Созмони Милали Муттаҳид мегӯяд, талафот дар байни мардуми ғайринизомӣ дар Афғонистон дар ним соли гузашта афзуда ва ба ҳадди рекордӣ расидааст.
Дафтари ин созмон дар Кобул рӯзи 15-уми июл гуфт, ки дар 6 моҳ тақрибан 1700 нафар аз мардуми осоишта дар Афғонистон дар ҳамлаву бомбгузориҳо кушта шудаанд. Аз замони сабти талафот дар байни мардум аз соли 2009, дафтари Созмони Милал мегӯяд, бори аввал аст, ки чунин талафоти зиёд дар ним солро сабт мекунад.
Бисёре аз ин мардум дар ҷангҳо байни нерӯҳои давлатӣ ва ҷангҷӯён, дар бомбҳои канори роҳ, дар ҳамлаҳои маргталабона ҷангҷӯёни ДОИШ ба ҳалокат расидаанд.
Талафоти аз ҳама бештар дар байни сокинони Кобул, вилоятҳои Нангарҳор, Форёб, Ҳилманд ва Қандаҳор будааст. Гурӯҳи ба ном Давлати исломӣ ва Толибон аз омилони асосии талафоти мардуми бегуноҳ номида шудаанд.