Дар пайи суқут ё афтодани чархболи низомӣ дар Покистон чаҳор сарбоз ба ҳалокат расидаанд. Ҳодиса 27-уми декабр дар наздикии марзи он кишвар бо Чин рух дод.
Як сухангӯйи артиши Покистон гуфтааст, чархбол барои овардани ҷасади сарбозе ба он минтақа рафта буд, ки бар асари барфрезӣ ҷон бохтааст. Сабаби суқути чархболро нуқси техникӣ ё фаннӣ гуфтаанд.
Артиши Покистон имсол шоҳиди чанд садамаи марговар будааст.
Моҳи феврали имсол як ҳавопаймо дар ҷараёни тамрин дар иёлати Панҷоб афтод. Як ҳавопаймои F-16-и нирӯҳои ҳавоии Покистон ҳангоми тамрин барои гашти низомӣ дар наздикии Исломбод дар моҳи март дучори садама шуд ва сарнишинонаш ҷон бохтанд.