Оби олуда ба моддаи хатарноки сианид, ки аз Қазоқистон ба рӯдхонаи Иртиши Русия омехта шуд, то 10 рӯзи дигар ба минтақаи Омски Русия хоҳад расид. Олеся Енина, сухангӯи бахши минтақавии Вазорати ҳолатҳои фавқуллодаи Русия гуфт, омодагиҳо барои рафъи хатари ин олудагӣ идома дорад ва давлати Қазоқистонро барои огаҳ накардан аз ин ҳодиса интиқод кард. Садамае дар як корхонаи маъдангудозии Қазоқистон сабаби рехтани оби олуда ба сианид ба рӯдхонаи Секисовска шуд, ки як шохаи рӯдхонаи Иртиш аст. Мизони сианид дар рӯдхонаи Секисовска 516 маротиба бештар аз меъёр будааст.
