Кудиеви 24-сола дар вазни то 70 кило дар даври аввал намояндаи Муғулистон Энхтуяро бо ҳисоби 11 бар 0 шикаст дода, дар даври дуюм Рамазон Рамазонови булғорро бо ҳисоби 12 бар 2 мағлуб кард ва ба чорякфинал баромад.
Абдулмаҷид дар даври чаҳорякниҳоӣ бар Сино Халили эронӣ бо ҳисоби 6 бар 5 дастболо шуда, ба даври ниманиҳоӣ роҳ ёфт. Аммо дар нимфинал аз Нуржока Кайпанови қазоқ бо ҳисоби 2 бар 13 шикаст хӯрд. Кудиев барои медали биринҷӣ Акаки Кемертелидзеи гурҷиро бо ҳисоби 13 бар 2 шикаст дод.
Дар вазни то 70 кило Нуркожа Кайпанови қазоқ, ки дар финал бар Ёсиносуке Аоягии ҷопонӣ пирӯз шуд, барандаи медали тилло гардид. Ба ғайр аз Абдулмаҷид Кудиев намояндаи Русия Иналбек Шериев бо медали биринҷӣ мукофотонида шуд.
Дарвоқеъ, Абдулмаҷид Кудиев пас аз 17 сол барои Тоҷикистон дар қаҳрамонии гуштии ҷаҳон медал овард. Қаблан, Юсуф Абдусаломов соли 2007 дар қаҳрамонии ҷаҳон дар риштаи гуштии озод дар вазни то 84 кило дар шаҳри Бокуи Озарбойҷон медали нуқра гирифта буд.
Абдулмаҷид Кудиев, ки зодаи Доғистони Русия мебошад, аз моҳи январи соли 2023 дар ҳайати дастаи мунтахаби Тоҷикистон ҳунарнамоӣ мекунад. Вай дар риштаи гуштии озод ду бор ба унвони қаҳрамони Тоҷикистон (солҳои 2023, 2024) мушарраф шудааст.
Мусобиқаи қаҳрамонии ҷаҳон дар риштаи гуштӣ дар вазнҳои ғайриолимпӣ бори аввал дар ҳашт соли ахир баргузор шуд. Бар асоси низомномаи мусобиқа дар он варзишгароне, ки дар Бозиҳои олимпии соли 2024 ширкат надоштанд, иштирок карданд.
Дар ҳисоби умумидастаӣ мунтахаби Ҷопон бо чаҳор медали тилло, як нуқра ва як биринҷӣ мақоми аввалро касб кард. Дастаҳои Озарбойҷон (3-0-0) ва Қазоқистон (1-2-0) мутаносибан ҷойҳои дуюму сеюмро соҳиб шуданд.
Соли оянда мусобиқаи қаҳрамонии чахон дар шакли мукаррарй, комилан бо хамрохии намояндагони вазнхои олимпӣ дар шаҳри Загреби Хорватия доир мегардад.
