медали тило ба даст овард. Ӯ дар таърихи ҷудои тоҷик аввалин варзишгарест, ки дар мусобиқоти "Grand Slam" соҳиби медали тило гардид. Барои ин дастовард паҳлавони 25-солаи тоҷик бо тӯҳфаи шаҳрдории Душанбе – хонаи дуҳуҷрагӣ - сарфароз гашт.
Темур Раҳимов дар мусобиқаи «Baku Grand Slam 2022» соҳиби 1000 имтиёзи олимпӣ шуд ва мавқеи пешсафиашро дар радабандии ҷаҳонии ҷудо дар вазни +100 кг нигоҳ дошт.
Зимнан, ин медали чаҳоруми Темур Раҳимов дар мусобиқаҳои байналмилалии «Grand Slam” дар соли 2022 буд. Ӯ имсол дар чунин мусобиқот дар Абузабии Имороти Муттаҳидаи Араб, Телавиви Исроил ва Анталияи Туркия медали биринҷӣ ба даст оварда буд.