Киштии боркаши "Эвер Гивен", ки аз 23-юми март ба ин сӯ дар обҳои канали Суэз дармонда буд, субҳи рӯзи душанбе дар талоши сеюм аз ҷояш ҷумбонида ба ҳаракат дароварда шуд. Феълан маълум нест, ки ин киштӣ кай аз рӯи обҳои канали Суэз шино карда метавонад. Дар ин бора дар саҳифаи Твиттери ширкати нақлиётии Inchcape Shipping хабар дода шудааст.
The MV Ever Given was successfully re-floated at 04:30 lt 29/03/2021. She is being secured at the moment. More information about next steps will follow once they are known. #suezcanel #maritime pic.twitter.com/f3iuYYiRRi
— Inchcape Shipping (@Inchcape_SS) March 29, 2021
Ду талоши аз рӯзи якшанбе барои аз ҷой ҷунбондани киштӣ бо ёрии мавҷи зиёди об бенатиҷа буд. Рӯзи якшанбе ба амалиёти кӯмак ба киштии борбар қаиқҳои иловагии такондиҳанда ҷалб шуданд. Bloomberg мегӯяд, ки ҳаракат додани киштии азим танҳо баъди он имконпазир шуд, ки аз зери нӯги киштӣ 27 ҳазор кубометр хоку гилро тоза карданд.
Контейнеровоз Ever Given снова на плаву в Суэцком канале. pic.twitter.com/J2p25oOPhg
— РБК (@ru_rbc) March 29, 2021
Киштии борбари "Эвер Гивен" 400 метр дарозӣ ва тавони интиқоли 220 ҳазор тонна борро дорад. Он шаш рӯз пеш бо сабаби бодҳои сахту зиёд ва тундбоди омехта бо хок дар қисмати ҷанубии обҳои канали Суэз дармонд. Дар натиҷа, ҳаракат дар ин обҳо қатъ шуду тахминан 300 киштии дигар дар ҳолати масдудшуда монданд. Бархе киштиҳо маҷбур шуданд, ки роҳи ҳаракати худро дигар карда, бо роҳи тӯлонитар - тавассути қораи Африқо пеш раванд.
Канали Суэз яке аз роҳҳои бисёр серкиштии баҳрӣ ба шумор меравад. Дар паи масдуд шудани роҳи киштиҳо аз ҷониби "Эвер Гивен", ҳамарӯза 9 миллиард доллар зиёни молӣ ворид шуда, нархи нафт дар бозор 5 % афзудааст.