Кумитаи дифоъ аз хабарнигорон (CPJ), қароргоҳаш дар Ню-Йорк, рӯзи 6-уми феврал бо нашри изҳорот аз мақомоти Тоҷикистон хост, рӯзноманигор Далер Шарифовро бе таъхир раҳо карда, иттиҳомоти ба зидди ӯро бекор намоянд. Созмон ҳамчунин аз мақоомти Тоҷикистон хост, ба Далер Шарифов иҷоза диҳанд, ки бидуни ҳеч гуна мамониат ба фаъолияти худ идома диҳад.
Далер Шарифов рӯзи 28-уми январ боздошт ва ду рӯз баъд аз ҷониби Додгоҳи ноҳияи Исмоили Сомонии шаҳри Душанбе барои ду моҳ ба ҳабс гирифта шуд.
Мақомот ӯро ба барангехтани кинаву адовати милливу мазҳабӣ муттаҳам медонанд. Иттиҳоме, ки наздикон ва дӯстони Шарифов онро беасос мехонанд.
Додситонии кулли Тоҷикистон баъд аз панҷ рӯзи боздошт, бо нашри як изҳорот Шарифовро ба нашри "200 матлабу мақола"-и ба қавли мақомот "дорои мазмуну муҳтавои экстремистӣ" муттаҳам кард. Ба гуфтаи мақомот, ин мақолаҳо аз соли 2013 то 2019 нашр шудаанд. Аммо маълум нест, ин хулоса бар асоси чӣ эълон шудааст.
Мақомоти додситонӣ дар ин изҳорот ба рисолаи "Муҳаммад (с) ва терроризм", низ ишора кардаанд, ки ба қалами Далер Шарифов тааллуқ дорад. Вале наздикони Далер Шарифов ва бархе аз созмонҳои журналистӣ ба ин гуфтаҳо бовар надоранд ва мегӯянд, рӯзноманигор дар ҳеҷ мақола кинаву адоватро барнаангехтааст.
"Мақомоти тоҷик бояд ба таври фаврӣ иттиҳомоти пучро алайҳи рӯзноманигори мустақил Далер Шарифов канор бигузоранд, ӯро раҳо кунанд ва иҷозат бидиҳанд, ки ӯ ба фаъолияташ идома диҳад", -- гуфтааст Гулноза Саид, ҳамоҳангсози барномаҳои Кумитаи дифоъ аз хабарнигорон барои Осиёи Марказӣ.
Гулноза Саид дар идома гуфтааст, "мақомоти тоҷик қаблан тақрибан ҳама садоҳои мустақилро аз кишвар берун ронданд. Бинобар ин, ин муҳокима талоши ошкор барои хомӯш кардани камшумор мунтақидони расонаӣ дар пешорӯи интихобот аст".
Тоҷикистон дар остонаи ду интихобот қарор дорад. Рӯзи аввали моҳи март интихоботи порлумонӣ доир мешавад ва интизор меравад, ки дар тирамоҳи ҳамин сол интихоботи президентӣ баргузор шавад.
Аз ин қабл, ҳашт созмони хабарнигорӣ ва ҳомии ҳуқуқи инсон дар Тоҷикистон, даҳҳо журналист ва низ масъули бахши озодии матбуотии САҲА озодии Далер Шарифовро талаб карда буданд.
Далер Шарифов 32-сола аст ва қаблан дар телевизиони "Сафина" ва ҳафтаномаи "Озодагон" кор кардааст.