Вазири адлияи Тоҷикистон вуҷуди маҳбусони сиёсӣ дар зиндонҳои кишварро рад кард. Рустами Шоҳмурод рӯзи 31-уми январ дар нишасти матбуотӣ дар Душанбе гуфт, то ба ҳол касе дар Тоҷикистон барои фаъолияти сиёсӣ зиндонӣ нашудааст ва гузориши баъзе созмонҳои байналмилалиро дар ин маврид беасос хонд. Ӯ гуфт, “ҳамаи маҳбусон барои ҷинояти содиркардаи худ дар боздошт ҳастанд.”
Созмонҳои ҳомии ҳуқуқ маҳбусоне чун Муҳаммадрӯзӣ Искандаров, раиси собиқи ҳизби демократ, аъзои зиндонии ҲНИТ ва вакилони дифоъро сиёсӣ мешуморанд.
Рустами Шоҳмурод, вазири адлияи Тоҷикистон, инчунин гуфт, “дар қонунгузории кишвар мафҳуми “маҳбуси сиёсӣ” нест ва бинобар ин ҳамагуна даъво дар бораи вуҷуди зиндониҳои сиёсӣ бепоя аст”. Тобистони соли 2016 омбудсмени тоҷик Зариф Ализода айни чунин ҷавобро пеш оварда буд.
Аммо мунтақидон ва созмонҳои байналмилалии ҳуқуқи башар мегӯянд, зикр нашудани ин ибора ба маъное нест, ки дар кишвар маҳбусони сиёсӣ нестанд. Онҳо мегӯянд, даҳҳо нафар бо айби ангезаҳояшон сиёсӣ дар Тоҷикистон зиндонӣ шудаанд ва барои намуна аз аъзои боздоштшудаи ҳизби дар Тоҷикистон мамнӯи наҳзати исломӣ, “Гурӯҳи 24”, соҳибкори шинохта Зайд Саидов ва вакилони дифоъ Бузургмеҳр Ёров ва Шӯҳрат Қудратов ва дигарон мисол меоранд.
Зайд Саидов
Муаззама Қодирова, вакили собиқи Бузургмеҳр Ёров, рӯзи 31-уми январ дар посухи хаттӣ тариқи Фейсбук ба Радиои Озодӣ гуфт, иддаои мақомот дар бораи вуҷуд надоштани зиндониҳои сиёсӣ нодуруст аст. Дар ҳоле ки, ба гуфтаи ӯ, “парвандаи Бузургмеҳр Ёров фармоишӣ ва сиёсӣ буд”.
Созмонҳои ҳомии ҳуқуқи башар онҳоеро маҳбуси сиёсӣ меноманд, ки бар алайҳашон бо ангезаҳои сиёсӣ айб эълон шудааст. Чунин афрод маъмулан барои мухолифаташон ба низоми ҳоким таҳти таъқиб қарор гирифта, дар мурофиаҳои пушти дарҳои баста маҳкум мешаванд.
Созмонҳои ҳомии ҳуқуқи башар онҳоеро маҳбуси сиёсӣ меноманд, ки бар алайҳашон бо ангезаҳои сиёсӣ айб эълон шудааст. Чунин афрод маъмулан барои мухолифаташон ба низоми ҳоким таҳти таъқиб қарор гирифта, дар мурофиаҳои пушти дарҳои баста маҳкум мешаванд.
Муҳаммадрӯзӣ Искандаров
Мавзӯи маҳбусони сиёсӣ дар Тоҷикистон солҳо боз матраҳ аст. Созмонҳои ҳомии ҳуқуқ маҳбусоне чун Муҳаммадрӯзӣ Искандаров, раиси собиқи ҳизби демократ, аъзои зиндонии ҲНИТ ва чанд вакили дифоъро сиёсӣ мешуморанд.
Онҳо мегӯянд, вазири собиқи саноат ва соҳибкори маъруф Зайд Саидов низ соли 2013 баъди эълони азмаш ба таъсиси ҳизби сиёсии Тоҷикистони нав бо иттиҳомоте, чун ришвагирӣ, тахаллуфоти молӣ, бисёрзанӣ ва таҷовуз ба номус маҳкум шуда буд. Тарафдорону наздикони Саидов ва созмонҳои ҳомии ҳуқуқ мегӯянд, далели аслии таъқиби ӯ сиёсӣ буд.
Браузери шумо HTML5-ро намешиносад
Вазири адлия: "Тоҷикистон маҳбуси сиёсӣ надорад"