"Дар Русия имсол аз дасти сартарошидаҳо 49 нафар ба ҳалокат расида беш аз 80 ҳодисаи ҳамла бар асоси адовати инсонӣ ба қайд гирифта шудааст", - гуфт раиси Бюрои ҳимоят аз ҳуқуқи инсон дар Маскав Александр Брод. Вай гуфт, ки дар аксари ҳолатҳо, ин гуна ҳодисаҳо дар шаҳрҳои серҷамъияттарини Русия - Маскаву Санкт-Петербург рӯй медиҳад ва қурбониҳои аслии ин ҳамлаҳо шаҳрвандони Осиёи Марказӣ мебошанд. Ин фаъоли ҳуқуқи башар мегӯяд, ки аз рӯи иттилои онҳо, дар саросари Русия айни замон ҳудудан 70 ҳазор сартарошидаҳо амал мекунанд.
