Рӯзи чаҳоршанбе дар Карочӣ-шаҳри бандарии Покистон Эмомалӣ Раҳмон-раиси ҷумҳури Тоҷикистон зимни мулоқоти худ бо тоҷирони покистонӣ аз онҳо даъват кард, ки дар бахшҳои мухталифи иқтисоди Тоҷикистон сармоягузорӣ кунанд. Вай барои сармоягузорӣ аз бахшҳои энержӣ, маодан, сохтмон, мухобирот, кишоварзӣ, тавлиди маводи ғизоӣ, нассоҷӣ, тавлиди лампаҳои барқӣ, ҷаҳонгардӣ ва бонкдорӣ ном бурд. Оқои Раҳмон тоҷирону соҳибкорони покистониро мутмаин сохт, ки ҳукумати Тоҷикистон аз ҳар лиҳоз ба онҳо кӯмак хоҳад кард. Дар ин мулоқот аз ҷониби Тоҷикистон 50 тоҷиру соҳибкор ширкат доштанд. Дар сӯҳбатҳо ҳамкориҳо ва сармоягузорӣ дар бахшҳои энержии Тоҷикистон бештар мавриди таваҷҷуҳ қарор гирифт.
