Бо гузашти се рӯз ва бо вуҷуди муроҷиатҳо ба Вазорати корҳои дохилии Тоҷикистон, ҳанӯз ҳамлаварон ба хабарнигорони Радиои Озодӣ ва "Настояшее Время" дар Душанбе ошкору дастгир нашудаанд. Аз таҷҳизоти рабудашуда низ то ҳанӯз хабаре нест. Мақомот расман дар ин бора хабар надоданд. Созмонҳои ҳомии ҳуқуқи рӯзноманигорон низ.
Ҳамла ба хабарнигорони Радиои Озодӣ ва телевизиони "Настояшее Время" рӯзи 17-уми майи имсол, пас аз он рӯй дод, ки онҳо барои гирифтани шарҳи Улфатхоним Мамадшоева, яке аз фаъолони ҷомеаи мадании Бадахшон, ба хонааш дар пойтахт рафта буданд. Мақомот он рӯз ӯро ба ташкили эътирозҳо дар Хоруғ муттаҳам карданд.
Шахсони ношинос дар назди хонаи ӯ ба хабарнигорону наворбардорони Радиои Озодӣ ва телевизиони "Настояшее Время" дар Душанбе ҳамла карда, дастгоҳи наворгирӣ ва телефонҳояшонро кашида гирифтанд.
Масъулони ШКД-и ноҳияи Сино-2-и шаҳри Душанбе, ки тафтишро пеш мебаранд, ба зангҳои батакрори Радиои Озодӣ дар мавриди пешрафт дар таҳқиқи ҳодиса посух намедиҳанд.
Муллораҷаб Юсуфӣ, хабарнигори Радиои Озодӣ, рӯзи 19-уми май гуфт, баъд аз чаҳор соати ҳодиса ба Шуъбаи корҳои дохилии ноҳияи Сино-2 муроҷиат карданд.
"Дар онҷо чӣ гуна рӯй додани ҳодисаро пурра навишта гирифтанд. Як нафари моро ба ҷойи ҳодиса бурда, пурсиданд. Ваъда доданд, ки ҳодисаро таҳқиқ хоҳанд кард, аммо то ҳол ягон ҷавоб нагирифтем," -- афзуд Юсуфӣ.
Браузери шумо HTML5-ро намешиносад
Ҳамлаваронро дар Душанбе накофтанд ё наёфтанд?
Ба қавли хабарнигор, онҳо вакили мудофеъ гирифта, то охир барои барқарор кардани адолат талош хоҳанд кард. Айни чунин ҳодиса бо Анӯшервон Орифов, хабарнигори телевизиони "Настояшее Время" ва наворбардораш рӯй дод.
Дар умум, ба иттилои хабарнигорони Радиои Озодӣ ва "Настояшее Время" аз онҳо ҳафт телефон ва як дастгоҳи наворгириро гирифтаанд. Ба қавли Анушервон Орифов, ҳамлаварон гуфтаанд, хабарнигорон дастгоҳҳоро дертар хоҳанд гирифт, аммо нагуфтаанд, кай ва аз куҷо.
"Он таҷҳизоте, ки фақат аз гуруҳи кории мо, яъне "Настояшее Время" гирифтанд, бештар аз 9 ҳазор долар (112 ҳазор сомонӣ) арзиш дорад," – афзуд ӯ.
Хабарнигорон мегӯянд, ҳамла одӣ ё розҳзанӣ набуд, балки ҳадафмандона ва танҳо бо нияти гирифтани телефони мобили ва дурбини наворгирӣ анҷом шуд. Дастгоҳҳое, ки дар он суҳбати Улфатхоним Мамадшоева маҳфуз буд.
Ҳуқуқдонҳо мегӯянд, афроди ношинос дар чанд маврид ҳуқуқи хабарнигоронро поймол карданд:
- “Якум, ғайриқонунӣ ва бе нишон додани санаде ба кори хабарнигорон дахолат кардан;
- Дувум, задан ва сипас мусодира кардани таҷҳизоти кории онҳо.”
Шокирҷон Ҳакимов, доктори илми ҳуқуқ, гуфт: “Тартиби мусодира ҳаст. Барои мусодира асос лозим. Асос ин санади расмӣ аз тарафи додситон, баъзе маврид аз сӯи додгоҳ. Агар корҳои фаврӣ-ҷустуҷӯӣ бошад ва қаблан далелҳо бошад, баъдан зимни содир шудани ҷиноят боздошт ва мусодира мекунанд.”
Дар пайи ин ҳодиса президенти Радиои Аврупои Озод/Радиои Озодӣ ҳамлаҳои ҷудогона ба хабарнигорони Радиои Озодӣ ва телевизиони “Настояшее Время”-ро дар Душанбе шадидан маҳкум кард. Ҷейми Флай рӯзи 17-уми май дар изҳороте гуфт, “борҳо аз мақомоти Тоҷикистон хостем, ки фишорро алайҳи расонаҳои озод бас кунанд.”
То ҳол ҳеч созмонҳои хабарнигории Тоҷикистон ба ҳамла ба хабарнигорону наворбардорони Радиои Озодӣ ва телевизиони "Настояшее Время" вокунише накарданд.